പുതുവർഷത്തിലും സ്വർണം തിളങ്ങും, വില 63,000 രൂപ വരെ ഉയരാൻ സാധ്യത

സാമ്പത്തിക അനിശ്ചിത കാലത്ത് നിക്ഷേപം നടത്തുന്നതിനുള്ള സുരക്ഷിത താവളമായി എല്ലായ്പ്പോഴും കണക്കാക്കപ്പെടുന്നത് സ്വർണത്തെയാണ്. അടുത്ത വർഷം സ്വർണ വില 10 ഗ്രാമിന് 63,000 രൂപയായി ഉയരാൻ സാധ്യതയുണ്ടെന്ന് സാമ്പത്തിക വിദ​ഗ്ധർ പറയുന്നു. പുതിയ ഉത്തേജക നടപടികളുടെ പ്രതീക്ഷയും അമേരിക്കൻ ഡോളറിന്റെ ഇടിവുമാണ് ഇത്തരത്തിലൊരു വിലയിരുത്തലിന് കാരണം.

ഓ​ഗസ്റ്റിലെ സ്വ‌‍ർണ വില

2020 ൽ കൊറോണ വൈറസ് മഹാമാരി മൂലമുണ്ടായ സാമ്പത്തികവും സാമൂഹികവുമായ അനിശ്ചിതത്വങ്ങൾ സ്വർണ്ണത്തെ ഒരു സുരക്ഷിത താവളമാക്കി മാറ്റിയിരുന്നു. സ്വർണത്തിന്റെ വില ഓഗസ്റ്റിൽ എം‌സി‌എക്‌സിൽ 10 ഗ്രാമിന് 56,191 രൂപയും അന്താരാഷ്ട്ര വിപണിയിൽ ഔൺസിന് 2,075 ഡോളറുമായി ഉയ‍ർന്നിരുന്നു.

സാമ്പത്തിക ഉത്തേജനം

സാമ്പത്തിക ഉത്തേജനം ആഭ്യന്തര വിപണിയിൽ സ്വർണ നിക്ഷേപം കുത്തനെ ഉയരാൻ കാരണമായി. കൊറോണ വൈറസ് വാക്സിൻ സാധ്യത ഉണ്ടായിരുന്നിട്ടും നിലവിൽ സ്വർണ വില ഉയരുകയാണ്. കൂടുതൽ സാമ്പത്തിക ഉത്തേജനം ഡോളർ ദുർബലമാക്കുകയും സ്വർണ്ണ വില വീണ്ടും ഉയരാൻ സഹായിക്കുകയും ചെയ്യും.

2021ൽ സ്വർണ വില എങ്ങോട്ട്?

സ്വർണ വില 2021 ൽ 60,000 രൂപ അല്ലെങ്കിൽ 2,200 യുഎസ് ഡോളർ വരെ ഉയരാൻ സാധ്യതയുള്ളതായി നിരീക്ഷക‍ർ അഭിപ്രായപ്പെട്ടു. സാമ്പത്തിക പ്രവർത്തനങ്ങളുടെ പുനരുജ്ജീവനത്തിന്റെ വേഗതയും തൊഴിൽ വിപണിയിലെ വളർച്ചയും ഉയർന്ന അളവിലുള്ള ഉത്തേജക നടപടികളും സ്വർണ്ണ വിലയുടെ പ്രേരക ഘടകങ്ങളായി തുടരുമെന്നും വിശകല വിദ​ഗ്ധ‍ർ കൂട്ടിച്ചേർത്തു.

ഡിമാൻഡ് ഇടിവ്

ലോക്ക്ഡൗൺ കാരണം ഉയർന്ന വിലയും ലോജിസ്റ്റിക്കൽ പ്രശ്നങ്ങളും എല്ലാ ഉപഭോഗ വിപണികളിലെയും ഉപഭോക്തൃ ആവശ്യത്തെ ബാധിച്ചുവെന്ന് വേൾഡ് ഗോൾഡ് കൗൺസിൽ മാനേജിംഗ് ഡയറക്ടർ (ഇന്ത്യ) സോമസുന്ദരം പി ആർ പറഞ്ഞു. സെപ്റ്റംബർ പാദം വരെ ഇന്ത്യയിൽ ഡിമാൻഡ് 49 ശതമാനം കുറഞ്ഞു. ഡബ്ല്യുജിസിയുടെ ഡാറ്റാ സീരീസിലെ ഏറ്റവും താഴ്ന്ന നിരക്കാണിത്.

ആവശ്യക്കാ‍ർ കുറഞ്ഞു

ഒക്ടോബർ-ഡിസംബർ പാദത്തിൽ വിലകൾ കുറഞ്ഞതും, ലോക്ക്ഡൗൺ ഇളവുകൾ വരുത്തിയതും, വിവാഹങ്ങൾ പോലുള്ള സാമൂഹിക അവസരങ്ങളുടെ വർദ്ധനവും കാരണം ഡിമാൻഡ് വീണ്ടെടുക്കൽ ഉണ്ടായിരുന്നിട്ടും, 2020 ൽ സ്വർണ്ണത്തിന്റെ ആവശ്യം 2019 നേക്കാൾ കുറവാണ്.