ഫെബ്രുവരി 1ന് ധനമന്ത്രി അരുൺ ജയ്റ്റ്ലി അവതരിപ്പിക്കാനിരിക്കുന്ന യൂണിയൻ ബജറ്റിൽ ക‍ർഷകർക്കും യുവാക്കൾക്കും പ്രതീക്ഷയ്ക്ക് വക. തൊഴിൽ അവസരങ്ങൾ, സാമൂഹ്യക്ഷേമപദ്ധതികൾ, കൃഷി വരുമാനം ഇരട്ടിപ്പിക്കൽ എന്നിവ 2022 ഓടെ പൂ‍ർത്തീകരിക്കുകയാണ് കേന്ദ്ര സർക്കാരിന്റെ ലക്ഷ്യം.

യുവജനങ്ങളുടെ തൊഴിൽ സംബന്ധിച്ച ആശങ്കകൾ പരിഹരിക്കുന്നതിനാകും പ്രഥമ പരി​ഗണനയെന്നാണ് സാമ്പത്തിക വിദ​ഗ്ധരുടെ വിലയിരുത്തൽ. കഴിഞ്ഞ നാലു ബജറ്റികളിലും മോദി സർക്കാ‍ർ കർഷകർ, പാവപ്പെട്ടവർ, യുവജനങ്ങൾ എന്നിവർക്കാണ് ബജറ്റിൽ കൂടുതൽ തുക വകയിരുത്തിയതെന്നും ഈ വർഷവും അതിൽ മാറ്റമുണ്ടാകാൻ സാധ്യതയില്ലെന്നും ഇവ‍ർ പറയുന്നു.

കഴിഞ്ഞ ബജറ്റിൽ ഒരു കോടി വീടുകളെയും 50,000 ഗ്രാമ പഞ്ചായത്തുകളെയും ദാരിദ്ര്യരേഖയ്ക്ക് മുകളിലേയ്ക്ക് ഉയ‍ർത്തുന്നതിനുള്ള പദ്ധതി ജയ്റ്റ്ലി പ്രഖ്യാപിച്ചിരുന്നു. 2019 ഓടെ ഈ ലക്ഷ്യത്തിൽ എത്തുമെന്നാണ് സർക്കാരിന്റെ വാഗ്ദാനം.

കൂടാതെ എൻഡിഎ സർക്കാരിന്റെ തിരഞ്ഞെടുപ്പ് വാഗ്ദാനങ്ങളിലൊന്നാണ് യുവാക്കൾക്ക് തൊഴിലവസരങ്ങൾ സൃഷ്ടിക്കുമെന്നത്. ഈ ബജറ്റിലും അതിനായുള്ള പദ്ധതികൾ ഉണ്ടാകുമെന്നാണ് പ്രതീക്ഷ.

malayalam.goodreturns.in