പ്രത്യേക സമിതി

അനധികൃതമായി ജോലി ചെയ്യുന്ന വിദേശ തൊഴിലാളികളെയും നിയമവിരുദ്ധമായി ജോലി ചെയ്യുന്ന പ്രവാസികളെ സഹായിക്കുന്ന തൊഴിലുടമകളെയും കണ്ടെത്തുകയാണ് പ്രത്യേക സമിതിയുടെ ലക്ഷ്യം. മാനവ വിഭവശേഷി മന്ത്രാലയവും സെൻട്രൽ ബാങ്ക് ഓഫ് ഒമാനും ചേർന്ന് രൂപീകരിച്ചിരിക്കുന്നതാണ് പ്രത്യേക സമിതി. ടൈംസ് ഓഫ് ഒമാനിലെ റിപ്പോർട്ടുകൾ പ്രകാരം അനധികൃത തൊഴിലാളികൾ സുഹൃത്തുക്കൾ വഴിയോ അല്ലെങ്കിൽ കുടുംബത്തിലെ അംഗങ്ങൾ വഴിയോ ആണ് പണം കൈമാറ്റം ചെയ്യുന്നത്.

കർശന നിയമ നടപടികൾ

അനധികൃത പണമിടപാടുകൾ നടത്തുന്നവർക്ക് കർശന നിയമ നടപടികൾ നേരിടേണ്ടി വരുമെന്നും മന്ത്രാലയം മുന്നറിയിപ്പ് നല്‍കി. വിസയും മറ്റ് രേഖകളുമില്ലാതെ തൊഴിൽ നിയമം ലംഘിച്ചു ഒമാനിൽ തങ്ങുന്ന വിദേശികൾ, തങ്ങളുടെ സുഹൃത്തുക്കളുടെയും ബന്ധുക്കളുടെയും സാധുവായ രേഖകൾ ഉപയോഗിച്ച് പണമിടപാടുകൾ നടത്തുന്നത് അധികൃതരുടെ ശ്രദ്ധയിൽപെട്ടതോടെയാണ് നടപടി. ഇത്തരം പണമിടപാടുകൾ നിയമ വിരുദ്ധമാണെന്നും കർശന നിയമ നടപടികൾ നേരിടേണ്ടി വരുമെന്നും മന്ത്രാലയം അറിയിച്ചു.

നിയമ ലംഘനങ്ങൾ

രാജ്യത്തെ തൊഴിൽ നിയമം ലംഘിച്ചതിനാണ് നിരവധി പ്രവാസികൾ അറസ്റ്റിലായിരിക്കുന്നത്. തൊഴിൽ നിയമങ്ങൾ ലംഘിച്ചതിന് അറസ്റ്റിലായ ഭൂരിഭാഗം പ്രവാസികളും ജോലി സ്ഥലത്ത് നിന്ന് ഒളിച്ചോടിയ തൊഴിലാളികളാണ്. പിടിയിലായവരിൽ 51.3 ശതമാനം പേർ ജോലിസ്ഥലം വിട്ടിട്ടുണ്ട്. 12,524 ഓളം പേർ ഇത്തരത്തിൽ അറസ്റ്റിലായിട്ടുണ്ട്. 8,509 ഓളം പേരെ നിയനം ലംഘിച്ചതിന് പിരിച്ചുവിട്ടിട്ടുണ്ട്. 3,363 പേർ രാജ്യത്ത് ടൂറിസ്റ്റ് വിസയിൽ എത്തുകയും നിയമവിരുദ്ധമായി ജോലി ചെയ്തും വരുന്നുണ്ടെന്ന് അധികൃതർ വ്യക്തമാക്കി.

പരിശോധനകൾ കർശനം

ഈ വർഷം സെപ്റ്റംബർ വരെ ഒളിച്ചോടിയ 1,009 തൊഴിലാളികളെ അറസ്റ്റ് ചെയ്തിട്ടുണ്ട്. ചില ഒമാനി സ്പോൺസർമാർ അവരുടെ പ്രവാസി തൊഴിലാളികളെ മറ്റ് ജോലി ചെയ്യാൻ അനുവദിക്കുന്നതായും റിപ്പോർട്ടുകൾ പുറത്തു വന്നിരുന്നു, ഇത് രാജ്യത്തെ തൊഴിൽ നിയമ ലംഘനമാണ്. തൊഴിൽ നിയമം ലംഘിക്കുന്നവരെയും അനധികൃത പണമിടപാടുകൾ നടത്തുന്നവരെയും പിടികൂടാൻ രാജ്യത്ത് പരിശോധനയും കർശനമാക്കിയിട്ടുണ്ട്.