മുംബൈ: കേന്ദ്രസര്‍ക്കാരിന് ആശ്വാസമായി ജിഎസ്ടി വരുമാനത്തില്‍ ജനുവരി മാസം വന്‍ വര്‍ധന രേഖപ്പെടുത്തി. ആകെ 1,02,503 കോടി രൂപയാണ് ചരക്കു സേവന നികുതിയായി 2019ലെ ആദ്യമാസത്തില്‍ പിരിഞ്ഞു കിട്ടിയത്. സംസ്ഥാനങ്ങളില്‍ നിന്നുള്ള എസ്ജിഎസ്ടിയായി 24,826 കോടിയും കേന്ദ്ര സിജിഎസ്ടി ഇനത്തില്‍ 17,763 കോടിയും ലഭിച്ചു. ഇന്റഗ്രേറ്റഡ് ജിഎസ്ടി ഇനത്തില്‍ 51,225 കോടിയും സെസ് ഇനത്തില്‍ 8,690 കോടിയുമാണ് കലക്ഷന്‍. ഡിസംബറിലെ ജിഎസ്ടിആര്‍ 3ബി റിട്ടേണ്‍ ഫയല്‍ ചെയ്തതില്‍ ജനുവരി 31 വരെ 73.3 ലക്ഷം രൂപയാണ് ലഭിച്ചതെന്നും കണക്കുകള്‍ വ്യക്തമാക്കുന്നു.

2018-19 സാമ്പത്തിക വര്‍ഷത്തില്‍ ഇത് മൂന്നാം തവണയാണ് ജിഎസ്ടി ഒരു ലക്ഷം കോടി കടക്കുന്നത്. ഡിസംബറിലെ ജിഎസ്ടി വരുമാനം കുറഞ്ഞത് സര്‍ക്കാരിനെ പ്രതിസന്ധിയിലാക്കിയതിനു പിന്നാലെയാണ് തൊട്ടടുത്ത മാസം ഇത് ഒരു ലക്ഷം കോടിയെന്ന കടമ്പ കടക്കുന്നത്. ഡിസംബറില്‍ 94726 കോടിയായിരുന്നു കലക്ഷന്‍. നവംബറില്‍ ലഭിച്ച നികുതിയേക്കാള്‍ കുറവായിരുന്നു ഡിസംബറിലേത്. നവംബറില്‍ 97,637 കോടി രൂപയാണ് നികുതിയായി ലഭിച്ചത്. ഒക്ടോബറിലാണ് ജിഎസ്ടി വരുമാനം ഇതിനു മുമ്പ് ഒരു ലക്ഷം കോടി കടന്നത്. 1,00,710 കോടി രൂപയായിരുന്നു ഒക്ടോബറിലെ കലക്ഷന്‍.

കഴിഞ്ഞ വര്‍ഷം ജനുവരിയെക്കാള്‍ 14 ശതമാനം വര്‍ധനവ് ജിഎസ്ടി വരുമാനത്തില്‍ ഉണ്ടായതായി അധികൃതര്‍ അറിയിച്ചു. 89,825 കോടി രൂപയായിരുന്നു 2018 ജനുവരിയിലേത്. അതുപോലെ കഴിഞ്ഞ മൂന്ന് മാസത്തെ ജിഎസ്ടി വരുമാനം മുന്‍വര്‍ഷത്തിലെ ഇതേ കാലയളവിനേക്കാള്‍ 14 ശതമാനം കൂടുതലാണെന്നും കേന്ദ്ര സര്‍ക്കാര്‍ പുറത്തുവിട്ട കണക്കുകള്‍ വ്യക്തമാക്കി.