മുംബൈ: മൂന്നുലക്ഷം രൂപയില്‍ കൂടിയ കറന്‍സി കൈമാറ്റങ്ങള്‍ നിരോധിക്കണമെന്നു സുപ്രീംകോടതി നിയോഗിച്ച പ്രത്യേക അന്വേഷണസംഘം (എസ്‌ഐടി). വ്യക്തികള്‍ക്ക് പണമായി കൈവശം സൂക്ഷിക്കാവുന്ന പരമാവധി തുക 15 ലക്ഷം രൂപയായി കുറക്കണമെന്നും അന്വേഷണ സംഘം നിര്‍ദേശിച്ചിട്ടുണ്ട്.

വ്യക്തിയുടെയും കമ്പനിയുടെയും പക്കല്‍ 15 ലക്ഷം രൂപയില്‍ കൂടുതല്‍ പണമായി സൂക്ഷിക്കുന്നതു വിലക്കണമെന്നും ശുപാര്‍ശയുണ്ട്.

മുന്‍ സുപ്രീംകോടതി ജഡ്ജി എം.ബി. ഷാ അധ്യക്ഷനായ സമിതിയുടേതാണു ശിപാര്‍ശ. 2014ല്‍ രൂപവത്കരിച്ച സമിതിയുടെ അഞ്ചാമത്തെ ശിപാര്‍ശയിലാണിത്.

നികുതിവെട്ടിപ്പും കള്ളപ്പണവും തടയുകയാണു ലക്ഷ്യം. പണകൈമാറ്റം ബാങ്കിലൂടെയായാല്‍ കൃത്യമായ കണക്കുകള്‍ ലഭിക്കും. മൂന്നു ലക്ഷത്തിലേറെ പണമായി കൈമാറുന്നതു നിയമവിരുദ്ധമാക്കണമെന്നു സംഘം നിര്‍ദേശിച്ചു.