എന്തുകൊണ്ട് ബജറ്റ് ജനക്ഷേമപരവും വികസനോന്‍മുഖവും ആകുന്നു? എംഎ യൂസഫലി പറയുന്നു

ഇത്തവണത്തെ സംസ്ഥാന ബജറ്റ് അവതരണം വെറും ഒരു മണിക്കൂര്‍ മാത്രം നീണ്ടുനില്‍ക്കുന്ന ഒന്നായിരുന്നു. കെഎന്‍ ബാലഗോപാലിന്റെ ആദ്യ ബജറ്റ് പ്രസംഗം എന്ന പ്രത്യേകതയും ഉണ്ടായിരുന്നു.

ഇക്കഴിഞ്ഞ ഫെബ്രുവരിയില്‍ മുന്‍ ധനമന്ത്രി തോമസ് ഐസക് അവതരിപ്പിച്ച ബജറ്റിന്റെ തുടര്‍ച്ചയാണ് ഈ ബജറ്റ് എന്ന് വ്യക്തമാക്കിക്കൊണ്ടായിരുന്നു കെഎന്‍ ബാലഗോപാലിന്റെ പ്രസംഗം തുടങ്ങിയത് തന്നെ. എന്തായാലും ഒരു മണിക്കൂറില്‍ അവതരിപ്പിച്ച ബജറ്റ് ജനക്ഷേമവും വികസനവും മുന്‍നിര്‍ത്തിയുള്ളതാണെന്നാണ് പ്രമുഖ വ്യവസായി എംഎ യൂസഫലി പറയുന്നത്. പരിശോധിക്കാം...

മികച്ച ബജറ്റ്

രണ്ടാം പിണറായി വിജയന്‍ സര്‍ക്കാരിന്റെ ആദ്യ ബജറ്റിനെ പ്രശംസിക്കുകയാണ് ലുലു ഗ്രൂപ്പ് ചെയര്‍മാന്‍ ആയ എംഎ യൂസഫലി. വികസനവും ജനക്ഷേമവും ആണ് ബജറ്റിന്റെ മുഖമുദ്രയെന്നാണ് അദ്ദേഹത്തിന്റെ വിലയിരുത്തല്‍.

ആരോഗ്യ മേഖല

ബജറ്റില്‍ ആരോഗ്യമേഖലയ്ക്ക് വലിയ പ്രാധാന്യം നല്‍കിയതിനേയും അദ്ദേഹം പ്രശംസിക്കുന്നുണ്ട്. കൊവിഡ് പ്രതിസന്ധികള്‍ മറികടക്കാന്‍ ഉതകുന്ന നിര്‍ദ്ദേശങ്ങള്‍ ബജറ്റില്‍ ഉണ്ടെന്ന് എംഎ യൂസഫലി പറയുന്നു. ആരോഗ്യ മേഖലയ്ക്ക് കൂടുതല്‍ പ്രാമുഖ്യം നല്‍കിയത് ആ മേഖലയെ ശക്തിപ്പെടുത്താന്‍ സഹായിക്കുമെന്നും അദ്ദേഹം പറയുന്നുണ്ട്.

പ്രവാസി ക്ഷേമം

പ്രവാസി വ്യവസായി എന്ന് തന്നെ വിശേഷിപ്പിക്കേണ്ട ആളാണ് യൂസഫലി. ഈ ബജറ്റ് പ്രവാസി ക്ഷേമത്തിന് ഊന്നല്‍ നല്‍കുന്ന ബജറ്റ് ആണെന്നും അദ്ദേഹം വിലയിരുത്തുന്നുണ്ട്. പ്രവാസികള്‍ക്കുള്ള വായ്പാ പദ്ധതി, ജോലി നഷ്ടപ്പെട്ട് തിരികെ എത്തിയവര്‍ക്ക് ആശ്വാസമാകുമെന്ന് അദ്ദേഹം പറഞ്ഞു. നാട്ടില്‍ കുടുങ്ങിയ പ്രവാസികള്‍ക്കുള്ള വാക്‌സിനേഷന്‍ പദ്ധതിയേയും അദ്ദേഹം പ്രശംസിച്ചു.

ആത്മവിശ്വാസം പകരും

ഈ ബജറ്റ് എന്തുകൊണ്ട് പൊതുജനങ്ങള്‍ക്ക് ആത്മ വിശ്വാസം പകരും എന്നും അദ്ദേഹം വിശദീകരിക്കുന്നുണ്ട്. പുതിയ നികുതികള്‍ ഏര്‍പ്പെടുത്തിയിട്ടില്ല എന്നതാണ് അതില്‍ പ്രധാനം. കൃഷിയ്ക്കും തീരമേഖലയ്ക്കും ടൂറിസത്തിനും വിദ്യാഭ്യാസത്തിനും നല്‍കിയ പ്രാധാന്യവും ജനങ്ങള്‍ക്ക് ആത്മവിശ്വാസം പകരുമെന്ന് അദ്ദേഹം പറയുന്നു.

കൊവിഡ് പാക്കേജ്

എംഎ യൂസഫലി വിലയിരുത്തിയത് പോലെ ആരോഗ്യ മേഖലയ്ക്ക് അതീവ പ്രാധാന്യം കല്‍പിക്കുന്ന ഒര ബജറ്റ് ആണ് അവതകിപ്പിക്കപ്പെട്ടിട്ടുള്ളത്. കൊവിഡ് പ്രത്യേക പാക്കേജ് ആയി 20000 കോടി രൂപയാണ് പ്രഖ്യാപിച്ചിട്ടുള്ളത്. വാക്‌സിന്‍ വാങ്ങുന്നതിന് ആയിരം കോടി രൂപയാണ് ബജറ്റില്‍ വകയിരുത്തിയിട്ടുള്ളത്.
കാര്യം.