വെറും 6.9% പലിശ നിരക്കിൽ ഭവനവായ്പ; എൽഐസി ഹൌസിംഗ് ഫിനാൻസ് വായ്പയെക്കുറിച്ച് അറിയാം

എൽഐസി ഹൌസിംഗ് ഫിനാൻസ് കുറഞ്ഞ നിരക്കിൽ ഭവന വായ്പയുമായി രംഗത്ത്. എൽ‌ഐ‌സി ഇപ്പോൾ 6.9% പലിശ നിരക്കിലാണ് വായ്പ വാഗ്ദാനം ചെയ്യുന്നത്. എച്ച്ഡി‌എഫ്‌സി, എസ്‌ബി‌ഐ എന്നിവയുൾപ്പെടെയുള്ള ബാങ്കുകൾ നിലവിൽ 6.95% വരെ പലിശ നിരക്കിലാണ് വായ്പ വാഗ്ദാനം ചെയ്യുന്നത്. പുതിയ ഭവന വായ്‌പ പദ്ധതി അനുസരിച്ച് പരമാവധി 50 ലക്ഷം രൂപ വരെ വായ്പ അനുവദിക്കുമെന്ന് എൽഐസി പ്രസ്താവനയിൽ പറഞ്ഞു.

എക്കാലത്തെയും താഴ്ന്ന പലിശ

സിബിൽ (ക്രെഡിറ്റ് ഇൻഫർമേഷൻ ബ്യൂറോ) സ്‌കോർ 700 ഉം അതിനുമുകളിലുള്ളതുമായ അപേക്ഷകർക്കാണ് 6.9 ശതമാനം നിരക്കിൽ ബാങ്ക് വായ്പ നൽകുന്നത്. ഭവനവായ്പ പലിശനിരക്ക് നിലവിൽ എക്കാലത്തെയും താഴ്ന്ന നിലയിലാണെന്നും വായ്പക്കാർക്ക് കുറഞ്ഞ ഇഎംഐ (തുല്യമായ പ്രതിമാസ ഗഡു) ലഭിക്കുമെന്നും എൽ‌ഐ‌സി‌എഫ്‌എൽ എം‌ഡിയും സി‌ഇ‌ഒയുമായ സിദ്ധാർത്ഥ മൊഹന്തി പറഞ്ഞു. ആകർഷകമായ പലിശ നിരക്കും താങ്ങാനാവുന്ന ഇഎംഐയും നിലവിൽ വീട് വാങ്ങാൻ പ്ലാൻ ചെയ്യുന്നവർക്ക് മികച്ച അവസരമാണ്.

ഗ്രിഹ വരിഷ്ട വായ്പ പദ്ധതി

പെൻഷൻകാർക്കായി ഹൌസിംഗ് ഫിനാൻസ് കമ്പനി ഗ്രിഹ വരിഷ്ട എന്ന പുതിയ വായ്പാ പദ്ധതി പുറത്തിറക്കിയിട്ടുണ്ട്. വായ്പയെടുക്കുന്നയാൾക്ക് 80 വയസ്സ് തികയുന്നത് വരെ അല്ലെങ്കിൽ 30 വർഷം വരെ (ഏതാണോ മുമ്പത്തേത് അതുവരെ) കാലാവധിയാണ് വായ്പയ്ക്കുള്ളത്. ഈ പെൻഷൻ പദ്ധതി പ്രകാരം പെൻഷന് അർഹതയുള്ളത് പി‌എസ്‌യു ഇൻഷുറർമാർ, കേന്ദ്ര / സംസ്ഥാന സർക്കാർ, റെയിൽ‌വേ, പ്രതിരോധം, ബാങ്കുകൾ എന്നിവിടങ്ങളിലെ വിരമിച്ച അല്ലെങ്കിൽ സേവനമനുഷ്ഠിക്കുന്ന ജീവനക്കാർക്കാണ് ഈ വായ്പ ലഭിക്കുക.

വായ്പ മാറ്റാം

നിങ്ങൾ നിലവിൽ വായ്‌പയെടുത്ത സ്ഥാപനത്തിൽ നിന്ന് നിങ്ങൾക്ക് മികച്ച നിരക്കല്ല ലഭിക്കുന്നതെങ്കിൽ. ആ വായ്‌പ, പലിശ നിരക്ക് കുറഞ്ഞ മറ്റൊരു ബാങ്ക് അല്ലെങ്കിൽ ധനകാര്യ സ്ഥാപനത്തിലേക്ക് മാറ്റാൻ കഴിയുന്ന ഒരു ഓപ്‌ഷനുണ്ട്. നിലവിലെ പലിശ നിരക്കിലും 50 ബേസിസ് പോയിൻറുകളോളം പലിശയിൽ കുറവ് ഉണ്ടെങ്കിലും നിങ്ങളുടെ വായ്പാ തിരിച്ചടവ് കാലാവധി 15 വര്‍ഷത്തിൽ താഴെയാണെങ്കിലും ഇത്തരത്തിൽ വായ്‌പ മാറ്റാം.