കൊച്ചി: ജെറ്റ് എയര്‍വേസില്‍ പുതിയ സര്‍വീസുകള്‍. കൊച്ചിയില്‍ നിന്നും ഡല്‍ഹിയിലേക്കാണ് പുതിയ സര്‍വീസാരംഭിക്കുന്നത്. ഒക്ടോബര്‍ 30നാണ് സര്‍വീസ് ആരംഭിക്കുക. ദിവസവും രാവിലെ 6.45ന് കൊച്ചിയില്‍ നിന്നും പുറപ്പെടുന്ന വിമാനം 9.50ന് ഡല്‍ഹിയിലെത്തും.

വൈകീട്ട് 4.05ന് ഡല്‍ഹിയില്‍ നിന്നും മടങ്ങി രാത്രി 7.15ന് കൊച്ചിയിലെത്തും. 30 മുതല്‍ മുംബൈ-ഡല്‍ഹി, ഡല്‍ഹി-കൊല്‍ക്കത്ത റൂട്ടുകളിലും തിരിച്ചും എയര്‍ബസ് എ330 വിമാന സര്‍വീസാരംഭിക്കുമെന്ന് ജെറ്റ് അറിയിച്ചു.

ഡല്‍ഹി-കൊല്‍ക്കത്ത, കൊല്‍ക്കത്ത-ബെംഗളൂരു റൂട്ടുകളില്‍ അധിക സര്‍വീസുകള്‍ ആരംഭിക്കാനും ജെറ്റ് എയര്‍വേസ് തീരുമാനിച്ചിട്ടുണ്ട്.

കൊച്ചി-ഡല്‍ഹി വിമാനസര്‍വീസിലൂടെ യാത്രക്കാര്‍ക്ക് രാജ്യത്തിന്റെ മറ്റ് ഭാഗങ്ങളിലേക്കും വിദേശത്തേക്കും കണക്ഷന്‍ ഫ്‌ളൈറ്റുകള്‍ ലഭ്യമാകുമെന്ന് ജെറ്റ് എയര്‍വേസ് സിസിഒ ജയരാജ് ഷണ്‍മുഖം വ്യക്തമാക്കി.