നിത്യോപയോഗ സാധനങ്ങളുടെ ജിഎസ്​ടിയിൽ കുറവ്​ വരുത്തിയതിന്​ പിന്നാലെ ഗൃഹോപകരണങ്ങളുടെ നികുതിയും കേന്ദ്രസർക്കാർ കുറക്കുന്നു. വാഷിങ്​ മെഷീൻ, റഫ്രിജറേറ്റർ എന്നിവയുടെ നികുതി കുറക്കാനാണ്​ ആലോചന.

ഇവയെ ഉയർന്ന നികുതി പരിധിയായ 28 ശതമാനത്തിൽ നിന്ന്​ ഒഴിവാക്കാനുള്ള തീരുമാനം അടുത്ത ജി.എസ്​.ടി കൗൺസിൽ യോഗത്തിൽ പരിഗണിക്കുമെന്ന് ഉന്നത ഉദ്യോഗസ്ഥർ അറിയിച്ചു. സ്​ത്രീകളുടെ ജോലി ഭാരം കുറക്കാൻ സഹായിക്കുന്നതാണ്​ ഇത്തരം ഉപകരണങ്ങൾ എന്ന കാരണത്താലാണ് ഇക്കാര്യത്തിൽ പുനരാലോചന നടത്താൻ​ സർക്കാറിനെ പ്രേരിപ്പിക്കുന്നത്​.

ജിഎസ്​ടി നടപ്പാക്കിയ മറ്റ്​ രാജ്യങ്ങളിലും ഇത്തരം ഉൽപന്നങ്ങൾക്ക്​ കുറഞ്ഞ നികുതിയാണ്​ ഇൗടാക്കുന്നത്​. എയർ കണ്ടീഷനർ അടക്കമുള്ള ചില ഉപകരണങ്ങളുടെ നികുതിയും സർക്കാർ കുറച്ചേക്കും.

ഗൃഹോപകരണങ്ങൾക്ക്​ ഉയർന്ന നികുതി ഇൗടാക്കുന്നത്​ വിപണിക്ക്​ തിരിച്ചടിയായിരുന്നു. ഗുവാഹത്തിയിൽ നടന്ന ജിഎസ്​ടി കൗൺസിൽ യോഗത്തിൽ 177 സാധനങ്ങൾ ഉയർന്ന നികുതി പരിധിയായ 28 ശതമാനത്തിൽ നിന്ന്​ മാറ്റാനാണ്​ സർക്കാർ തീരുമാനിച്ചത്​. റെസ്​റ്റോറൻറുകളുടെ നികുതിയും സർക്കാർ കുറച്ചിരുന്നു.

malayalam.goodreturns.in