കാശ് കൈയിൽ കൊണ്ടുനടക്കുന്നവർ സൂക്ഷിക്കുക! ഈ നിയമങ്ങൾ അറിഞ്ഞില്ലെങ്കിൽ പിടി വീഴും, പിഴ ഉറപ്പ്

ലോക ബാങ്കിന്റെ റിപ്പോർട്ട്

ലോക ബാങ്കിന്റെ റിപ്പോർട്ട് അനുസരിച്ച്, രാജ്യത്ത് ഏറ്റവും കൂടുതൽ ആളുകൾ നേരിട്ടുള്ള പണമിടപാട് രീതിയാണ് സ്വീകരിക്കുന്നത്. വളരെ ചെറിയ ശതമാനം ആളുകൾ മാത്രമാണ് ഡിജിറ്റൽ പണമിടപാടുകൾ നടത്തുന്നത്.

നിയമങ്ങൾ

കൈയിൽ കൊണ്ടു നടക്കാവുന്നതും ഇടപാടുകൾ നടത്താവുന്നതുമായ പണത്തിന് പരിമിതികളുണ്ട്. ഇവ സംബന്ധിച്ച് ചില നിയമങ്ങളും പാലിക്കണം. താഴെ പറയുന്നവയാണ് ആ നിയമങ്ങൾ.

രണ്ടു ലക്ഷം രൂപയ്ക്ക് മുകളിലുള്ള പണമിടപാട്

ആദായ നികുതി നിയമത്തിലെ സെക്ഷൻ 269ST പ്രകാരം ഒരു ഇടപാടോ അല്ലെങ്കിൽ ഒന്നിലധികം ഇടപാടുകളിലൂടെയോ ഒരു വ്യക്തിയിൽ നിന്ന് രണ്ടര ലക്ഷം രൂപയോ അതിൽ കൂടുതലോ പണമായി വാങ്ങുന്നത് നിരോധിച്ചിരിക്കുന്നു. ഈ നിയമം പാലിച്ചില്ലെങ്കിൽ കൈമാറുന്ന പണത്തിന് തുല്യമായ തുക പിഴയായി നൽകണം. ബാങ്കുകൾക്കും സർക്കാരിനും ഈ നിയമം ബാധകമല്ല. എന്നാൽ കമ്പനികൾ, വ്യക്തികൾ, പങ്കാളിത്തങ്ങൾ, ബിസിനസുകൾ മുതലായവയ്ക്ക് ഈ നിയമം ബാധകമാണ്.

10,000 രൂപയിൽ കൂടുതലുള്ള ഇടപാട്

ആദായ നികുതി നിയമത്തിലെ സെക്ഷൻ 40A (3) പ്രകാരം, ബിസിനസ്സിനോ തൊഴിലുകളിലോ ബന്ധപ്പെട്ട ചെലവുകൾക്കായി പ്രതിദിനം 10,000 രൂപയ്ക്ക് മുകളിൽ പണമടയ്ക്കുന്നത് നിരോധിച്ചിരിക്കുന്നു. ഈ പരിധിക്ക് മുകളിലുള്ള പണം അടച്ച ചെലവുകൾ ഒരു ബിസിനസ് അല്ലെങ്കിൽ തൊഴിൽ വരുമാനത്തിൽ നിന്നും കുറയ്ക്കില്ല.

20,000 രൂപയോ അതിൽ കൂടുതലോ ഉള്ള ഇടപാട്

ഇൻകം ടാക്സ് ആക്റ്റിലെ 269 എസ് എസ് അനുസരിച്ച് 20,000 രൂപയോ അതിൽ കൂടുതലോ ഒരു വ്യക്തിക്ക് മറ്റൊരു വ്യക്തിയിൽ നിന്ന് വായ്പയായോ നിക്ഷേപമായോ മറ്റേതെങ്കിലും തരത്തിലോ പണമായി സ്വീകരിക്കാൻ കഴിയില്ല. ഈ നിയമം ലംഘിച്ചാൽ സ്വീകർത്താവിന് ലഭിക്കുന്ന പണത്തിന് തുല്യമായ തുക പിഴയായി നൽകണം. കൂടാതെ 2 വർഷം വരെ തടവും ലഭിച്ചേക്കാം.

2,000 രൂപയ്ക്കു മുകളിലുള്ള സംഭാവനകൾ

ഇൻകം ടാക്സ് ആക്ടിന്റെ സെക്ഷൻ 80G, 80GGC പ്രകാരം, 2,000 രൂപയിൽ കൂടുതൽ എൻജിഒയോകൾക്കോ ചാരിറ്റബിൾ ഓർഗനൈസേഷനോ നൽകുന്നത് ടാക്സ് ഡിഡക്ഷന് ബാധകമല്ല. രജിസ്റ്റർ ചെയ്ത ട്രസ്റ്റുകൾക്കോ രാഷ്ട്രീയ പാർട്ടികൾക്കോ 2,000 രൂപയോ അതിൽ കൂടുതലോ പണമായി നൽകുന്നതും നിരോധിച്ചിരിക്കുകയാണ്.