നിലവിൽ പ്രവാസി ചിട്ടിയുള്ള രാജ്യങ്ങൾ

നിലവിൽ താഴെ പറയുന്ന രാജ്യങ്ങളില്‍ നിന്നുളളവര്‍ക്ക് മാത്രമായിരുന്നു ചിട്ടിയില്‍ ചേരാന്‍ അവസരമുണ്ടായിരുന്നത്.

• യുഎഇ
• ‌കുവൈറ്റ്
• ഒമാന്‍
• ബഹ്റൈന്‍



വൻ ലാഭം

2018 നവംബര്‍ 23 നാണ് പ്രവാസി ചിട്ടി ലേലം ആരംഭിച്ചത്. അഞ്ച് മാസം കൊണ്ട് 6.22 കോടി രൂപയുടെ പ്രതിമാസ ചിട്ടി ബിസിനസാണ് കെഎസ്എഫ്ഇ നേടിയെടുത്തത്. ഒരു കെഎസ്എഫ്ഇ ശാഖ ശരാശരി മൂന്നോ നാലോ വർഷങ്ങൾ കൊണ്ട് കൈവരിക്കുന്ന നേട്ടമാണ് പ്രവാസി ചിട്ടിയിലൂടെ വെറും അഞ്ച് മാസങ്ങൾ കൊണ്ട് നേടിയെടുത്തത്.



യൂറോപ്പിൽ മേയ് 17 മുതൽ

മേയ് 17 ന് കിഫ്ബിയുടെ മസാല ബോണ്ടുമായി ബന്ധപ്പെട്ട് ലണ്ടന്‍ സ്റ്റോക്ക് എക്സ്ചേഞ്ചില്‍ വച്ച് നടക്കുന്ന ചടങ്ങിന് ശേഷം മുഖ്യമന്ത്രി, ധനമന്ത്രി തോമസ് ഐസകിന്‍റെ സാന്നിധ്യത്തില്‍ യൂറോപ്യന്‍ പ്രവാസികള്‍ക്കായി പ്രവാസി ചിട്ടി സമര്‍പ്പിക്കും.



സുരക്ഷിതത്വം ഉറപ്പ്

കെ.എസ്.എഫ്.ഇ ചിട്ടിക്ക് സര്‍ക്കാരിന്‍െറ ഗ്യാരണ്ടിയും സുരക്ഷിതത്വവുമുണ്ട്. അതുകൊണ്ട് പ്രവാസികള്‍ക്ക് ധൈര്യത്തോടെ ചിട്ടിയിൽ ചേരാം. സമ്പൂർണ കോർ ബാങ്കിങ് വന്നതോടെ ഇടപാടുകാർക്ക് ഏതു ശാഖയിൽ ചെന്നാലും പണം അടയ്ക്കാനാകും.



നിക്ഷേപ പരിധി

ചിട്ടിയിൽ മാസം രണ്ടര ലക്ഷം രൂപ വരെ നിക്ഷേപിക്കാൻ സാധിക്കും. കൂടാതെ ചിട്ടിയിൽ ചേരുന്നവർക്ക് പ്രത്യേക ഇൻഷുറൻസ്, പെൻഷൻ സ്കീം എന്നിവ ഏർപ്പെടുത്തിയിട്ടുണ്ട്. 3000 മുതൽ 25,000 രൂപ വരെയാണ് പ്രവാസി ചിട്ടിയുടെ മാസത്തവണ. കാലാവധി 30 മുതൽ 60 മാസം വരെയും. ചിട്ടിയിൽ ചേർന്ന ശേഷം വിദേശത്തുനിന്ന് മടങ്ങേണ്ടി വന്നാലും പ്രവാസിച്ചിട്ടിയിൽ തുടരാം.



ആദ്യ വര്‍ഷം ഒരുലക്ഷം പേ‍ർ

ആദ്യ വര്‍ഷം തന്നെ ഒരു ലക്ഷം പേരെ പ്രവാസി ചിട്ടിയില്‍ ചേര്‍ക്കാനാകുമെന്നാണ് സര്‍ക്കാര്‍ പ്രതീക്ഷ. പ്രവാസികള്‍ മാസത്തവണയായി അടക്കുന്ന പണം മുഴുവന്‍ അപ്പപ്പോള്‍ കെ.എസ്.എഫ്.ഇയുടെ പേരില്‍ കിഫ്ബിയുടെ പ്രവാസി ബോണ്ടുകളില്‍ സ്വമേധയാ നിക്ഷേപിക്കപ്പെടും. ചിട്ടി പിടിക്കുമ്പോഴോ നറുക്കുവീണ പണം പിന്‍വലിക്കുമ്പോഴോ ആവശ്യമുള്ള പണം പിന്‍വലിക്കാന്‍ കെഎസ്എഫ്ഇക്ക് കോള്‍ ഓപ്ഷന്‍ ഉണ്ട്



മറ്റ് സവിശേഷതകൾ

പ്രവാസി ചിട്ടിയുടെ മറ്റ് സവിശേഷതകൾ താഴെ പറയുന്നവയാണ്


• പ്രവാസികൾക്ക് സൗജന്യ ഇൻഷുറൻസ് പരിരക്ഷ
• പൂർണമായും ഓൺലൈനിൽ ഉള്ള പ്രവർത്തനം
• 24 മണിക്കൂറും പ്രവർത്തനസജ്ജമായ കോൾസെന്റർ