മെഗാ സാമ്പത്തിക പാക്കേജ്: ധനമന്ത്രിയുടെ പ്രഖ്യാപനം വൈകുന്നേരം നാല് മണിയ്ക്ക്

രാജ്യത്ത് അഭിസംബോധന ചെയ്ത പ്രധാനമന്ത്രി നരേന്ദ്രമോദി ഇന്നലെ പ്രഖ്യാപിച്ച 20 ലക്ഷം കോടി രൂപയുടെ മെഗാ സാമ്പത്തിക ഉത്തേജന പാക്കേജിന്റെ വിശദാംശങ്ങൾ ഇന്ന് ധനമന്ത്രി നിർമ്മല സീതാരാമൻ വിശദീകരിക്കും. വൈകീട്ട് നാലു മണിക്ക് ഡൽഹയിൽ ധനമന്ത്രി മാധ്യമങ്ങളെ കാണും. രാജ്യത്തെ സമസ്ത മേഖലകളിലും ഉത്തേജനം നല്‍കാനുള്ളതാണ് പാക്കേജെന്ന് പ്രധാനമന്ത്രി ഇന്നലെ വ്യക്തമാക്കിയിരുന്നു. ഇന്ത്യയെ കൊവിഡ് -19 പ്രതിസന്ധിയിൽ നിന്ന് കരകയറ്റുമെന്ന് പ്രതീക്ഷുന്ന പാക്കേജിൽ എന്തെല്ലാം പ്രഖ്യാപനങ്ങളുണ്ടാകുമെന്നാണ് വിവിധ മേഖലകളിൽ നിന്നുള്ളവർ കാത്തിരിക്കുന്നത്.

സംയോജിത ഉത്തേജക പാക്കേജ് 20 ലക്ഷം കോടി രൂപയുടേതാണെന്നും ഇത് ഇന്ത്യയുടെ ജിഡിപിയുടെ 10% വരുമെന്നും പ്രധാനമന്ത്രി ഇന്നലെ വ്യക്തമാക്കിയിരുന്നു. നാളെ മുതൽ അടുത്ത കുറച്ച് ദിവസങ്ങളിൽ ധനമന്ത്രി ഈ സാമ്പത്തിക പാക്കേജിനെക്കുറിച്ചുള്ള വിശദമായ വിവരങ്ങൾ നൽകുമെന്നും പ്രധാനമന്ത്രി ഇന്നലെ രാജ്യത്തെ അഭിസംബോധന ചെയ്ത് സംസാരിച്ചപ്പോൾ പറഞ്ഞിരുന്നു.

അതുകൊണ്ട് തന്നെ ധനമന്ത്രി നിർമ്മല സീതാരാമൻ സാമ്പത്തിക പാക്കേജിന്റെ മുഴുവൻ വിശദാംശങ്ങളും ഒറ്റയടിക്ക് പ്രഖ്യാപിക്കാനിടയില്ല. കോട്ടേജ് വ്യവസായം, ചെറുകിട വ്യവസായം, എംഎസ്എംഇകൾ, തൊഴിലാളികൾ, കൃഷിക്കാർ, മധ്യവർഗ നികുതിദായകർ, ഇന്ത്യൻ വ്യവസായങ്ങൾ തുടങ്ങി സമൂഹത്തിന്റെ വിവിധ വിഭാഗങ്ങൾക്കു വേണ്ടിയാണ് സാമ്പത്തിക പാക്കേജ് രൂപകൽപ്പന ചെയ്തിരിക്കുന്നതെന്നാണ് വിവരം. ചില വലിയ പരിഷ്കാരങ്ങൾ നടപ്പിലാക്കുമെന്ന് പ്രധാനമന്ത്രി മോദിയും സൂചനകൾ നൽകിയിരുന്നു.