മാരുതിയ്ക്ക് പിന്നാലെ, ജനുവരി മുതൽ ഹീറോ വാഹനങ്ങളുടെയും വില ഉയരും

രാജ്യത്തെ ഏറ്റവും വലിയ വാഹന നിർമാതാക്കളായ ഹീറോ മോട്ടോകോർപ്പ് ലിമിറ്റഡ് 2020 ജനുവരി 1 മുതൽ മോട്ടോർ സൈക്കിളുകളുടെയും സ്‌കൂട്ടറുകളുടെയും വില വർദ്ധിപ്പിക്കുമെന്ന് പ്രഖ്യാപിച്ചു. കമ്പനി പുറത്തിറക്കിയ പത്രക്കുറിപ്പ് അനുസരിച്ച് ഉൽപ്പന്നങ്ങളുടെ വില 2000 രൂപ വരെ വർദ്ധിപ്പിക്കുമെന്നാണ് സൂചിപ്പിച്ചിരിക്കുന്നത്.

ഇരുചക്രവാഹന ശ്രേണിയിലുടനീളമുള്ള വില വർദ്ധനവ് 2000 രൂപ വരെയായിരിക്കും, എന്നിരുന്നാലും വർദ്ധനവ് മോഡലിന്റെയും നിർദ്ദിഷ്ട വിപണിയുടെയും അടിസ്ഥാനത്തിൽ വ്യത്യാസപ്പെടുമെന്ന് ഹീറോയുടെ വക്താവ് പത്രക്കുറിപ്പിൽ വ്യക്തമാക്കി. രാജ്യത്തെ ഏറ്റവും വലിയ പാസഞ്ചർ വാഹന നിർമാതാക്കളായ മാരുതി സുസുക്കി ഇന്ത്യ ലിമിറ്റഡും ജനുവരി മുതൽ വാഹനങ്ങളുടെ വില വർദ്ധിപ്പിക്കുമെന്ന് കഴിഞ്ഞയാഴ്ച്ച പ്രഖ്യാപിച്ചിരുന്നു.

മാരുതിയ്ക്ക് പിന്നാലെ, ജനുവരി മുതൽ ഹീറോ വാഹനങ്ങളുടെയും വില ഉയരും

എന്നാൽ എത്ര രൂപ വർദ്ധിക്കുമെന്നോ വില വർദ്ധനവ് നടപ്പിലാക്കുന്ന തീയതിയോ മാരുതി വ്യക്തമാക്കിയിട്ടില്ല. നിർമ്മാണ ചെലവുകളും വർദ്ധനവ് കഴിഞ്ഞ ഒരു വർഷത്തിനിടെ വാഹനങ്ങളുടെ വിലയെ പ്രതികൂലമായി ബാധിച്ചുവെന്നും അതിനാൽ, 2020 ജനുവരി മുതൽ വിവിധ മോഡലുകളുടെ വിലവർധനയിലൂടെ കമ്പനിയുടെ അധിക ചെലവ് ഒരു പരിധി വരെ കുറയ്ക്കാനാകുമെന്നും വില വർദ്ധനവ് വിവിധ മോഡലുകൾക്ക് അനുസരിച്ച് വ്യത്യാസപ്പെടുമെന്നുമാണ് മാരുതി അറിയിച്ചത്.

ഹ്യുണ്ടായ് മോട്ടോർ ഇന്ത്യ, ടാറ്റ മോട്ടോഴ്‌സ് ലിമിറ്റഡ്, മഹീന്ദ്ര, മഹീന്ദ്ര ലിമിറ്റഡ് തുടങ്ങിയ കമ്പനികളും ഉടൻ വില വർദ്ധിപ്പിക്കാൻ സാധ്യതയുണ്ട്. വർഷാവസാനം വാഹന കമ്പനികൾ വില വർദ്ധനവ് പ്രഖ്യാപിക്കുന്നത് അവരുടെ ബിസിനസ് തന്ത്രമാണെന്നാണ് വ്യവസായ നിരീക്ഷകർ പറയുന്നത്. അതായത് വരും വർഷം വില കൂടുമെന്ന് കണ്ട് മിക്ക ഉപഭോക്താക്കളെയും വർഷാവസാനം കാർ വാങ്ങാൻ ഇത് പ്രേരിപ്പിക്കും. കൂടാതെ കാർ കമ്പനികൾക്ക് പുതിയ വർഷം ആരംഭിക്കുന്നതിന് മുമ്പായി നിലവിലെ സ്‌റ്റോക്ക് വിറ്റഴിക്കാനും കഴിയും.