ടാക്‌സ് ഡിഡക്ഷൻ, ടാക്‌സ് റിബേറ്റ്, ടാക്‌സ് എക്‌സെംഷൻ ഇവ തമ്മിലുള്ള വ്യത്യാസമെന്ത്?

വ്യക്തികളുടെയോ സ്ഥാപനങ്ങളുടേയോ ആദായത്തിന്മേൽ ചുമത്തുന്ന നികുതിക്കാണ്‌ ആദായ നികുതി എന്നു പറയുന്നത്. ഇങ്ങനെ ചുമത്തപ്പെടുന്ന നികുതിയിൽ നിന്ന് ഒഴിവാക്കപ്പെടാൻ പല വഴികളും തേടുന്നവരാണ് എല്ലാവരും. നികുതി ലാഭിക്കുന്നതിനും ഡിസ്പോസിബിൾ വരുമാനം വർദ്ധിപ്പിക്കുന്നതിനും നിങ്ങളുടെ നികുതി ലാഭിക്കൽ നിക്ഷേപം സമർത്ഥമായി ആസൂത്രണം ചെയ്യേണ്ടത് പ്രധാനമാണ്. ഇതിനായി നിങ്ങൾ നിലവിലുള്ള ആദായനികുതി നിരക്കുകളും സ്ലാബുകളും അറിയുക മാത്രമല്ല, ടാക്‌സ് ഡിഡക്ഷൻ, ടാക്‌സ് റിബേറ്റ്, ടാക്‌സ് എക്‌സെപ്ഷൻ തുടങ്ങിയവയെക്കുറിച്ചും മനസ്സിലാക്കിയിരിക്കണം.

എന്താണ് ടാക്‌സ് ഡിഡക്ഷൻ, ടാക്‌സ് റിബേറ്റ്, ടാക്‌സ് എക്‌സെപ്ഷൻ എന്നിവ?

ഈ മൂന്ന് പദങ്ങൾക്കും സമാന അർത്ഥമുണ്ടെന്ന് തോന്നുന്നതിനാൽ നികുതിദായകർക്ക് പലപ്പോഴും ഇതിൽ ആശയക്കുഴപ്പമുണ്ടാകാറുണ്ട്. ആദായനികുതി നിയമമനുസരിച്ച് ടാക്‌സ് ഡിഡക്ഷൻ, ടാക്‌സ് റിബേറ്റ്, ടാക്‌സ് എക്‌സെപ്‌ഷൻ എന്നിവയ്‌ക്ക് വ്യത്യസ്തമായ വശങ്ങളുണ്ട്.

ടാക്‌സ് എക്‌സെംഷൻ:

ആദായനികുതി വകുപ്പ് ചില വരുമാന സ്രോതസ്സുകളെ ടാക്‌സ് എക്‌സെംഷനായി പരിഗണിക്കാറുണ്ട്. അതായത് അത്തരം ഏതെങ്കിലും തരത്തിലുള്ള വരുമാനത്തിന് നിങ്ങൾ നികുതി നൽകേണ്ടതില്ല. നികുതി അടയ്‌ക്കേണ്ട മൊത്തം വരുമാനം കണക്കാക്കുമ്പോൾ, ഒഴിവാക്കപ്പെട്ട (എക്‌സെംപ്‌റ്റഡ്) വരുമാനം ആദ്യം കുറയ്‌ക്കും. എൽ‌ടി‌എ അല്ലെങ്കിൽ‌ എൽ‌ടി‌സി, വീട് വാടക അലവൻസ് (എച്ച്‌ആർ‌എ), ലൈഫ് ഇൻഷുറൻസ് പോളിസിയിൽ നിന്നുള്ള രസീതുകൾ തുടങ്ങിയവ ശമ്പളക്കാർക്കുള്ള ടാക്‌സ് എക്‌സെംഷനിൽ ഉൾപ്പെടുന്നു.

ടാക്‌സ് ഡിഡക്ഷൻ:

ഒരു നികുതിദായകന് അർഹതയുള്ള നികുതിയിളവുകൾ എന്തുതന്നെയായാലും അത് അവരുടെ മൊത്തം വരുമാനത്തിൽ നിന്ന് കുറയ്‌ക്കും. നികുതിദായകർക്ക് അർഹതയുള്ള രണ്ട് പ്രധാന ഡിഡക്ഷനുകൾ, ആദായനികുതി നിയമത്തിലെ സ്റ്റാൻഡേർഡ് ഡിഡക്ഷനും ആദായനികുതി നിയമത്തിലെ സെക്ഷൻ 80-ന് കീഴിൽ വരുന്ന വിവിധ ഉപവകുപ്പുകൾ പ്രകാരമുള്ള മറ്റെല്ലാ കിഴിവുകളുമാണ്. അതായത് സെക്ഷൻ 80 (സി) പ്രകാരമുള്ള നിക്ഷേപങ്ങളും ചെലവുകളുമായ പ്രോവിഡന്റ് ഫണ്ട് (ഇപിഎഫ്, പിപിഎഫ്, വിപിഎഫ്), ട്യൂഷൻ ഫീസ്, ഇഎൽഎസ്എസ്, എൻ‌എസ്‌സി, ടാക്സ് സേവിംഗ്സ് ഫിക്സഡ് ഡെപ്പോസിറ്റ് (എഫ്ഡി) തുടങ്ങിയവയും. 80സി കൂടാതെ സെക്ഷൻ 80(ഡി), 80(ഇ), 80(ജി) എന്നിവ പ്രകാരമുള്ള മറ്റ് നിരവധി കിഴിവുകളും.

ടാക്‌സ് റിബേറ്റ്:

നികുതി അടയ്‌ക്കേണ്ടി വരുന്ന നിങ്ങളുടെ വരുമാനം കണ്ടെത്തിക്കഴിഞ്ഞാൽ, നിങ്ങളുടെ നികുതി ബാധ്യതയും കണക്കാക്കാം. എന്നാൽ ചില കേസുകളിൽ നികുതി ബാധ്യതയെക്കുറിച്ചുള്ള റിബേറ്റുകളും നികുതി വകുപ്പ് വാഗ്ദാനം ചെയ്യാറുണ്ട്. ഐടി നിയമത്തിലെ സെക്ഷൻ 87എ പ്രകാരം 5 ലക്ഷം രൂപയുടെ വരുമാന പരിധിയിലുള്ളവർക്ക് 2019-20 സാമ്പത്തിക വർഷത്തിൽ 12,500 രൂപ വരെ റിബേറ്റ് ക്ലെയിം ചെയ്യാം. അതായത് ഒരാളുടെ വരുമാനം 5 ലക്ഷം രൂപ വരെയാണെങ്കിൽ, അവർ നികുതി അടയ്ക്കാൻ ബാധ്യസ്ഥരല്ല.