കൊച്ചി: പഴയ 1000,500 രൂപ നോട്ടുകള്‍ മാറ്റാവുന്ന പരിധി 4500ല്‍ നിന്ന് 2000 രൂപയാക്കി കുറച്ചു. സാമ്പത്തിക കാര്യ സെക്രട്ടറി ശക്തികാന്ത് ദാസാണ് ഇക്കാര്യമറിയിച്ചത്. വിവാഹാവശ്യങ്ങള്‍ക്ക് രണ്ടര ലക്ഷം രൂപ വരെ അക്കൗണ്ടില്‍ നിന്ന് പിന്‍വലിക്കാമെന്നും അദ്ദേഹം അറിയിച്ചു.

കര്‍ഷകര്‍ക്ക് ഒരാഴ്ചയില്‍ 25,000 രൂപവരെ പിന്‍വലിക്കാം. എന്നാല്‍ അക്കൗണ്ട് കര്‍ഷകരുടെ പേരിലായിരിക്കണം.

കര്‍ഷക വായ്പ, ഇന്‍ഷുറന്‍സ് അടവിന് 15 ദിവസം കൂടി അനുവദിക്കും. രജിസ്‌ട്രേഷനുള്ള വ്യാപാരികള്‍ക്ക് 50,000രൂപ വരെ പിന്‍വലിക്കാം.

നോട്ട് പ്രതിസന്ധി രൂക്ഷമായതിനെത്തുടര്‍ന്ന് അവശ്യ സര്‍വീസുകള്‍ക്ക് പഴയ നോട്ടുകള്‍ നവംബര്‍ 24 വരെ ഉപയോഗിക്കാമെന്ന് കഴിഞ്ഞ ദിവസം ഉത്തരവിറക്കിയിരുന്നു. സര്‍ക്കാര്‍ ആശുപത്രികളിലും, പെട്രോള്‍ പമ്പുകളിലും പഴയ നോട്ട് സ്വീകരിക്കും.