കഴിഞ്ഞ അഞ്ച്​ വർഷത്തിനിടെ രാജ്യത്ത്​ ഒരു ലക്ഷം കോടി രൂപയുടെ ബാങ്ക്​ തട്ടിപ്പ്​ നടന്നുവെന്ന്​ റിസർവ്​ ബാങ്ക്​. വിവരാവകാശ നിയമപ്രകാരമുള്ള അപേക്ഷയിലാണ്​ രാജ്യത്തെ ബാങ്ക്​ തട്ടിപ്പുകളെ സംബന്ധിച്ചുള്ള ഞെട്ടിപ്പിക്കുന്നു വിവരങ്ങൾ ആർബിഐ പുറത്ത്​ വിട്ടത്​.

2013 മുതൽ 2018 വരെയുള്ള വർഷങ്ങളിലെ തട്ടിപ്പ്​ കേസുകളുടെ വിവരങ്ങളാണ്​ ആർബിഐ പുറത്ത്​ വിട്ടിരിക്കുന്നത്​. 2013- 14 സാമ്പത്തിക വർഷത്തിൽ 4,306 കേസുകൾ ശ്രദ്ധയിൽപെട്ടു. ആകെ നഷ്​ടം 10,170 കോടി.

2014-15ൽ കേസുകളുടെ എണ്ണം 4,639 ആയി. 2015-16ൽ ഇത്​ 4,693 ആയും 2016-17ൽ 5,076 ആയും വർദ്ധിച്ചുവെന്നാണ് വിവരം. 2017 ഏപ്രിൽ മുതൽ 2018 മാർച്ച്​ ഒന്ന്​ വരെയുള്ള കേസുകളുടെ എണ്ണം 5,152 ആണ്​. ഏകദേശം 1,00,718 കോടി രൂപയാണ്​ അഞ്ച്​ വർഷത്തിനുള്ളിൽ ബാങ്ക്​ തട്ടിപ്പുകളിലുടെ നഷ്​ടമായത്​.

കൂടുതൽ ബാങ്ക്​ തട്ടിപ്പ്​ കേസുകൾ പരിശോധിച്ച്​ വരികയാണെന്നും ഉചിതമായ നടപടി ഉണ്ടാകുമെന്നും ആർബിഐ വ്യക്​തമാക്കിയിട്ടുണ്ട്​. അടുത്തിടെ പുറത്തു വന്ന ഏറ്റവും വലിയ ബാങ്ക് തട്ടിപ്പായിരുന്നു പഞ്ചാബ് നാഷണൽ ബാങ്കിൽ വജ്ര വ്യാപാരി നീരവ് മോദി നടത്തിയ തട്ടിപ്പ്. അതിന് ശേഷം നിരവധി തട്ടിപ്പു വിവരങ്ങൾ പുറത്തു വന്നിരുന്നു.

malayalam.goodreturns.in