പേഴ്സണൽ ലോൺ എളുപ്പത്തിൽ നേടാം? ശ്രദ്ധിക്കേണ്ട ചില കാര്യങ്ങൾ

ശമ്പളക്കാരായ വ്യക്തികൾക്ക് കടം നൽകാൻ ധനകാര്യ സ്ഥാപനങ്ങൾ മടി കാട്ടാറില്ല. ഓൺലൈനിലൂടെ വായ്പ ലഭ്യമാക്കുന്ന പ്ലാറ്റ്‌ഫോമുകളുടെ വരവോടെ ശമ്പളം വാങ്ങുന്ന ജീവനക്കാർക്ക് വ്യക്തിഗത വായ്പയ്ക്ക് അപേക്ഷിക്കുന്നത് വളരെ എളുപ്പമുള്ളതായി മാറിയിട്ടുണ്ട്. മെഡിക്കൽ എമർജൻസി, വീട് പുതുക്കൽ അല്ലെങ്കിൽ കല്യാണം തുടങ്ങിയ ആവശ്യങ്ങൾ നിറവേറ്റാൻ പേഴ്സണൽ ലോൺ പലരെയും സഹായിക്കുന്നുണ്ട്.

പിഎഫിൽ പണം നിക്ഷേപിക്കുന്നുണ്ടോ? 40 വർഷത്തെ ജോലിക്ക് ശേഷം നിങ്ങൾക്ക് എത്ര തുക ലഭിക്കും?

ഇന്ത്യയിൽ പേഴ്സണൽ ലോണിന് അപേക്ഷിക്കാൻ എളുപ്പമാണ്. ബാങ്കിന്റെ ഓൺലൈൻ പോർട്ടലോ, മൊബൈൽ ആപ്പോ, നെറ്റ് ബാങ്കിങ് വഴിയോ ലോണിന് അപേക്ഷിക്കാം. ഇതുകൂടാതെ ബാങ്കിൽ നേരിട്ട് എത്തിയും ലോണിന് അപേക്ഷിക്കാം. പേഴ്സണൽ ലോണിന് അപേക്ഷിക്കുന്നതിനു മുൻപ് ശ്രദ്ധിക്കേണ്ട ചില കാര്യങ്ങളുണ്ട്.

യോഗ്യത മനസിലാക്കുക

പേഴ്സണൽ ലോണിന് അപേക്ഷിക്കുന്നതിനു മുൻപ് നിങ്ങളുടെ യോഗ്യത മാനദണ്ഡം മനസിലാക്കുക. അപേക്ഷകന്റെ പ്രായം, വരുമാനം, ക്രെഡിറ്റ് സ്കോർ, തൊഴിൽ എന്നിവ പരിശോധിച്ചാണ് യോഗ്യത നിർണയിക്കുന്നത്. ഉയർന്ന ക്രെഡിറ്റ് സ്കോർ ഉണ്ടെങ്കിൽ എളുപ്പത്തിൽ ലോൺ നേടിയെടുക്കാൻ സാധിക്കും.

പലിശ നിരക്ക്

വിവിധ ബാങ്കുകളിലെ പലിശ നിരക്കുകൾ താരതമ്യപ്പെടുത്തുക. ക്രെഡിറ്റ് സ്കോർ, വരുമാനം, തൊഴിൽ, വായ്പ നൽകുന്നയാളുടെ നയങ്ങൾ എന്നിവയാണ് പലിശ നിരക്കിനെ സ്വാധീനിക്കുന്നവ. എപ്പോഴും പലിശ നിരക്ക് കുറഞ്ഞ ബാങ്കുകളെ പേഴ്സണൽ ലോണുകൾക്കായി സമീപിക്കുക.

കാലാവധി

ലോൺ കാലാവധി എപ്പോഴും മനസിലാക്കുക. സാധാരണയായി 60 മാസം വരെയാണ് പേഴ്സൺ ലോണുകളുടെ കാലാവധി. നിങ്ങളുടെ പ്രതിമാസ ബജറ്റ് താളം തെറ്റിക്കാത്ത തരത്തിൽ ലോൺ കാലാവധി തിരഞ്ഞെടുക്കുക. ലോൺ കാലാവധി കൂട്ടുന്നത് പ്രതിമാസ തിരിച്ചടവ് കുറയ്ക്കുമെങ്കിലും പലിശ ഇനത്തിൽ കൂടുതൽ തുക അടയ്ക്കേണ്ടതായി വരാം.

ജോലി മാറുന്നത് പേഴ്സണൽ ലോണിനെ ബാധിക്കുന്നത് എങ്ങനെ? ശ്രദ്ധിക്കേണ്ട കാര്യങ്ങൾ

ക്രെഡിറ്റ് സ്കോർ

പേഴ്സണൽ ലോണിന് അപേക്ഷിക്കുമ്പോൾ പരിഗണിക്കപ്പെടുന്ന പ്രധാന ഘടകങ്ങളിൽ ഒന്നാണ് ക്രെഡിറ്റ് സ്കോർ. ലോണിന്റെ യോഗ്യത, പലിശ നിരക്ക് എന്നിവ നിർണയിക്കാൻ ബാങ്കുകൾ അപേക്ഷകന്റെ ക്രെഡിറ്റ് സ്കോർ പരിഗണിക്കാറുണ്ട്. ഉയർന്ന ക്രെഡിറ്റ് സ്കോർ ഉണ്ടെങ്കിൽ, കുറഞ്ഞ പലിശ നിരക്കിൽ ലോൺ ലഭിച്ചേക്കാം.

ചാർജുകൾ

ബാങ്കുകളുടെ ഫീസും ചാർജുകളും അപേക്ഷകൻ മനസിലാക്കണം. പ്രോസസിംഗ് ഫീ, പ്രീ ക്ലോഷർ ഫീ, പ്രീ പേയ്‌മെന്റ് ഫീ തുടങ്ങി വിവിധ ഫീസുകളാണ് ബാങ്കുകൾ ഈടാക്കുന്നത്. എന്തെങ്കിലും മറഞ്ഞിരിക്കുന്ന ചാർജുകളോ ലേറ്റ് പേയ്‌മെന്റ് ഫീകളോ വാർഷിക ഫീസോ ഉണ്ടോയെന്നും പരിശോധിച്ച് ഉറപ്പാക്കുക.