ഭീം ആപ്പ് ഉപഭോക്താക്കളുടെ ആധാർ കാർഡ്, ബാങ്ക് വിശദാംശങ്ങൾ അടക്കം ചോർന്നതായി റിപ്പോർട്ട്

മൊബൈൽ പേയ്‌മെന്റ് ആപ്ലിക്കേഷനായ ഭീം ആപ്പ് ഉപഭോക്താക്കളുടെ വിവരങ്ങൾ ചോർന്നതായി റിപ്പോർട്ട്. ഇന്ത്യയിലെ 7 ദശലക്ഷത്തിലധികം ഉപയോക്താക്കളുടെ വ്യക്തിഗത വിവരങ്ങൾ ചോർന്നതായാണ് ഇസ്രായേലി സൈബർ സുരക്ഷ വെബ്‌സൈറ്റായ വിപിഎൻമെന്റർ റിപ്പോർട്ട് ചെയ്തിരിക്കുന്നത്. 409 ജിഗാബൈറ്റ് ഡാറ്റാ ചോർച്ചയിൽ വ്യക്തികളുടെ തിരിച്ചറിയാൻ കഴിയുന്ന വിവരങ്ങളായ ആധാർ കാർഡ് വിശദാംശങ്ങൾ, ജാതി സർട്ടിഫിക്കറ്റുകൾ, മേൽവിലാസ തെളിവുകൾ, ബാങ്ക് റെക്കോർഡുകൾ എന്നിവയും വ്യക്തികളുടെ പൂർണ്ണമായ പ്രൊഫൈലും ഉൾപ്പെടെയുണ്ടെന്നാണ് വിവരം.

ഓൺലൈൻ തട്ടിപ്പുകാരെ സൂക്ഷിക്കുക

വിപിഎൻമെന്റർ കണ്ടെത്തലുകൾ അനുസരിച്ച്, ഉപയോക്താക്കളെയും ബിസിനസ്സ് വ്യാപാരികളെയും സൈൻ അപ്പ് ചെയ്യാൻ പ്രേരിപ്പിക്കുന്നതിനുള്ള ഒരു കാമ്പെയ്‌നിൽ ഭീം വെബ്‌സൈറ്റ് ഉപയോഗിച്ചിരുന്നു. ഇതിൽ നിന്ന് 2019 ഫെബ്രുവരി മുതലുള്ള ഉപഭോക്താക്കളുടെ വിവരങ്ങൾ ചോർന്നതായാണ് റിപ്പോർട്ട്. പുറത്തായ ഡാറ്റയുടെ അളവ് വളരെ വലുതാണെന്നും. ഇത് ഇന്ത്യയിലുടനീളമുള്ള ദശലക്ഷക്കണക്കിന് ആളുകളെ ബാധിക്കുകയും മോഷണം, ഹാക്കിംഗ് തുടങ്ങിയ തട്ടിപ്പുകൾക്ക് ഉപഭോക്താക്കൾ ഇരയാകേണ്ടി വന്നേക്കാമെന്നും റിപ്പോർട്ടിൽ പറയുന്നു.

നഷ്ടപ്പെട്ട വിവരങ്ങൾ

യു‌പി‌ഐ ഐഡികൾ‌, ഡോക്യുമെൻറ് സ്കാനുകൾ‌ എന്നിവയും അതിലേറെ വിലപ്പെട്ട സ്വകാര്യ വിവരങ്ങളും ചോർന്നതിനാൽ ഈ പിഴവ് ഉപഭോക്താക്കളെ ആഴത്തിൽ ബാധിക്കുമെന്നാണ് വിപിഎൻമെന്ററിന്റെ റിപ്പോർട്ട്. ദശലക്ഷക്കണക്കിന് ഉപയോക്താക്കളുടെ അക്കൌണ്ട് വിവരങ്ങൾക്കൊപ്പം ഒരു ബാങ്കിന്റെ മുഴുവൻ വിവരങ്ങളും ചോർന്നതിന് സമമാണ് ഭീം ഉപഭോക്തൃ ഡേറ്റ നഷ്ട്ടപ്പെട്ടതിലൂടെ ഉണ്ടായിരിക്കുന്നതെന്നും വിപിഎൻ‌മെൻററിലെ സൈബർ സുരക്ഷ ഗവേഷകരായ നോം റോട്ടം, റാൻ ലോക്കർ എന്നിവർ പറഞ്ഞു.

ഭീം ആപ്പ്

ഏപ്രിലിൽ റിപ്പോർട്ട് ചെയ്ത ഈ പിഴവ് കഴിഞ്ഞ മാസം അവസാനത്തോടെയാണ് പരിഹരിച്ചത്. എന്നാൽ ഇക്കാര്യം സംബന്ധിച്ച് ഇന്ത്യൻ കമ്പ്യൂട്ടർ എമർജൻസി റെസ്‌പോൺസ് ടീം (സി‌ആർ‌ടി-ഇൻ), നാഷണൽ പേയ്‌മെന്റ്സ് കോർപ്പറേഷൻ ഓഫ് ഇന്ത്യ (എൻ‌പി‌സി‌ഐ) എന്നിവ ഇതുവരെ പ്രതികരിച്ചിട്ടില്ല. 2016 ൽ ആരംഭിച്ച ആപ്ലിക്കേഷൻ 2020 ഫെബ്രുവരിയിലെ കണക്കനുസരിച്ച് 18.4 ദശലക്ഷത്തിലധികം ഇടപാടുകൾ നടത്തിയതായാണ് റിപ്പോർട്ടുകൾ. ഇന്ത്യൻ സർക്കാരുമായി ചേർന്ന് സി‌എസ്‌സി ഇ-ഗവേണൻസ് സർവീസസ് ആണ് ഭീം വെബ്സൈറ്റ് വികസിപ്പിച്ചെടുത്തത്.