2020ലെ ലോകത്തിലെ ഏറ്റവും ശക്തമായ പാസ്‌പോർട്ടുകൾ, 58 രാജ്യങ്ങളിൽ ഇന്ത്യക്കാർക്ക് വിസയില്ലാതെ പോകാം

2020ലെ ലോകത്തിലെ ഏറ്റവും ശക്തമായ പാസ്‌പോർട്ട് പട്ടികയിൽ ഇന്ത്യൻ പാസ്പോർട്ട് 84-ാം സ്ഥാനത്ത്. ഇന്ത്യൻ പാസ്‌പോർട്ടുള്ളവർക്ക് ലോകമെമ്പാടുമുള്ള 58 സ്ഥലങ്ങളിലേക്ക് വിസ ഇല്ലാതെ തന്നെ പോകാനാകുമെന്നും റിപ്പോർട്ട് വ്യക്തമാക്കുന്നു. ഇന്റർനാഷണൽ എയർ ട്രാൻസ്പോർട്ട് അസോസിയേഷന്റെ (ഐ‌എ‌ടി‌എ) ഡാറ്റയെ അടിസ്ഥാനമാക്കി പുറത്തിറക്കിയ പാസ്‌പോർട്ട് സൂചികയിലെ വിവരങ്ങളാണിത്. മുൻ‌കൂർ വിസയില്ലാതെ പാസ്‌പോർട്ട് ഉടമയ്ക്ക് പ്രവേശിക്കാൻ കഴിയുന്ന ലക്ഷ്യസ്ഥാനങ്ങളുടെ എണ്ണം അനുസരിച്ചാണ് രാജ്യങ്ങളെ റാങ്ക് ചെയ്യുന്നത്.

മുന്നിൽ ജപ്പാൻ

191 രാജ്യങ്ങളിലേക്ക് വിസ രഹിത പ്രവേശനം ലഭിക്കുന്ന ലോകത്തെ ഏറ്റവും ശക്തമായ പാസ്‌പോർട്ടിന്റെ പട്ടികയിൽ ഒന്നാം സ്ഥാനത്ത് ജപ്പാനാണ്. ഇന്ത്യയുടെ റാങ്ക് 2019 ൽ 82-ാം സ്ഥാനത്ത് നിന്ന് 2020 ൽ 84-ാം സ്ഥാനത്തേക്ക് താഴ്ന്നു.

ലോകത്തിലെ ഏറ്റവും ശക്തമായ 10 പാസ്പോർട്ടുകൾ

• ജപ്പാൻ: 191 രാജ്യങ്ങളിലേക്ക് വിസ രഹിത പ്രവേശനം
• സിംഗപ്പൂർ: 190 രാജ്യങ്ങൾ
• ജർമ്മനി, ദക്ഷിണ കൊറിയ: 189 രാജ്യങ്ങൾ
• ഫിൻ‌ലാൻ‌ഡ്, ഇറ്റലി: 188 രാജ്യങ്ങൾ
• ഡെൻമാർക്ക്, ലക്സംബർഗ്, സ്പെയിൻ: 187 രാജ്യങ്ങൾ
• ഫ്രാൻസ്, സ്വീഡൻ: 186 രാജ്യങ്ങൾ
• ഓസ്ട്രിയ, അയർലൻഡ്, നെതർലാന്റ്സ്, പോർച്ചുഗൽ, സ്വിറ്റ്സർലൻഡ്: 185 രാജ്യങ്ങൾ
• ബെൽജിയം, ഗ്രീസ്, നോർവേ, യുകെ, യുഎസ്എ: 184 രാജ്യങ്ങൾ
• ഓസ്‌ട്രേലിയ, കാനഡ, ചെക്ക് റിപ്പബ്ലിക്, മാൾട്ട, ന്യൂസിലാന്റ്: 183 രാജ്യങ്ങൾ
• ഹംഗറി, ലിത്വാനിയ, സ്ലൊവാക്യ: 181 രാജ്യങ്ങൾ

ഇന്ത്യയുടെ റാങ്കിംഗ്

ഇന്ത്യയുടെ പാസ്‌പോർട്ട് റാങ്കിംഗ് 2020 ൽ 2 സ്ഥാനങ്ങൾ പിന്നോട്ട് പോയി മൗറിറ്റാനിയ, താജിക്കിസ്ഥാൻ എന്നീ രാജ്യങ്ങൾക്ക് ഒപ്പം 84-ാം സ്ഥാനത്തെത്തി. 71-ാം സ്ഥാനത്തുള്ള ചൈനീസ് പാസ്‌പോർട്ട് ഇന്ത്യയേക്കാൾ ശക്തമാണ്. ഹെൻ‌ലി പാസ്‌പോർട്ട് സൂചിക 2020 ലെ റിപ്പോർട്ട് അനുസരിച്ച് അഫ്ഗാനിസ്ഥാന്റെ പാസ്‌പോർട്ടാണ് ലോകത്തിലെ ഏറ്റവും മോശം പാസ്‌പോർട്ട്.

വിസ ആവശ്യമില്ലാത്ത രാജ്യങ്ങൾ

ഭൂട്ടാൻ, കംബോഡിയ, ഇന്തോനേഷ്യ, മക്കാവോ, മാലിദ്വീപ്, മ്യാൻമർ, നേപ്പാൾ, ശ്രീലങ്ക, തായ്ലൻഡ്, കെനിയ, മൗറീഷ്യസ്, സീഷെൽസ്, സിംബാബ്‌വെ, ഉഗാണ്ട, ഇറാൻ, ഖത്തർ തുടങ്ങിയ 58 ലക്ഷ്യസ്ഥാനങ്ങളിലേക്ക് ഇന്ത്യൻ പാസ്‌പോർട്ട് ഉടമകൾക്ക് വിസയില്ലാതെ യാത്ര ചെയ്യാം. എന്നിരുന്നാലും, നിങ്ങൾക്ക് ചില രാജ്യങ്ങളിൽ വിസ ഓൺ-അറൈവൽ ആവശ്യമായി വന്നേക്കാം.

ലോകത്തിലെ ഏറ്റവും മോശം പാസ്‌പോർട്ടുകൾ

1. അഫ്ഗാനിസ്ഥാൻ: 26 രാജ്യങ്ങളിലേക്ക് വിസ രഹിത പ്രവേശനം
2. ഇറാഖ്: 28 രാജ്യങ്ങൾ
3. സിറിയ: 29 രാജ്യങ്ങൾ
4. പാകിസ്ഥാൻ, സൊമാലിയ: 32 രാജ്യങ്ങൾ
5. യെമൻ: 33 രാജ്യങ്ങൾ
6. ലിബിയ: 37 രാജ്യങ്ങൾ
7. നേപ്പാൾ, പലസ്തീൻ പ്രദേശം: 38 രാജ്യങ്ങൾ
8. ഉത്തര കൊറിയ, സുഡാൻ: 39 രാജ്യങ്ങൾ
9. കൊസോവോ, ലെബനൻ: 40 രാജ്യങ്ങൾ
10. ബംഗ്ലാദേശ്, കോംഗോ, എറിത്രിയ, ഇറാൻ: 41 രാജ്യങ്ങൾ