മാസം 210 രൂപ എടുക്കാനുണ്ടോ? 8.5 ലക്ഷം രൂപ നേടാം, നിക്ഷേപിക്കേണ്ടത് എവിടെ?

റിട്ടയർമെന്റിന് ശേഷമുള്ള കാലത്തേയ്ക്ക് പണം സമ്പാദിക്കേണ്ടതും നിക്ഷേപം നടത്തേണ്ടതും വളരെ പ്രധാനപ്പെട്ട കാര്യമാണ്. സ്ഥിരമായ വരുമാന മാർഗ്ഗം ഇല്ലാതിരിക്കുമ്പോൾ പോലും സാമ്പത്തികമായി സ്വതന്ത്രരാകാൻ ആളുകളെ പ്രോത്സാഹിപ്പിക്കുന്നതിനായി പ്രായമായവർക്കായി സർക്കാർ നിരവധി പെൻഷൻ പദ്ധതികൾ ആരംഭിച്ചിട്ടുണ്ട്. രാജ്യത്തെ ഏറ്റവും പ്രചാരമുള്ള അത്തരത്തിലൊരു പെൻഷൻ നിക്ഷേപ ഉപകരണങ്ങളിലൊന്നാണ് അടൽ പെൻഷൻ യോജന (എപിവൈ).

അസംഘടിത മേഖല തൊഴിലാളികൾക്ക്

ഡെലിവറി ബോയ്സ്, വീട്ടുജോലിക്കാർ, ഡെലിവറി ബോയ്സ് തുടങ്ങിയ അസംഘടിത മേഖലയിൽ ജോലി ചെയ്യുന്നവർക്ക് സാമ്പത്തിക സുരക്ഷ നൽകുകയെന്ന ലക്ഷ്യത്തോടെയാണ് ഈ പദ്ധതി നടപ്പിലാക്കുന്നത്. 1,000 മുതൽ 5,000 രൂപ വരെ പ്രതിമാസ പെൻഷൻ ലഭിക്കുന്ന സാമൂഹിക സുരക്ഷാ പദ്ധതിയാണിത്. നിക്ഷേപ തുകയും കാലാവധിയും അനുസരിച്ച് പെൻഷനായി ലഭിക്കുന്ന തുകയിലും വ്യത്യാസമുണ്ടാകും.

8.5 ലക്ഷം രൂപ നേടാം

വെറും 42 രൂപ നിക്ഷേപം നടത്തിയാൽ മാസം 1,000 രൂപ സ്ഥിര പെൻഷൻ നേടാവുന്നതാണ്. പ്രതിമാസം 210 രൂപ നിക്ഷേപിക്കുകയാണെങ്കിൽ നിശ്ചിത കാലാവധിയ്ക്ക് ശേഷം വാർഷിക പെൻഷനായി 60,000 രൂപ ലഭിക്കും. 42 വർഷം ഈ പദ്ധതിയിൽ പ്രതിമാസം 210 രൂപ സംഭാവന ചെയ്താൽ ഒരാൾക്ക് 8.5 ലക്ഷം രൂപയുടെ പെൻഷൻ കോർപ്പസ് സൃഷ്ടിക്കാൻ കഴിയും. 

പെൻഷൻ കോ‍ർപ്പസ്

അടൽ പെൻഷൻ യോജന കോൺ‌ട്രിബ്യൂഷൻ ചാർട്ട് അനുസരിച്ച്, 42 രൂപ പ്രതിമാസ സംഭാവന ചെയ്യുന്നയാൾക്ക് 1.7 ലക്ഷം രൂപ കോർപ്പസ് തുക നേടാം. 18 വയസ് മുതൽ 42 വയസ്സ് വരെ 84 രൂപ പ്രതിമാസ സംഭാവന നടത്തുന്നയാൾക്ക് 3.4 ലക്ഷം രൂപയുടെ കോർപ്പസ് ലഭിക്കും. 42 വർഷത്തേക്ക് 168 രൂപ പ്രതിമാസ സംഭാവന ചെയ്യുന്നവ‍ർക്ക് 6.8 ലക്ഷം രൂപയുടെ പെൻഷൻ കോർപ്പസ് ലഭിക്കും.

സർക്കാരിന്റെ സംഭാവന

പി‌എഫ്‌ആർ‌ഡി‌എയുടെ വെബ്‌സൈറ്റ് അനുസരിച്ച്, കേന്ദ്ര സർക്കാർ മൊത്തം സംഭാവനയുടെ 50 ശതമാനം അല്ലെങ്കിൽ പ്രതിവർഷം 1,000 രൂപ, ഓരോ വരിക്കാരുടെ അക്കൗണ്ടിലേക്കും 5 വർഷത്തേക്ക് സംഭാവന നൽകും. നിങ്ങൾ ചെറുപ്പത്തിൽ തന്നെ പദ്ധതിയിൽ ചേർന്നാൽ നിങ്ങൾക്ക് കൂടുതൽ ആനുകൂല്യങ്ങൾ ലഭിക്കുമെന്നത് എടുത്തുപറയേണ്ടതാണ്.

നികുതി ആനുകൂല്യങ്ങൾ

അടൽ പെൻഷൻ യോജന വരിക്കാർക്ക് നികുതി ആനുകൂല്യങ്ങളും വാഗ്ദാനം ചെയ്യുന്നുണ്ട്. ഈ സ്കീമിന് കീഴിലുള്ള സംഭാവനകൾക്ക് ആദായനികുതി നിയമത്തിലെ സെക്ഷൻ 80 സിസിഡി പ്രകാരം നികുതി ആനുകൂല്യം ലഭിക്കും. ഈ സ്കീമിന് കീഴിൽ നികുതി വരുമാനത്തിൽ നിന്ന് കുറയ്ക്കാൻ കഴിയുന്ന പരമാവധി തുക സാമ്പത്തിക വർഷത്തിൽ രണ്ട് ലക്ഷം രൂപയാണ്. കൂടാതെ, സെക്ഷൻ 80 സി, സെക്ഷൻ 80 സിസിഡി എന്നിവയ്ക്ക് കീഴിലുള്ള കിഴിവും രണ്ട് ലക്ഷം രൂപയിൽ കൂടരുത്.

malayalam.goodreturns.in