തൊഴിലവസരങ്ങൾ

റിപ്പോർട്ട് അനുസരിച്ച് 2015 ഏപ്രിൽ മുതൽ 2017 ഡിസംബർ വരെ 1.12 കോടി അധിക തൊഴിലവസരങ്ങൾ സൃഷ്ടിക്കപ്പെട്ടുവെന്നും കണ്ടെത്തി. ഇതിൽ 51.06 ലക്ഷം പേർ സ്വയം തൊഴിൽ ചെയ്യുന്നവരോ ജോലി ചെയ്യുന്ന ഉടമകളോ ആണ്. 60.94 ലക്ഷം പേർ ജോലിക്കാരോ കൂലിപ്പണിക്കാരോ ആണ്. ഇത് കണക്കിലെടുക്കുമ്പോൾ, 33 മാസത്തിനുള്ളിൽ അധിക ജോലികളുടെ എണ്ണം മൊത്തം വായ്പകളുടെ 10 ശതമാനത്തിൽ കുറവാണ്.

പ്രധാന കണ്ടെത്തലുകൾ

2019 മാർച്ച് 27 ലെ കരട് റിപ്പോർട്ടാണ് ഇന്ത്യൻ എക്സ്പ്രസിന് ലഭിച്ചിരിക്കുന്നത്. 97,000 ഗുണഭോക്താക്കളിലാണ് സർവേ നടത്തിയിരിക്കുന്നത്. 2018 ഏപ്രിൽ മുതൽ നവംബർ വരെയുള്ള കണക്കുകളാണിത്. സർവ്വേയിലെ പ്രധാന കണ്ടെത്തലുകൾ പരിശോധിക്കാം.

വായ്പാ തുക

മുദ്ര ലോൺ മൂന്ന് വിഭാഗങ്ങളായ ശിശു, കിഷോർ, തരുൺ എന്നിവ പ്രകാരം മൊത്തം 5.71 ലക്ഷം കോടി രൂപ വായ്പ അനുവദിച്ചിട്ടുണ്ട്. ആദ്യ മൂന്ന് വർഷങ്ങളിൽ 12.27 കോടി വായ്പ അക്കൗണ്ടുകളിലൂടെയാണ് വായ്പ വിതരണം ചെയ്തത്. ശരാശരി വായ്പാ തുക 46,536 രൂപയാണ്.
2017-18 ൽ അനുവദിച്ച മൊത്തം വായ്പ തുകയുടെ 42% ശിശു വായ്പകൾ (50,000 രൂപ വരെ) ആണ്. 34% കിഷോർ (50,000 മുതൽ 5 ലക്ഷം രൂപ വരെ) വായ്പകൾ. തരുൺ വായ്പകൾ (5 ലക്ഷം മുതൽ 10 ലക്ഷം രൂപ വരെ) ബാക്കി 24% വരും.

തൊഴിൽ സൃഷ്ടിച്ചവ

66% ശിശു വായ്പകളാണ് പുതിയ ജോലി സൃഷ്ടിച്ചത്. കിഷോർ 18.85% പുതിയ ജോലികളും തരുൺ 15.51 ശതമാനവും സൃഷ്ടിച്ചു. ഫലത്തിൽ, സൃഷ്ടിച്ച ഓരോ അധിക ജോലിക്കും വായ്പ 5.1 ലക്ഷം രൂപയായി വർധിക്കും. തൊഴിലവസരങ്ങൾ സൃഷ്ടിക്കുന്നതിലുള്ള കാലതാമസമാണ് ഇതിന് കാരണമെന്ന് വിദ​ഗ്ധർ പറയുന്നു.

മുദ്ര യോജന

2015 ഏപ്രിലിലാണ് കേന്ദ്ര സർക്കാർ മുദ്ര യോജന ആരംഭിക്കുന്നത്. കോർപ്പറേറ്റ് ഇതര ചെറുകിട വ്യവസായ മേഖലയ്ക്ക് ബാങ്കുകൾ, എൻ‌ബി‌എഫ്‌സി, മൈക്രോ ഫിനാൻസ് സ്ഥാപനങ്ങൾ (എം‌എഫ്‌ഐ) പോലുള്ള വിവിധ ധനകാര്യ സ്ഥാപനങ്ങൾ വഴി ധനസഹായം നൽകുന്നതിനായുള്ളതാണ് ഈ പദ്ധതി. മുദ്രാ യോജന വഴി ചെറുകിട സംരംഭകര്‍ക്ക് പത്തുലക്ഷം രൂപ വരെയാണ് മുദ്രബാങ്ക് വായ്പ നല്‍കുക.