ന്യൂഡല്‍ഹി: പോസ്‌റ്റോഫീസിലൂടെ കത്ത് മാത്രമല്ല പരിപ്പും വരും. വിലക്കയറ്റം തടയാന്‍ പരിപ്പും പയറുവര്‍ഗങ്ങളും തപാല്‍ ഓഫീസുകള്‍ വഴി അയയ്ക്കാന്‍ കേന്ദ്രസര്‍ക്കാര്‍ ഒരുങ്ങുകയാണ്.

സര്‍ക്കാരിന്റെ വിപണശാലകളില്ലാത്ത സ്ഥലങ്ങളിലെല്ലാം പോസ്‌റ്റോഫീസുകളിലൂടെ കുറഞ്ഞ വിലയില്‍ സാധനങ്ങള്‍ ലഭ്യമാക്കും.ആദ്യ ഘട്ടത്തില്‍ സാമ്പാര്‍ പരിപ്പ്, ഉഴുന്നുപരിപ്പ്, കടല, കടലപ്പരിപ്പ്് എന്നിവയാണ് പോസ്‌റ്റോഫീസുകളിലെത്തിക്കുക.

ദീപാവലിക്ക് മുന്‍പ് പരീക്ഷണാടിസ്ഥാനത്തില്‍ ഇതിനുള്ള നടപടിയാരംഭിക്കും. പയര്‍ പരിപ്പ് വര്‍ഗങ്ങളുടെ കരുതല്‍ ശേഖരത്തില്‍ നിന്നായിരിക്കും പോസ്‌റ്റോഫീസില്‍ വില്‍ക്കാന്‍ സാധനങ്ങളെത്തിക്കുക.

കേന്ദ്ര ഉപഭോക്തൃമന്ത്രാലയ സെക്രട്ടറി ഹേം പാണ്ഡേയുടെ അധ്യക്ഷതയില്‍ ചേര്‍ന്ന ഉന്നതതല യോഗത്തിലാണു തീരുമാനമെടുത്തത്. ഉത്സവകാലത്ത് ആവശ്യ സാധനങ്ങളുടെ വില ക്രമാതീതമായി വര്‍ധിക്കുന്നത് പതിവാണെന്ന് യോഗം വിലയിരുത്തിയിരുന്നു.