ജിഎസ്ടി പ്രാബല്യത്തിൽ വന്നതോടെ ഇനി മൊബൈൽ വരിക്കാർക്ക് ചിലവേറും. 15 ശതമാനമായിരുന്ന ടെലികോം സേവന നികുതിയാണ് ഇപ്പോൾ 18 ശതമാനമായിരിക്കുകയാണ്.
അതായത് 100 രൂപയ്ക്ക് റീചാർജ് ചെയ്താൽ 83 രൂപയുടെ ടോക് ടൈമാണ് ഇപ്പോൾ ശരാശരി ലഭിക്കുന്നത്. എന്നാൽ ഇനി മുതൽ അത് 80 രൂപയായി കുറയും. പ്രതിമാസം 1000 രൂപയ്ക്ക് മൊബൈൽ റീചാർജ് ചെയ്യുന്നവർക്ക് ഇനി മുതൽ 1030 രൂപ ചെലവാകും. പോസ്റ്റ് പെയ്ഡ്, പ്രീ പെയ്ഡ് ഉപഭോക്താക്കൾക്കും ഇത് ബാധകമാണ്.
ടെലികോം കമ്പനികൾ തമ്മിൽ കടുത്ത മത്സരം നടക്കുന്നതിനാൽ വരിക്കാരെ പിടിച്ചു നിർത്താൻ പുതിയ ഓഫറുകൾ ലഭിക്കുമോ എന്നാണ് ഇനി കണ്ടറിയേണ്ടത്. മൊബൈൽ ഫോണുകളുടെ വിലയിലും വർദ്ധനവ് ഉണ്ടാകാനാണ് സാധ്യത. മൊബൈൽ ഫോണിന്റെ നികുതി 12 ശതമാനമായി നിശ്ചയിച്ചതോടെ മിക്ക ഫോണുകളുടെയും നികുതി 4 മുതൽ 5 ശതമാനം വരെ വർദ്ധിച്ചിട്ടുണ്ട്.
ലാപ്ടോപ്, ഡിജിറ്റല് ക്യാമറ തുടങ്ങിയവയുടെ വിലയും വർദ്ധിക്കും. 14-15 ശതമാനം വരെ നികുതി ഉണ്ടായിരുന്ന ഇവയ്ക്ക് 18 ശതമാനം ജിഎസ്ടിയാണ് ചുമത്തിയിരിക്കുന്നത്. ഡിജിറ്റല് ക്യാമറയും ക്യാംകോഡറുകളും ഉള്പ്പെടെയുള്ളവയും 28 ശതമാനം കാറ്റഗറിയിലാണ്.
malayalam.goodreturns.in