ഐടി കമ്പനികൾക്ക് സന്തോഷ വാർത്ത! വീട്ടിലിരുന്ന് ജോലി ചെയ്യാം ഈ വർഷം അവസാനം വരെ, സർക്കാർ ഇളവ് നീട്ടി

ടെലികമ്മ്യൂണിക്കേഷൻസ് വകുപ്പ് ഐടി ജീവനക്കാരുടെ വീട്ടിലിരുന്നുള്ള ജോലി സുഗമമാക്കുന്നതിന് നിബന്ധനകളിലും വ്യവസ്ഥകളിലും ഇളവ് നീട്ടി. ഇന്ത്യൻ ഐടി വ്യവസായ പ്രമുഖർ സ്വാഗതം ചെയ്ത ഈ നീക്കത്തിൽ 2020 ഡിസംബർ 31 വരെയാണ് ഇളവ് നീട്ടിയിരിക്കുന്നത്. ഇതിനർത്ഥം കമ്പനികൾക്ക് ജീവനക്കാരോട് വീട്ടിൽ ഇരുന്ന് വർഷാവസാനം വരെ ജോലി തുടരാൻ ആവശ്യപ്പെടാം. നേരത്തെ സർക്കാർ ഇത് ജൂലൈ അവസാനം വരെയാണ് നീട്ടിയിരുന്നത്.

ഏപ്രിൽ മുതൽ

ഈ വർഷം ഏപ്രിലിൽ കൊവിഡ് 19 മഹാമാരിയുടെ പശ്ചാത്തലത്തിലാണ് സേവന ദാതാക്കൾ നിബന്ധനകളിലും വ്യവസ്ഥകളിലും ഇളവ് ഏർപ്പെടുത്തിയത്. ഈ നീക്കത്തെ സ്വാഗതം ചെയ്ത സോഫ്റ്റ്വെയർ ലോബി നാസ്കോം പ്രസിഡന്റ് ഡെബ്ജാനി ഘോഷ് ടെലികോം, ഐടി മന്ത്രി രവിശങ്കർ പ്രസാദ്, ഡോട്ട് സെക്രട്ടറി എന്നിവർക്ക് നന്ദി അറിയിച്ചു.

റിഷാദ് പ്രേംജി

വിപ്രോ ചെയർമാൻ റിഷാദ് പ്രേംജിയും ഈ തീരുമാനത്ത് സ്വാഗതം ചെയ്തു, പുതിയ പ്രവർത്തന രീതികൾക്ക് സർക്കാരിൻറെ സമഗ്ര പിന്തുണയ്ക്ക് നന്ദി. ആഗോളതലത്തിൽ തങ്ങളുടെ നിലപാടും പ്രതികരണശേഷിയും കൂടുതൽ ഉയർത്തുന്നതിന് ഇത് വളരെയധികം സഹായിച്ചുവെന്ന് റിഷാദ് പ്രേംജി ട്വീറ്റ് ചെയ്തു. ആറ് മാസത്തെ വിപുലീകരണം അടിയന്തിര മുൻ‌ഗണനകൾ പരിഹരിക്കാൻ സഹായിക്കുമെങ്കിലും ഐടി വ്യവസായം ഈ മാനദണ്ഡങ്ങളിൽ സ്ഥിരമായ ഇളവുകൾ തേടിയിട്ടുണ്ട്.

വരും വ‍ർഷങ്ങളിൽ

മിക്ക കമ്പനികളും മിശ്രിത വർക്കിംഗ് മോഡലിലേക്ക് മാറാനാണ് ആ​ഗ്രഹിക്കുന്നത്. ഒരു നിശ്ചിത ശതമാനം ജീവനക്കാർക്ക് വീട്ടിൽ നിന്ന് സ്ഥിരമായി ജോലി ചെയ്യാൻ അനുമതി തേടും. ഇന്ത്യയിലെ ഏറ്റവും വലിയ ഐടി കമ്പനിയായ ടി‌സി‌എസ് 2025 ഓടെ തങ്ങളുടെ തൊഴിലാളികളിൽ 25% പേരെ മാത്രം ഓഫീസുകളിൽ നിന്ന് ജോലി ചെയ്യാനാണ് ഉദ്ദേശിക്കുന്നതെന്ന് വ്യക്തമാക്കിയിരുന്നു. ഇന്ത്യയിലെ മിക്ക മുൻനിര ഐടി കമ്പനികളിലെയും 90% ജീവനക്കാരും ഇപ്പോൾ വീട്ടിലിരുന്നാണ് ജോലി ചെയ്യുന്നത്.

ചെലവുകൾ കുറഞ്ഞു

കൊവിഡ് -19 ആളുകളുടെ യാത്രകൾ കുറയ്ക്കുകയും വീടുകളിൽ ഇരുന്ന് ജോലി ചെയ്യാൻ നിർബന്ധിക്കുകയും ചെയ്തതോടെ ഇന്ത്യൻ ഐടി കമ്പനികളായ ടിസിഎസ്, ഇൻഫോസിസ്, വിപ്രോ എന്നിവിടങ്ങളിൽ രസകരമായ ചില മാറ്റങ്ങൾ സംഭവിച്ചു. ജൂൺ പാദത്തിൽ കമ്പനികളിലെ യാത്രാ ചെലവ് 86 ശതമാനം വരെ കുറഞ്ഞു. എന്നാൽ ആശയവിനിമയത്തിനായുള്ള ബില്ലുകൾ 20 മുതൽ 30 ശതമാനം വരെ വർദ്ധിച്ചതായി കമ്പനികൾ റിപ്പോർട്ട് ചെയ്തു.