ബാങ്കിം​ഗ് മേഖലയിലെ അടുത്ത ലയനം ഉടൻ ഉണ്ടാകും. ലക്ഷ്മി വിലാസ് ബാങ്ക്, ഇന്ത്യ ബുൾസ് ഹൗസിം​ഗ് ഫിനാൻസുമായി ലയിക്കുന്നതിനുള്ള ബോർഡ് അംഗീകാരം ഇന്നലെ ലഭിച്ചു. ലക്ഷ്മി വിലാസ് ബാങ്ക് ഓഹരി ഉടമകൾക്ക് ഓരോ 10 രൂപയുടെ ഷെയറിനും ഇന്ത്യ ബുൾസ് ഹൗസിം​ഗ് ഫിനാൻസിന്റെ 0.14 ഓഹരികൾ രണ്ട് രൂപ മുഖവിലയ്ക്ക് ലഭിക്കും.

അതായത് ലക്ഷ്മി വിലാസ് ബാങ്കിൽ 100 ഷെയറുള്ള ഒരാൾക്ക് ഇന്ത്യ ബുൾസ് ഹൗസിം​ഗ് ഫിനാൻസിന്റെ 14 ഓഹരികൾ ലഭിക്കും. ലയന നടപടികൾ പൂർത്തിയാകുന്നതോടെ 19,472 കോടിയുടെ ഒറ്റ സ്ഥാപനമായി ഇരു ബാങ്കുകളും മാറും.

14,302 ജീവനക്കാരും 1.23 ലക്ഷം കോടി രൂപയുടെ വായ്പയുമാണ് പിന്നീട് ഇരു ബാങ്കുകൾക്കും കൂടിയുണ്ടാകുക. 6 മുതൽ 12 മാസത്തിനുള്ളിൽ ലയനം പൂർത്തീകരിക്കാൻ സാധിക്കുമെന്ന് ഇന്ത്യ ബുൾസ് ഹൗസിംഗ് ഫിനാൻസ് വൈസ് ചെയർമാനും മാനേജിങ് ഡയറക്ടറുമായ ഗഗൻ ബംഗ പറഞ്ഞു.

ലയനം പൂർത്തിയായാൽ 800ഓളം ശാഖകൾ സ്ഥാപനത്തിന് ഉണ്ടാകുമെന്നും 40,000 കോടി രൂപയുടെ മാർക്കറ്റ് ക്യാപിറ്റലൈസേഷൻ ഉള്ള 8-ാമത്തെ ഏറ്റവും വലിയ സ്വകാര്യ ബാങ്കായി മാറുമെന്നും ബംഗ പറഞ്ഞു.

malayalam.goodreturns.in