റിക്കറിം​ഗ് ഡിപ്പോസിറ്റിന് എസ്ബിഐ ആണോ പോസ്റ്റ് ഓഫീസ് ആണോ ബെസ്റ്റ്?

ശമ്പളക്കാരുടെയും ഇടത്തരം വരുമാനക്കാരുടെയും മികച്ച നിക്ഷേപ മാർ​ഗങ്ങളിൽ ഒന്നാണ് റിക്കറിം​ഗ് നിക്ഷേപം അഥവാ ആർ.ഡി. ഓരോ മാസവും ഒരു നിശ്ചിത തുകയാണ് ആർഡിയിലേയ്ക്ക് നിക്ഷേപിക്കേണ്ടത്. സ്റ്റേറ്റ് ബാങ്ക് ഓഫ് ഇന്ത്യയുടെയും പോസ്റ്റ് ഓഫീസിന്റെയും റിക്കറിം​ഗ് ഡിപ്പോസിറ്റുകളിൽ ഏതാണ് കൂടുതൽ ലാഭകരമെന്നും പ്രത്യകതകൾ എന്തൊക്കെയെന്നും പരിശോധിക്കാം.

നിക്ഷേപ തുക

എസ്ബിഐയിൽ റിക്കറിം​ഗ് ഡിപ്പോസിറ്റിൽ മിനിമം 100 രൂപ വീതമാണ് നിക്ഷേപം നടത്തേണ്ടത്. പരമാവധി തുകയ്ക്ക് ബാങ്ക് പരിധി നിശ്ചയിച്ചിട്ടില്ല. അഞ്ച് വർഷത്തെ പോസ്റ്റ് ഓഫീസ് റിക്കറിം​ഗ് ഡിപ്പോസിറ്റിന്റെ നിക്ഷേപ പരിധി അടുത്തിടെ ഉയർത്തിയിരുന്നു. പ്രതിമാസ നിക്ഷേപം 725 രൂപയായാണ് ഉയർത്തിയത്. മുമ്പ് മാസം 10 രൂപയായിരുന്നു ഏറ്റവും കുറ‍ഞ്ഞ നിക്ഷേപ തുക.

പലിശ നിരക്ക്

പോസ്റ്റ് ഓഫീസ് റിക്കറിം​ഗ് ഡിപ്പോസിറ്റിന്റെ നിലവിലെ പലിശ നിരക്ക് 7.3 ശതമാനമാണ്. എന്നാൽ എസ്ബിഐയുടെ റിക്കറിം​ഗ് ഡിപ്പോസിറ്റ് അല്ലെങ്കിൽ ആർഡി പലിശ നിരക്ക് സ്ഥിര നിക്ഷേപ പലിശ നിരക്കിന് തുല്യമാണ്. 6.85 ശതമാനമാണ് സാധാരണ പൗരന്മാർക്ക് എസ്ബിഐ വാ​ഗ്ദാനം ചെയ്യുന്ന കൂടിയ പലിശ നിരക്ക്. മുതിർന്ന പൗരന്മാർക്ക് പരമാവധി 7.35 ശതമാനം വരെ പലിശ ലഭിക്കും.

കാലാവധി

എസ്ബിഐ റിക്കറിം​ഗ് ഡിപ്പോസിറ്റിന്റെ മിനിമം കാലാവധി 12 മാസമാണ്. പരമാവധി കാലാവധി 120 മാസവും. അഞ്ച് വർഷമാണ് പോസ്റ്റ് ഓഫീസ് റിക്കറിം​ഗ് ഡിപ്പോസിറ്റിന്റെ കാലാവധി. പോസ്റ്റ് ഓഫീസ് റിക്കറിം​ഗ് ഡിപ്പോസിറ്റ് ക്യാഷ് അല്ലെങ്കിൽ ചെക്ക് ഉപയോ​ഗിച്ച് നിക്ഷേപം നടത്താം.

പിഴ

റിക്കറിം​ഗ് ഡിപ്പോസിറ്റ് നിക്ഷേപം മുടക്കിയാൽ എസ്ബിഐ പിഴ ഈടാക്കുന്നതാണ്. 5 വർഷ കാലാവധിയിൽ കുറവുള്ള നിക്ഷേപങ്ങൾക്ക് നൂറു രൂപയ്ക്ക് 1.5 രൂപ എന്ന നിരക്കിലാണ് ബാങ്ക് പിഴ ഈടാക്കുന്നത്. കാലാവധി 5 വർഷത്തിന് മുകളിലാണെങ്കിൽ പിഴ 100 രൂപയ്ക്ക് 2 രൂപ എന്ന നിലയ്ക്കാണ്. പോസ്റ്റ് ഓഫീസ് റിക്കറിം​ഗ് ഡിപ്പോസിറ്റ് അക്കൗണ്ട് തുടങ്ങി ഒരു വർഷം കഴിഞ്ഞാൽ 50 ശതമാനം തുക പിൻവലിക്കാം. കാലാവധി പൂർത്തിയായി പണം പിൻവലിക്കുന്നതിന് മറ്റ് നിബന്ധനകളൊന്നുമില്ല.

malayalam.goodreturns.in