സ്കൂൾ അഡ്മിഷന് കുട്ടികൾക്ക് ആധാർ കാർഡ് നിർബന്ധമാണോ? അറിയേണ്ട കാര്യങ്ങൾ

പ്രവേശന സമയത്ത് മിക്ക സ്കൂളുകളും കുട്ടികളുടെ ആധാർ കാർഡ് ആവശ്യപ്പെടാറുണ്ട്. സാധാരണയായി, നഴ്സറി പ്രവേശനത്തിനുള്ള അപേക്ഷാ സമയം എല്ലാ വർഷവും ഡിസംബറിൽ അവസാനിക്കുകയും പ്രവേശനം ജനുവരി മധ്യത്തിൽ ആരംഭിക്കുകയും ചെയ്യും. ഈ സമയത്തെ തിരക്ക് ഒഴിവാക്കാനായി നിങ്ങൾ കുട്ടികളുടെ ആധാർ എടുത്തിട്ടില്ലെങ്കിൽ ഇത് എത്രയും വേഗം ചെയ്യുന്നതാണ് നല്ലത്.

അറിയേണ്ട കാര്യങ്ങൾ

ഏത് പ്രായത്തിലുള്ളവർക്കും ആധാറിനായി അപേക്ഷിക്കാം. ജനിച്ച് ദിവസങ്ങൾ മാത്രമായ കുട്ടികൾക്ക് വരെ ആധാറിനായി അപേക്ഷിക്കാം. നിങ്ങളുടെ കുട്ടിയുടെ ആധാറിനായി അപേക്ഷിക്കുന്നതിന് നിങ്ങൾ അറിയേണ്ട മുഴുവൻ വിശദാംശങ്ങളും ഇതാ..

എൻറോൾ ചെയ്യുന്നതെങ്ങനെ?

ഒരു കുട്ടിക്ക് ആധാർ എടുക്കുന്ന പ്രക്രിയ മുതിർന്നയാൾക്ക് ആധാർ ലഭിക്കുന്നതിന് സമാനമാണ്. കുട്ടിക്കൊപ്പം മാതാപിതാക്കൾക്ക് അടുത്തുള്ള ആധാർ കെയർ സെന്റർ സന്ദർശിച്ച് ഫോം പൂരിപ്പിക്കാം. 5 വയസ്സിന് താഴെയുള്ള കുട്ടികൾക്ക് ബയോമെട്രിക്സ് എടുക്കില്ല. അവരുടെ മാതാപിതാക്കളുടെ ആധാർ നമ്പറുമായി ലിങ്ക് ചെയ്തിട്ടുള്ള ഡെമോഗ്രാഫിക് വിവരങ്ങളുടെയും ഫോട്ടോയുടെയും അടിസ്ഥാനത്തിലാണ് അവരുടെ യുഐഡി തയ്യാറാക്കുന്നത്.

ആധാറിൽ കുട്ടികളുടെ ബയോമെട്രിക് എങ്ങനെ അപ്‌ഡേറ്റ് ചെയ്യാം?

കുട്ടിക്ക് 5 വയസ്സിന് മുകളിലാണെങ്കിൽ, ആധാറിനായി അവരുടെ സ്വന്തം ബയോമെട്രിക്സ് എടുക്കണം. ഓരോ കുട്ടിക്കും 5 അല്ലെങ്കിൽ 15 വയസ്സ് തികയുമ്പോൾ പത്ത് വിരലുകൾ, കണ്ണുകളിലെ ഐറിസ്, ഫോട്ടോ എന്നിവ അടങ്ങുന്ന ബയോമെട്രിക്സ് അപ്ഡേറ്റ് ചെയ്യേണ്ടതാണ്. അപ്‌ഡേറ്റ് സൌജന്യമായി ചെയ്യാം.

കുട്ടിയുടെ ആധാറിനായി അപേക്ഷിക്കാൻ ആവശ്യമായ രേഖകൾ

നിങ്ങൾക്ക് കുട്ടിയുടെ ജനന സർട്ടിഫിക്കറ്റ് അല്ലെങ്കിൽ കുട്ടിയുടെ സ്കൂൾ ഫോട്ടോ ഐഡി കാർഡ്, കുട്ടിയുടെ മാതാപിതാക്കളുടെ ആധാർ കാർഡ് വിശദാംശങ്ങൾ, നിങ്ങളുടെ കുട്ടിയുടെ ആധാറിനായി അപേക്ഷിക്കുന്നതിന് കുട്ടിയുടെ മാതാപിതാക്കളുടെ വിലാസം, ഐഡി കാർഡ് എന്നിവയും ആവശ്യമാണ്.