ടെലികോം വരിക്കാരുടെ എണ്ണത്തിൽ വൻ കുറവ്. ഒക്ടോബറിലെ കണക്കനുസരിച്ച് 1.75 കോടി മൊബൈൽ ഉപഭോക്താക്കളെയാണ് നഷ്ടമായത്. ഇതോടെ ആകെ ടെലികോം വരിക്കാരുടെ എണ്ണം 120.1 കോടിയായതായി ടെലികോം റെഗുലേറ്റർ ട്രായ് വ്യക്തമാക്കി.

എന്നാൽ ടെലികോം മേഖലയിലെ പ്രമുഖരായ റിലയൻസ് ജിയോ, ഭാരതി എയർടെൽ, വൊഡാഫോൺ, ഐഡിയ സെല്ലുലാർ, ബിഎസ്എൻഎൽ എന്നിവ സംയുക്തമായി 1.26 കോടി പുതിയ ഉപഭോക്താക്കളെയാണ് ഒക്ടോബറിൽ കൂട്ടിച്ചേർത്തിട്ടുള്ളത്.

ടെലികോം വരിക്കാരുടെ എണ്ണം സെപ്റ്റംബറിൽ 1,206.71 മില്യൺ ആയിരുന്നു. എന്നാൽ ഒക്ടോബറിൽ ഇത് 1,201.72 മില്യണായി കുറഞ്ഞെന്ന് ട്രായുടെ കണക്കുകൾ സൂചിപ്പിക്കുന്നു.

നഗരപ്രദേശങ്ങളിലെ കണക്ഷനുകളുടെ എണ്ണം ഒക്റ്റോബറിൽ 69.75 കോടിയായി കുറഞ്ഞു. സെപ്റ്റംബറിൽ ഇത് 70.48 കോടിയായിരുന്നു. അതേസമയം, ഇതേ കാലയളവിൽ ഗ്രാമ പ്രദേശങ്ങളിലെ വരിക്കാരുടെ എണ്ണം 50.18 കോടിയിൽ നിന്ന് 50.41 കോടിയായി ഉയർന്നിട്ടുണ്ട്.

malayalam.goodreturns.in