എസ്‌ബി‌ഐ ലോക്കറിൽ സ്വർണം സൂക്ഷിക്കുന്നവരുടെ ശ്രദ്ധയ്ക്ക്, ബാങ്കിന്റെ ചാർജുകൾ ഇങ്ങനെ

എസ്ബിഐ ലോക്കർ

രാജ്യത്തെ മുൻനിര ബാങ്കായ സ്റ്റേറ്റ് ബാങ്ക് ഓഫ് ഇന്ത്യ (എസ്‌ബി‌ഐ) മാർച്ച് 31 മുതൽ ഇന്ത്യയിലുടനീളമുള്ള സുരക്ഷിത നിക്ഷേപ ലോക്കറുകൾക്കുള്ള വാടക ചാർജ് ഉയർത്തിയിരുന്നു. അർദ്ധ നഗര, ഗ്രാമപ്രദേശങ്ങളിൽ എസ്‌ബി‌ഐ ശാഖകൾ വിലകുറഞ്ഞ ലോക്കർ സേവനങ്ങൾ വാഗ്ദാനം ചെയ്യുന്നുണ്ട്. എസ്‌ബി‌ഐ വാഗ്ദാനം ചെയ്യുന്ന വിവിധ വലിപ്പത്തിലുള്ള ലോക്കറുകളുടെ നിരക്കുകൾ ഇതാ:

ചെറിയ ലോക്കറിന്റെ വാടക

• നഗരങ്ങളിലും മെട്രോയിലും: 2000 രൂപ + ജിഎസ്ടി
• ഗ്രാമീണ, അർദ്ധ നഗരങ്ങൾ: 1500 രൂപ + ജിഎസ്ടി

മീഡിയം ലോക്കർ വാടക നിരക്കുകൾ

• നഗരങ്ങളിലും മെട്രോയിലും: 4000 രൂപ + ജിഎസ്ടി
• ഗ്രാമീണ, അർദ്ധ നഗരങ്ങൾ: 3000 രൂപ + ജിഎസ്ടി

വലിയ ലോക്കറിന്റെ വാടക നിരക്കുകൾ

• നഗരങ്ങളിലും മെട്രോയിലും: 8000 രൂപ + ജിഎസ്ടി
• ഗ്രാമീണ, അർദ്ധ നഗരങ്ങൾ: 6000 രൂപ + ജിഎസ്ടി

എക്സ്ട്രാ ലാർജ് ലോക്കർ വാടക

• നഗരങ്ങളിലും മെട്രോയിലും: 12000 രൂപ + ജിഎസ്ടി
• ഗ്രാമീണ, അർദ്ധ നഗരങ്ങൾ: 9000 രൂപ + ജിഎസ്ടി

ഒറ്റത്തവണ ലോക്കർ രജിസ്ട്രേഷൻ നിരക്ക്

ചെറുതും ഇടത്തരവുമായ ലോക്കറുകൾക്ക് എസ്‌ബി‌ഐ ഒറ്റത്തവണ ലോക്കർ രജിസ്ട്രേഷൻ ചാർജായ 500 രൂപയും ജിഎസ്ടിയും ചുമത്തും. അതേസമയം വലുതും എക്സട്രാ ലാർജുമായ ലോക്കറുകൾക്ക് 1,000 രൂപയും ജിഎസ്ടിയും നൽകണം.

ലോക്കർ സന്ദർശന നിരക്കുകൾ

എല്ലാ ലോക്കർ വലുപ്പങ്ങൾക്കും എസ്‌ബി‌ഐ 12 സന്ദർശനങ്ങൾ സൌജന്യമായി വാഗ്ദാനം ചെയ്യുന്നുണ്ട്. അതിനുശേഷം, ഓരോ സന്ദർശനത്തിനും ബാങ്ക് 100 രൂപയും ജിഎസ്ടിയും ഈടാക്കും. റിസർവ് ബാങ്ക് ഓഫ് ഇന്ത്യ (ആർ‌ബി‌ഐ) ചട്ടമനുസരിച്ച്, നിങ്ങൾ വർഷത്തിൽ ഒരിക്കലെങ്കിലും ലോക്കർ പ്രവർത്തിപ്പിച്ചിട്ടില്ലെങ്കിൽ നിങ്ങളുടെ ലോക്കർ തുറക്കാൻ ബാങ്കുകൾക്ക് അനുവാദമുണ്ട്. എന്നാൽ അതിന് മുമ്പ് ലോക്കർ തുറക്കാൻ ആവശ്യപ്പെട്ട് ബാങ്കുകൾ നിങ്ങൾക്ക് ഒരു അറിയിപ്പ് അയയ്‌ക്കേണ്ടതുണ്ട്.