<p><strong>

</strong>മുംബൈ: അടിസ്ഥാന നിരക്കുകളില്‍ കാല്‍ശതമാനം വര്‍ധനവ് വരുത്തിയ റിസര്‍വ് ബാങ്ക് നയം വായ്പയെടുത്തവരെയും എടുക്കാന്‍ പോവുന്നവരെയും വെള്ളംകുടിപ്പിക്കുമെങ്കിലും ബാങ്കില്‍ നിക്ഷേപമുള്ളവര്‍ക്ക് സന്തോഷിക്കാനുള്ള ഒരു തീരുമാനവും അതോടൊപ്പം പുറത്തുവന്നിട്ടുണ്ട്.</p> <p>നിക്ഷേപകരുടെ പണത്തിന് പരമാവധി കൊടുക്കാവുന്ന പലിശയ്ക്ക് റിസര്‍വ്ബാങ്കിന്റെ നിയന്ത്രണമുണ്ടായിരുന്നു. പുതിയ നയം നിലവില്‍ വരുന്നതോടെ ഈ നിയന്ത്രണം ഇല്ലാതാവും. ചുരുക്കത്തില്‍ നിക്ഷേപിക്കുന്ന ഒരാള്‍ക്ക് എത്ര ശതമാനം പലിശ കൊടുക്കണമെന്ന് ബാങ്കുകള്‍ക്കു തന്നെ തീരുമാനിക്കാം. ഇതോടെ ബാങ്കുകള്‍ നിക്ഷേപം ആകര്‍ഷിക്കാന്‍ മല്‍സരിക്കാന്‍ തുടങ്ങും.</p> <p>ഈ മല്‍സരത്തില്‍ നിക്ഷേപകനായിരിക്കും ഏറ്റവും കൂടുതല്‍ മെച്ചമുണ്ടാവുക. പക്ഷേ, ഒരു ലക്ഷം രൂപവരെയുള്ള നിക്ഷേപങ്ങള്‍ക്ക് ബാങ്കുകള്‍ ഏകീകൃതമായ നിരക്ക് പിന്തുടരണമെന്ന് നിര്‍ദ്ദേശിച്ചിട്ടുണ്ട്.</p> <p>ഇതിനു മുമ്പ് ഫിക്‌സഡ് ബാങ്ക് നിക്ഷേപത്തിന്റെ പലിശ തീരുമാനിക്കാന്‍ ബാങ്കുകള്‍ക്ക് അധികാരം നല്‍കിയിരുന്നു. രാജ്യത്തെ മൊത്തം ബാങ്ക് നിക്ഷേപത്തില്‍ 25 ശതമാനം വരെ സേവിങ്‌സ് എക്കൗണ്ടുകളിലാണുള്ളത്.<br /></p>