ജോലി കിട്ടി അഞ്ച് വർഷത്തിന് മുമ്പ് ഒരിയ്ക്കലും പി‌എഫിൽ നിന്ന് പണം പിൻവലിക്കരുത്, എന്തുകൊണ്ട്?

എംപ്ലോയീസ് പ്രൊവിഡന്റ് ഫണ്ട് (ഇപിഎഫ്) ഒരു ദീർഘകാല നിക്ഷേപ മാർഗമാണ്. ശമ്പളക്കാർക്ക് അവരുടെ വാർദ്ധക്യ കാലം സാമ്പത്തികമായി സുരക്ഷിതമാക്കാനുള്ള നിക്ഷേപ പദ്ധതിയാണിത്. എല്ലാ മാസവും ജീവനക്കാരനും തൊഴിലുടമയും ജീവനക്കാരുടെ അടിസ്ഥാന ശമ്പളത്തിന്റെ 12% പിഎഫ് അക്കൗണ്ടിലേക്ക് നിക്ഷേപിക്കുന്നു. ഈ തുക വിരമിക്കുന്ന സമയത്ത് ജീവനക്കാരന് ലഭിക്കും. എന്നാൽ, ചില വ്യവസ്ഥകളിൽ മേൽ ജോലിയിൽ തുടരുമ്പോൾ തന്നെ ഭാഗിക പിൻവലിക്കലും അനുവദനീയമാണ്.

നികുതി ആനുകൂല്യം

നിങ്ങൾ നിലവിൽ ജോലി ഉപേക്ഷിക്കാൻ ഒരുങ്ങുകയാണെങ്കിൽ, തീർച്ചയായും അറിയേണ്ട ചില നികുതി പ്രത്യാഘാതങ്ങളുണ്ട്. ഇപിഎഫിന് പ്രതിമാസ സംഭാവന നൽകുന്നത് വഴി ശമ്പളക്കാർക്ക് നിരവധി നികുതി ആനുകൂല്യങ്ങൾ ലഭിക്കുന്നുണ്ട്. എന്നാൽ ജോലിയിൽ നിന്ന് രാജി വച്ചതിന് ശേഷം ഇപിഎഫ് പിൻവലിക്കൽ നടത്തുകയാണെങ്കിൽ പിന്നീട് നികുതി ആനുകൂല്യങ്ങൾ ലഭിക്കില്ല.

തുടർച്ചയായ അഞ്ച് വർഷം

നികുതി പ്രത്യാഘാതങ്ങൾ ഒരു വ്യക്തിയുടെ സേവന വർഷത്തെ ആശ്രയിച്ചിരിക്കും. ഇപിഎഫ് പിൻവലിക്കൽ നിയമങ്ങൾ അനുസരിച്ച്, നികുതി സംബന്ധമായ കാര്യങ്ങൾക്ക് ജീവനക്കാരുടെ 5 വർഷത്തെ തുടർച്ചയായ സേവനം കണക്കിലെടുക്കും. ഇവിടെ തുടർച്ചയായ സേവനം എന്നതിനർത്ഥം പി‌എഫ് അംഗത്വത്തിൽ യാതൊരു ഇടവേളയുമില്ലാതെ തുടരുന്നു എന്നതാണ്. അതായത് ഒന്നോ അതിലധികമോ സ്ഥാപനങ്ങളിൽ ജോലി ചെയ്താലും പിഎഫ് അംഗത്വത്തിൽ ഇടവേളകൾ ഉണ്ടാകാൻ പാടില്ല.

നികുതി രഹിത പിൻവലിക്കൽ

5 വർഷത്തെ തുടർച്ചയായ സേവനത്തിന് ശേഷം ഒരു വ്യക്തി പി‌എഫ് പിൻവലിക്കുമ്പോൾ, നികുതി പ്രത്യാഘാതങ്ങളൊന്നുമില്ല. പി‌എഫ് മെച്യൂരിറ്റി തുക നികുതി രഹിതമായി തന്നെ പിൻ‌വലിക്കുന്ന വർഷത്തിൽ ജീവനക്കാരന്റെ കയ്യിൽ ലഭിക്കും. എന്നാൽ, 5 വർഷത്തെ സേവനത്തിന് മുമ്പായി ആരെങ്കിലും പി‌എഫ് തുക പിൻ‌വലിക്കുകയാണെങ്കിൽ‌, ജീവനക്കാരുടെ സംഭാവന, ജീവനക്കാരുടെ സംഭാവനയിലൂടെ നേടിയ പലിശ, തൊഴിലുടമയുടെ സംഭാവന, തൊഴിലുടമയുടെ സംഭാവനയിൽ നിന്ന് നേടിയ പലിശ എന്നിവയ്ക്ക് നികുതി ബാധകമാണ്.

പുതിയ ശുപാർശ

ജീവനക്കാരുടെ ഇപിഎഫ് വിഹിതം കുറയ്ക്കാന്‍ കേന്ദ്ര തൊഴില്‍ മന്ത്രാലയം ശുപാര്‍ശ ചെയ്തിട്ടുണ്ട്. ഇതോടെ കയ്യില്‍ കിട്ടുന്ന ശമ്പളം വര്‍ധിക്കും. അതേസമയം,തൊഴിലുടമയുടെ വിഹിതത്തില്‍ മാറ്റം വരുത്തില്ല. എംപ്ലോയീസ് പ്രൊവിഡന്റ് ഫണ്ട് ആന്റ് മിസില്ലേനിയസ് ബില്‍ 2019ന്റെ ഭാഗമായണ് നിര്‍ദേശം മുന്നോട്ടുവെച്ചിട്ടുള്ളത്.