ഓൺലൈൻ ഷോപ്പിംഗ് കുതിച്ചുചാട്ടം, ആമസോണിൽ ഒരു ലക്ഷം പേ‌‍ർക്ക് തൊഴിലവസരം

കൊറോണ പ്രതിസന്ധിയെ തുടർന്ന് ഓൺലൈൻ ഓർഡറുകൾ കുത്തനെ ഉയ‍ർന്നതോടെ ഒരു ലക്ഷം പേരെ കൂടി പുതുതായി നിയമിക്കുമെന്ന് ആമസോൺ അറിയിച്ചു. പാർട്ട് ടൈം ആയും ഫുൾടൈം ആയും ഉള്ള ജോലികൾക്കാണ് അവസരമുള്ളത്. ഓർഡറുകൾ പായ്ക്ക് ചെയ്യൽ, കയറ്റുമതി ചെയ്യൽ, അടുക്കൽ തുടങ്ങിയവയാണ് ഒഴിവുള്ള പുതിയ ജോലികളെന്ന് കമ്പനി അറിയിച്ചു. സാധാരണ അവധിക്കാല നിയമനവുമായി ഇതിന് ബന്ധമില്ലെന്നും ആമസോൺ വ്യക്തമാക്കി.

ഓൺലൈൻ ബിസിനസ്

കൊറോണ പ്രതിസന്ധികളെ തുട‍ർന്ന് ഓൺലൈൻ ബിസിനസ്സ് കുതിച്ചുയ‍ർന്നു കൊണ്ടിരിക്കുകയാണ്. പലചരക്ക് സാധനങ്ങളും മറ്റും വാങ്ങാൻ കടയിൽ പോകാതെ കൂടുതൽ ആളുകളും ഓൺലൈനിലേയ്ക്ക് തിരിഞ്ഞത് കമ്പനിയ്ക്ക് ​ഗുണകരമായി. ലോക്ഡൗൺ സമയമായ ഏപ്രിൽ മുതൽ ജൂൺ വരെ ആമസോണിന് ഇത് റെക്കോർഡ് ലാഭവും വരുമാനവും നേടി കൊടുത്തു. ഓർഡറുകൾ വ‍ർദ്ധിച്ചതോടെ തിരക്ക് നിയന്ത്രിക്കാൻ കമ്പനിക്ക് ഇതിനകം തന്നെ 175,000 പേരെ പുതുതായി നിയമിക്കേണ്ടി വന്നു.

തൊഴിലവസരം

കഴിഞ്ഞ ആഴ്ച 33,000 കോർപ്പറേറ്റ്, ടെക് ജോലികൾ നികത്തേണ്ടതുണ്ടെന്ന് കമ്പനി വ്യക്തമാക്കിയിരുന്നു. ഈ മാസം 100 പുതിയ വെയർ‌ഹൗസുകൾ‌, പാക്കേജ് സോർട്ടിംഗ് സെന്ററുകൾ എന്നിവ കമ്പനി തുറക്കും. ഇവിടേയ്ക്ക് നിരവധി ആളുകളെ ആവശ്യമാണെന്ന് ആമസോൺ പറഞ്ഞു. ആമസോണിന്റെ വെയർഹൗസുകളുടെ മേൽനോട്ടം വഹിക്കുന്ന അലീഷ്യ ബോലർ ഡേവിസ്, ചില നഗരങ്ങളിൽ 1,000 സൈൻ-ഓൺ ബോണസുകൾ കമ്പനി വാഗ്ദാനം ചെയ്യുന്നുണ്ട്.

പ്രൈം ഡേ സെയിൽ

ആമസോണിലെ തുടക്ക ശമ്പളം മണിക്കൂറിന് 15 ഡോളറാണ്. ഹോളിഡേ ഷോപ്പിംഗ് തിരക്കിന് പുറമേ, ആമസോൺ അതിന്റെ ഏറ്റവും തിരക്കേറിയ ഷോപ്പിംഗ് ദിനങ്ങളിലൊന്നായ പ്രൈം ഡേ ഈ വർഷം അവസാനത്തോടെ നടത്താൻ തീരുമാനിച്ചിട്ടുണ്ട്. അവധി ദിവസങ്ങളിൽ കൂടുതൽ തൊഴിലാളികളെ നിയമിക്കേണ്ടതുണ്ടോ എന്ന് ആമസോൺ തീരുമാനിക്കും. കഴിഞ്ഞ വർഷം അവധി ദിവസങ്ങൾക്ക് മുന്നോടിയായി 200,000 പേരെ നിയമിച്ചിരുന്നു.