യോനോ കാഷ് പോയിന്റുകള്‍

നിലവില്‍ രാജ്യത്തെ 16500 എടിഎമ്മുകളില്‍ നിന്ന് ഈ രീതിയില്‍ കാര്‍ഡിന്റെ സഹായമില്ലാതെ പണം പിന്‍വലിക്കാന്‍ സാധിക്കുന്ന വിധത്തില്‍ അവയില്‍ മാറ്റങ്ങള്‍ കൊണ്ടുവന്നു കഴിഞ്ഞു. ഈ രീതിയില്‍ എടിഎം കാര്‍ഡില്ലാതെ മൊബൈല്‍ ആപ്ലിക്കേഷന്‍ ഉപയോഗിച്ച് പണം പിന്‍വലിക്കാവുന്ന എടിഎമ്മുകള്‍ യോനോ കാഷ് പോയിന്റ്‌സ് എന്ന പേരിലാണ് അറിയപ്പെടുക.

കാര്‍ഡില്ലാതെ എങ്ങനെ?

എടിഎം മെഷീനില്‍ കാര്‍ഡ് സൈ്വപ്പ് ചെയ്യാതെ എങ്ങനെ പണം കിട്ടുമെന്നായിരിക്കും നാം ആലോചിക്കുന്നത്. ഇതിന് ആദ്യം ചെയ്യേണ്ടത് നമ്മുടെ സ്മാര്‍ട്ട് ഫോണിലെ പ്ലേസ്റ്റോറില്‍ നിന്ന് യോനോ കാഷ് എന്ന മൊബൈല്‍ ആപ്ലിക്കേഷന്‍ ഇന്‍സ്റ്റാള്‍ ചെയ്യുക എന്നതാണ്. ആന്‍ഡ്രോയിഡ്-ഐഒഎസ് മൊബൈല്‍ ഫോണുകളില്‍ നിന്ന് ഇത് ഡൗണ്‍ലോഡ് ചെയ്‌തെടുക്കാം. ഏതെങ്കിലും വെബ് ബ്രൗസര്‍ വഴിയും യോനോ കാഷിലേക്ക് പ്രവേശിക്കാം.

ആറക്ക പിന്‍ നമ്പര്‍

യോനോ ആപ്ലിക്കേഷന്‍ ഇന്‍സ്റ്റാള്‍ ചെയ്യുമ്പോള്‍ തന്നെ ഇടപാടുകള്‍ നടത്തുന്നതിനാവശ്യമായ ആറക്ക യോനോ കാഷ് പിന്‍ നമ്പര്‍ ലഭിക്കും. മൊബൈല്‍ ഉപയോഗിച്ച് പണം പിന്‍വലിക്കുന്ന സമയത്ത് അക്കൗണ്ടുമായി ബന്ധിപ്പിച്ച മൊബൈല്‍ നമ്പറിലേക്ക് മറ്റൊരു ആറക്ക റഫറന്‍സ് നമ്പര്‍ എസ്എംഎസ്സായി ലഭിക്കുകയും ചെയ്യും. 30 മിനുട്ടുകള്‍ക്കകം യോനോ കാഷ് പോയിന്റില്‍ ചെന്ന് റഫറന്‍സ് നമ്പറും പിന്‍നമ്പറും നല്‍കിയാല്‍ പണം ലഭിക്കും.

പുതിയ ബാങ്കിംഗ് അനുഭവം

യോനോ കാഷ് എസ്ബിഐയുടെ ഉപഭോക്താക്കളെ സമ്പന്ധിച്ചിടത്തോളം ഏറെ സൗകര്യപ്രദമാണെന്ന് എസ്ബിഐ ചെയര്‍മാന്‍ രജ്‌നീഷ് കുമാര്‍ പറഞ്ഞു. യോനോ ആപ്പ് ലോഞ്ച് ചെയ്ത ശേഷം സംസാരിക്കുകയായിരുന്നു അദ്ദേഹം. ഡെബിറ്റ് കാര്‍ഡ് കൈയിലില്ലെങ്കിലും എടിഎമ്മില്‍ നിന്ന് പണം പിന്‍വലിക്കാന്‍ കഴിയുന്ന വലിയ സൗകര്യമാണ് കസ്റ്റമര്‍ക്ക് ലഭിച്ചിരിക്കുന്നതെന്നും അദ്ദേഹം അഭിപ്രായപ്പെടുകയുണ്ടായി.

കൂടുതല്‍ എളുപ്പം കൂടുതല്‍ സുരക്ഷിതം

കാര്‍ഡില്ലാതെ എടിഎമ്മില്‍ നിന്ന് പണം പിന്‍വലിക്കാനുള്ള സംവിധാനം ജനങ്ങള്‍ക്ക് ഏറെ സൗകര്യപ്രദമാണ് എന്നു മാത്രമല്ല, കൂടുതല്‍ സുരക്ഷിതവുമാണ്. എടിഎം കാര്‍ഡ് തട്ടിപ്പുകള്‍ നടക്കാനുള്ള സാധ്യതയാണ് ഇതോടെ ഇല്ലാതെയായിരിക്കുന്നത്. കാര്‍ഡ് നഷ്ടപ്പെടുമെന്ന ഭയമോ പിന്‍നമ്പര്‍ മോഷ്ടിക്കപ്പെടുമെന്ന ആശങ്കയോ ഇതോടെ അസ്ഥാനത്താവും.

യോനോ അഥവാ ഒന്നു മാത്രം മതി

ഇപ്പോള്‍ വിവിധ ആപ്പുകളിലായി ചിതറിക്കിടക്കുന്ന എല്ലാ സേവനങ്ങളും ഒരു കുടക്കീഴിലാക്കിയും കൂടുതല്‍ ലൈഫ് സ്‌റ്റൈല്‍ സേവനങ്ങള്‍ കൂട്ടിച്ചേര്‍ത്തുമാണ് എസ്ബിഐയുടെ ന്യൂ ജനറേഷന്‍ മൊബൈല്‍ ആപ്ലിക്കേഷനായ യോനോ (YONO - You Only Need One) രൂപകല്‍പ്പന ചെയ്തിരിക്കുന്നത്. എല്ലാ സേവനങ്ങള്‍ക്കുമായി ഒരു ആപ്പ് മതി എന്നതാണ് ഇതിലൂടെ എസ്ബിഐ ഉദ്ദേശിക്കുന്നത്.

ബാങ്ക് ഇടപാടുകള്‍ മാത്രമല്ല

ബാങ്ക് ഇടപാടുകള്‍ക്കു പുറമെ വിനോദം, യാത്ര, ഭക്ഷണം, താമസം, ഇന്‍ഷുറന്‍സ്, മെഡിക്കല്‍ സേവനങ്ങളെല്ലാം ആപ്പിലൂടെ കണ്ടെത്താം. ആമസോണ്‍, ഊബര്‍, ഒല, ഷോപ്പേഴ്‌സ് സ്റ്റോപ്, കോക്‌സ് ആന്റ് കിംഗ്‌സ്, തോമസ് കുക്ക്, യാത്ര, സ്വിഗ്ഗി, ബൈജൂസ് തുടങ്ങി 60 ഇ-കൊമേഴ്‌സ് സ്ഥാപനങ്ങളുമായി ഇതിനായി എസ്ബിഐ കരാറുണ്ടാക്കിയിരുന്നു. ആപ് വഴി ഈ സേവനങ്ങള്‍ നേടുന്നവര്‍ക്ക് പ്രത്യേക ഇളവും ലഭിക്കും.