സ്വർണ്ണ ഫ്യൂച്ചർ

എം‌സി‌എക്‌സിൽ ഒക്‌ടോബർ സ്വർണ്ണ ഫ്യൂച്ചർ വില 10 ഗ്രാമിന് 1.4 ശതമാനം ഉയർന്ന് 38,030 രൂപയിലെത്തി. വെള്ളിയാഴ്ച ക്ലോസ് ചെയ്യുമ്പോൾ 37,503 രൂപയായിരുന്നു. എം‌സി‌എക്‌സിന്റെ വെള്ളി വില കിലോഗ്രാമിന് 2.4 ശതമാനം അഥവാ 1,100 രൂപ ഉയർന്ന് 46,856 രൂപ വരെയെത്തി. രൂപയുടെ മൂല്യം ഇന്ന് ഡോളറിന് 71.62 ആയി കുറഞ്ഞു. ആഭ്യന്തര സ്വർണ വില ഉയരാൻ ഇതും കാരണമാണ്.

സൗദി അരാംകോ ഡ്രോൺ ആക്രമണം

സൗദി അറേബ്യയിലെ ഏറ്റവും വലിയ എണ്ണ സംസ്കരണ കേന്ദ്രത്തിന് നേരെ ശനിയാഴ്ച നടന്ന ഡ്രോൺ ആക്രമണം ആഗോള എണ്ണവില കുത്തനെ ഉയർത്തി. ഇതും ആ​ഗോള വിപണിയിൽ സ്വർണ വില ഉയരാൻ കാരണമാണ്. സൗദി എണ്ണ കേന്ദ്രങ്ങൾക്ക് നേരെയുള്ള ഡ്രോൺ ആക്രമണത്തിന് പിന്നിൽ ഇറാനാണെന്നാണ് യുഎസ് ആരോപിച്ചിരിക്കുന്നത്.

ആ​ഗോള വിപണി വില

ഇന്ന് സ്വർണ്ണ വില 1.6 ശതമാനം ഉയർന്ന് 1,512 ഡോളറിലെത്തി. വെള്ളി വില 3.2 ശതമാനം ഉയർന്ന് 17.9938 ഡോളറിലെത്തി. സെപ്റ്റംബർ 17,18 ദിവസങ്ങളിൽ നടക്കുന്ന യുഎസ് ഫെഡറൽ റിസർവ് യോഗത്തിൽ പലിശ നിരക്ക് കുറയ്ക്കുമെന്ന പ്രതീക്ഷയും ആ​ഗോള വിപണിയിൽ സ്വർണ്ണ വില ഉയരാൻ കാരണമാണ്. ഈ മാസം ആദ്യം ആഗോള സ്വർണ വില ഔൺസിന് 1,550 ഡോളറിനു മുകളിലായി, ആറുവർഷത്തെ ഏറ്റവും ഉയർന്ന നിരക്കിലെത്തിയിരുന്നു.

ആവശ്യക്കാർ കുറവ്

ഈ വർഷം സ്വർണ വിലയിലെ കുത്തനെ ഉയർന്നതോടെ ഇന്ത്യയിൽ സ്വർണം വാങ്ങുന്നവരുടെ എണ്ണം കുറഞ്ഞിരുന്നു. ഓഗസ്റ്റിൽ സ്വർണ്ണ ഇറക്കുമതി 62 ശതമാനം ഇടിഞ്ഞ് 1.36 ബില്യൺ ഡോളറിലെത്തി. സെപ്റ്റംബർ നാലിന് കേരളത്തിൽ സ്വർണത്തിന്റെ ചരിത്രത്തിലെ തന്നെ ഏറ്റവും ഉയർന്ന വിലയായ 29120 രൂപ രേഖപ്പെടുത്തിയിരുന്നു. എന്നാൽ പിന്നീട് വില കുത്തനെ കുറയുകയായിരുന്നു.