മാസം 10000 രൂപ പെൻഷൻ നേടാൻ നിങ്ങൾ ചെയ്യേണ്ടത് എന്ത്? കൂടുതൽ വിവരങ്ങൾ ഇതാ

സാധാരണക്കാരായ പൗരന്മാർ‌ക്ക് വിരമിക്കലിന് ശേഷം വരുമാനം നേടാൻ‌ കഴിയുന്ന ചില നിക്ഷേപ മാർഗങ്ങളുണ്ട്. അത്തരം ഒരു നിക്ഷേപ മാർഗമാണ് പ്രധാൻ മന്ത്രി വയാ വന്ദന യോജന. മുതിർന്ന പൗരന്മാർക്ക് 10 വർഷത്തെ പോളിസി കാലാവധി ഗ്യാരണ്ടീഡ് പലിശ വാഗ്ദാനം ചെയ്യുന്ന നിക്ഷേപ മാർഗമാണിത്. ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യയാണ് ഈ പദ്ധതി 2017 ജൂലൈയിൽ ഔദ്യോഗികമായി നടപ്പിലാക്കിയത്.

പരമാവധി നിക്ഷേപം

പ്രധാൻ മന്ത്രി വയാ വന്ദന യോജനയിൽ നിക്ഷേപം നടത്തിയ മുതിർന്ന പൗരന്മാർ ആധാർ നമ്പറിന്റെ തെളിവ് സമർപ്പിക്കുകയോ ആധാർ പ്രാമാണീകരണത്തിന് വിധേയമാക്കുകയോ ചെയ്യണമെന്ന് ധനമന്ത്രാലയം അടുത്തിടെ പുറത്തിറക്കിയ വിജ്ഞാപനത്തിൽ വ്യക്തമാക്കിയിരുന്നു. പ്രധാൻ മന്ത്ര വയ വന്ദന യോജന പ്രകാരം മുതിർന്ന പൗരന്മാർക്ക് നിക്ഷേപിക്കാൻ കഴിയുന്ന പരമാവധി പരിധി 15 ലക്ഷം രൂപയാണ്.

പെൻഷൻ തുക

ഈ പദ്ധതിയുടെ പോളിസി കാലാവധി 10 വർഷവും മിനിമം പെൻഷൻ പ്രതിമാസം 1,000 രൂപയും പാദത്തിൽ 3,000 രൂപയും അർദ്ധവാർഷികത്തിൽ 6,000 രൂപയും പ്രതിവർഷം 12,000 രൂപയുമാണ്. പി‌എം‌വി‌വൈയിൽ പരമാവധി പെൻഷൻ പ്രതിമാസം 10,000 രൂപ, പാദാടിസ്ഥാനത്തിൽ 30,000 രൂപയും, അർദ്ധവാർഷികത്തിൽ 60,000 രൂപയും, പ്രതിവർഷം 1,20,000 രൂപയുമാണ്. അതായത്, ഈ പദ്ധതിയിൽ 15 ലക്ഷം രൂപ വരെ നിക്ഷേപിച്ച് പ്രതിമാസം 10,000 രൂപ പെൻഷൻ നേടാം.

പെൻഷൻ വിതരണം

നാഷണൽ ഇലക്ട്രോണിക് ഫണ്ട് ട്രാൻസ്ഫർ (നെഫ്റ്റ്) അല്ലെങ്കിൽ ആധാർ വഴിയുള്ള പേയ്മെന്റ് സിസ്റ്റം (എഇപിഎസ്) വഴി പ്രതിമാസ, ത്രൈമാസ, അർദ്ധ വാർഷിക, വാർഷിക അടിസ്ഥാനത്തിലാണ് പെൻഷൻ നൽകുന്നത്. പെൻഷന്റെ ആദ്യ ഗഡു പെൻഷൻ പേയ്മെന്റിന്റെ രീതിയെ ആശ്രയിച്ച് 1 വർഷം, 6 മാസം, 3 മാസം അല്ലെങ്കിൽ 1 മാസം കഴിഞ്ഞ് ലഭിക്കും, അതായത് യഥാക്രമം വാർഷിക, അർദ്ധ വാർഷിക, ത്രൈമാസ അല്ലെങ്കിൽ പ്രതിമാസ അടിസ്ഥാനത്തിൽ.

വായ്പ എടുക്കാം

മൂന്ന് പോളിസി വർഷങ്ങൾ പൂർത്തിയാക്കിയ ശേഷം പോളിസി ഉടമയ്ക്ക് വായ്പാ സൗകര്യം ലഭ്യമാണ്. അനുവദനീയമായ പരമാവധി വായ്പ നിക്ഷേപ തുകയുടെ 75 ശതമാനമായിരിക്കും. വായ്പ തുകയ്ക്ക് ഈടാക്കേണ്ട പലിശ നിരക്ക് ആനുകാലിക ഇടവേളകളിൽ നിർണ്ണയിക്കപ്പെടും.