2020ൽ 5 ലക്ഷം കോടി രൂപയുടെ വിപണി മൂല്യത്തിലേയ്ക്ക് ഉയ‍ർന്ന അഞ്ച് കമ്പനികൾ

ഡിസംബർ അവസാനത്തോടെ വിദേശ നിക്ഷേപകർ 18.5 ബില്യൺ ഡോളർ ഇന്ത്യൻ ഓഹരി വിപണിയിൽ നിക്ഷേപം നടത്തി. ഈ സാഹചര്യത്തിൽ അഞ്ച് ലക്ഷം കോടി രൂപയുടെ മൂല്യമുള്ള ഇന്ത്യയിലെ അഞ്ച് കമ്പനികൾ ഏതെല്ലാമാണെന്ന് നോക്കാം. ഹിന്ദുസ്ഥാൻ യൂണിലിവർ ലിമിറ്റഡും ഇൻഫോസിസ് ലിമിറ്റഡും ഈ വർഷം 5 ലക്ഷം കോടി രൂപയുടെ വിപണി മൂല്യ ക്ലബിൽ പ്രവേശിച്ചു. റിലയൻസ് ഇൻഡസ്ട്രീസ് ലിമിറ്റഡ്, ടാറ്റ കൺസൾട്ടൻസി സർവീസസ് ലിമിറ്റഡ്, എച്ച്ഡിഎഫ്സി ബാങ്ക് ലിമിറ്റഡ് എന്നിവയും പട്ടികയിൽപ്പെടുന്നു.

2020ലെ നേട്ടം

2020ൽ ഈ കമ്പനികളുടെ ഓഹരികൾ 9-68% വരെയാണ് ഉയർന്നത്. 12.64 ലക്ഷം കോടി രൂപയുടെ വിപണി മൂല്യമുള്ള മുകേഷ് അംബാനിയുടെ റിലയൻസ് ഇൻഡസ്ട്രീസ്, ടാറ്റാ കൺസൾട്ടൻസി 10.91 ലക്ഷം കോടി, എച്ച്ഡിഎഫ്സി ബാങ്ക് 7.69 ലക്ഷം കോടി, ഹിന്ദുസ്ഥാൻ യൂണിലിവർ 5.63 ലക്ഷം കോടി, ഇൻഫോസിസ് 5.26 ഡോളർ ലക്ഷം കോടി എന്നിങ്ങനെയാണ് വിപണി മൂല്യം.

കൊവിഡ് കാലത്തും നേട്ടം

കൊവിഡ് കാരണം രാജ്യവ്യാപകമായി ലോക്ക്ഡൗൺ പ്രഖ്യാപിച്ചതിന് ശേഷം മാർച്ചിൽ ഇന്ത്യൻ ഓഹരികൾ 20 ശതമാനത്തിലധികം ഇടിഞ്ഞു. എന്നാൽ നിലവിൽ നഷ്ടം വീണ്ടെടുക്കുക മാത്രമല്ല, നവംബർ, ഡിസംബർ മാസങ്ങളിൽ പുതിയ ഉയരങ്ങളിലെത്തുകയും ചെയ്തു. മഹാമാരി ചില ബിസിനസുകൾക്ക് ധാരാളം അവസരങ്ങൾ സൃഷ്ടിച്ചു. ഫാർമസ്യൂട്ടിക്കൽ, കെമിക്കൽ കമ്പനികൾ, ടെക്നോളജി വ്യവസായം, വിദൂരമായി പ്രവർത്തിക്കുന്ന വ്യവസായങ്ങൾ എന്നിവയ്ക്ക് ഈ സമയത്ത് ധാരാളം അവസരങ്ങൾ ലഭിച്ചതായി എച്ച്ഡിഎഫ്സി സെക്യൂരിറ്റീസിലെ വിശകലന വിദഗ്ധർ പറയുന്നു.

അടുത്ത വ‍ർഷം നേട്ടം നിലനിർത്തിയാൽ

2021ലും വിപണിയിലെ നേട്ടം നിലനിൽക്കുകയാണെങ്കിൽ എക്‌സ്‌ക്ലൂസീവ് ക്ലബിലേക്ക് പ്രവേശിക്കാൻ കുറഞ്ഞത് മൂന്ന് കമ്പനികളെങ്കിലും ഉണ്ട്. അവയിൽ 4.44 ലക്ഷം കോടി രൂപയുടെ വിപണി മൂലധനമുള്ള ഹൗസിംഗ് ഡെവലപ്‌മെന്റ് ഫിനാൻസ് കോർപ്പറേഷനും ഉൾപ്പെടുന്നു. 3.88 ലക്ഷം കോടി രൂപ മൂല്യമുള്ള കൊട്ടക് മഹീന്ദ്ര ബാങ്കും 3.54 ലക്ഷം കോടി രൂപയുടെ വിപണി മൂല്യമുള്ള ഐസിഐസിഐ ബാങ്കും ഇതിൽ ഉൾപ്പെടുന്നു.

വള‍ർച്ച

ഏഷ്യൻ പെയിന്റ്സിന്റെ വിപണി മൂലധനം ഈ വർഷം 48 ശതമാനം ഉയർന്ന് 2.54 ലക്ഷം കോടി രൂപയായി. സിഗരറ്റ് നിർമാതാക്കളായ ഐടിസി ലിമിറ്റഡ് 2.56 ലക്ഷം കോടി രൂപയുടെ വിപണി മൂല്യത്തിൽ എത്തിയിരുന്നു. ഓഹരി വിപണികളിലെ കുതിച്ചുചാട്ടം പൊതുമേഖലാ സ്ഥാപനങ്ങളായ എൻ‌ടി‌പി‌സി ലിമിറ്റഡ്, ഓയിൽ ആൻഡ് നാച്ചുറൽ ഗ്യാസ് കോർപ്പറേഷൻ എന്നിവയ്ക്ക് ഒരു ലക്ഷം കോടി രൂപ വിപണി മൂലധനം വീണ്ടെടുക്കാൻ സഹായിച്ചു.