വായ്പാ, നിക്ഷേപ പലിശ നിരക്കുകള്‍ കുറച്ച് എസ്ബിഐ

ഇന്ത്യയിലെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ), വായ്പ-നിക്ഷേപ നിരക്കുകള്‍ വെട്ടിക്കുറച്ചു. ബാഹ്യ ബെഞ്ച്മാര്‍ക്കുകളുമായി ബന്ധപ്പെടുത്തിയിരിക്കുന്ന പലിശനിരക്ക് 75 ബേസിസ് പോയിന്റുകള്‍ (ബിപിഎസ്) എസ്ബിഐ കുറച്ചു. കൂടാതെ, ബാങ്ക് നിക്ഷേപങ്ങളുടെ പലിശ നിരക്കില്‍ 20 മുതല്‍ 100 ബേസിസ് പോയിന്റ് വരെയും കുറവ് വരുത്തിയിട്ടുണ്ട്. ആര്‍ബിഐ റിപ്പോ നിരക്കുകള്‍ കുറച്ച് തൊട്ടുപിന്നാലെയാണ് എസ്ബിഐ പലിശനിരക്ക് വെട്ടിക്കുറച്ചതെന്നതും ശ്രദ്ധേയം.

ബാഹ്യ ബെഞ്ച്മാര്‍ക്ക് അധിഷ്ഠിത വായ്പ നിരക്ക് (ഇബിആര്‍) 7.05 ശതമാനവും റിപ്പോ അധിഷ്ഠിത വായ്പ നിരക്ക് 6.65 ശതമാനവുമായി നിലകൊള്ളും. ഏപ്രില്‍ ഒന്നു മുതലായിരിക്കും പുതിയ നിരക്കുകള്‍ പ്രാബല്യത്തില്‍ വരികയെന്ന് സ്റ്റേറ്റ് ബാങ്ക് ഓഫ് ഇന്ത്യ അറിയിച്ചു. ട്രാന്‍സ്മിഷന്‍ വേഗത്തിലാക്കാന്‍ കഴിഞ്ഞ ഒക്ടോബര്‍ മുതലാണ് റിസര്‍വ് ബാങ്ക് ഓഫ് ഇന്ത്യ ബാഹ്യ ബെഞ്ച്മാര്‍ക്ക് വായ്പ നിരക്കുകള്‍ അവതരിപ്പിച്ചത്. പുതിയ വെട്ടിക്കുറവിനെത്തുടര്‍ന്ന്, പ്രസ്തുത പലിശ നിരക്ക് വ്യവസ്ഥയിലുള്ള 30 വര്‍ഷത്തെ ഭവനവായ്പയ്ക്ക് തുല്യമായ പ്രതിമാസ തവണകള്‍ (ഇഎംഐ) ഒരു ലക്ഷത്തിന് 52 രൂപയോളം വിലകുറഞ്ഞവയായിരിക്കും. അതേസമയം, റീട്ടെയില്‍ ടേം നിക്ഷേപ പലിശനിരക്കും എസ്ബിഐ കുറച്ചിട്ടുണ്ട്. 20 മുതല്‍ 50 ബിപിഎസ് വരെയാവും റീട്ടെയില്‍ ടേം നിക്ഷേപ പലിശനിരക്കില്‍ കുറവ് വരിക.

ഇതിനുപുറമെ, ബള്‍ക്ക് ടേം നിക്ഷേപ നിരക്കിലും ബാങ്ക് കുറവ് വരുത്തിയിട്ടുണ്ട്. 50 മുതല്‍ 100 ബിപിഎസ് വരെയാണ് ബള്‍ക്ക് ടേം നിക്ഷേപ നിരക്കില്‍ വരുത്തിയ കുറവ്. മാര്‍ച്ച് 28 മുതലാവും ഈ നിരക്കുകള്‍ പ്രാബല്യത്തില്‍ വരിക. അസറ്റ് ലയബിലിറ്റി കമ്മിറ്റി (ALCO) ഏപ്രിലില്‍ യോഗം ചേരുമ്പോള്‍, ഫണ്ട് അധിഷ്ഠിത വായ്പാ നിരക്ക് (എംസിഎല്‍ആര്‍) സംബന്ധിച്ച തീരുമാനം എടുക്കുമെന്ന് സ്റ്റേറ്റ് ബാങ്ക് ഓഫ് ഇന്ത്യ അറിയിച്ചു. ഈ മാസത്തിന്റെ തുടക്കത്തില്‍ ഫണ്ട് അധിഷ്ഠിത വായ്പാ നിരക്ക് എസ്ബിഐ കുറച്ചിരുന്നു. 15 ബേസിസ് പോയിന്റ് കുറച്ചതിന് ശേഷമുള്ള പുതിയ എംസിഎല്‍ആര്‍ നിരക്ക് മാര്‍ച്ച് 10 -ഓടെ പ്രാബല്യത്തില്‍ വരികയുണ്ടായി. നേരത്തെ, എസ്ബിഐയുടെ ഒരു വര്‍ഷത്തെ എംസിഎല്‍ആര്‍ 10 ബേസിസ് പോയിന്റുകള്‍ കുറച്ച് 7.85 ശതമാനത്തില്‍ നിന്ന് 7.75 ശതമാനമാക്കിയിരുന്നു. നടപ്പ് സാമ്പത്തിക വര്‍ഷത്തില്‍ തുടര്‍ച്ചയായി പത്താം തവണയായിരുന്നു സ്‌റ്റേറ്റ് ബാങ്ക് ഓഫ് ഇന്ത്യ എംസിഎല്‍ആര്‍ വെട്ടിക്കുറച്ചത്.