മുകേഷ് അംബാനി മുതൽ സൈറസ് പൂനവല്ല വരെ, ഹൂറൻ റിച്ച് ലിസ്റ്റ് 2020ലെ പത്ത് ഇന്ത്യൻ കോടീശ്വരന്മാർ

2020 ഒരു വെല്ലുവിളി നിറഞ്ഞ വർഷമാണ്. പ്രത്യേകിച്ച് ഇന്ത്യൻ സംരംഭകർക്ക്. കൊറോണ വൈറസ് പൊട്ടിപ്പുറപ്പെട്ടതിനെ തുടർന്ന് രാജ്യവ്യാപകമായി ലോക്ക്ഡൌൺ പ്രഖ്യാപിച്ചതോടെ സാമ്പത്തിക പ്രവർത്തനങ്ങൾ മാസങ്ങളോളം നിർത്തിവച്ചു. ഇതിനിടയിലും, ഐ‌എസ്‌‌എൽ വെൽത്ത് ഹുറൻ ഇന്ത്യ റിച്ച് ലിസ്റ്റ് റിപ്പോർട്ട് അനുസരിച്ച് ചില വ്യവസായങ്ങളുടെ വിപണി മൂല്യം ഇരട്ടി വേഗത്തിൽ വളർന്നു. ഈ വർഷത്തെ മൊത്തം സമ്പത്ത് കഴിഞ്ഞ വർഷത്തെ അപേക്ഷിച്ച് 20% വർദ്ധിച്ചു. ശരാശരി സമ്പത്ത് 9% വർദ്ധിച്ചുവെന്നാണ് റിപ്പോർട്ട്.

മുകേഷ് അംബാനി

കോടീശ്വരനും റിലയൻസ് ഇൻഡസ്ട്രീസ് ലിമിറ്റഡിന്റെ മാനേജിംഗ് ഡയറക്ടറുമായ മുകേഷ് അംബാനി തുടർച്ചയായ ഒമ്പതാം വർഷവും ഹുറൻ ഇന്ത്യ സമ്പന്ന പട്ടികയിൽ ഒന്നാം സ്ഥാനത്താണ്. മാർച്ചിലെ ലോക്ക്ഡൗൺ മുതൽ ഓരോ ഒരു മണിക്കൂറിലും 90 കോടി രൂപയാണ് അദ്ദേഹം സമ്പാദിച്ചതെന്ന് റിപ്പോർട്ടിൽ പറയുന്നു. അംബാനിയുടെ സ്വത്ത് ഈ വർഷം ആദ്യം 28 ശതമാനം കുറഞ്ഞ് 3,50,000 കോടി രൂപയിലെത്തിയിരുന്നു. തുടർന്ന് ഫേസ്ബുക്ക്, ഗൂഗിൾ എന്നിവയിൽ നിന്നുള്ള ഫണ്ട് ശേഖരണത്തിന്റെയും തന്ത്രപരമായ നിക്ഷേപത്തിന്റെയും പിന്തുണയോടെ അംബാനി നഷ്ടം നികത്തി.

ഹിന്ദുജ സഹോദരന്മാർ

റിലയൻസ് ഇൻഡസ്ട്രീസിന്റെ വിപണി മൂലധനം 10 ലക്ഷം കോടി കടന്ന് ഈ വർഷം അംബാനിയുടെ സമ്പത്തിൽ 73% വർദ്ധനവ് രേഖപ്പെടുത്തി.
1,43,700 കോടി രൂപയുടെ ആസ്തിയുള്ള അംബാനിയ്ക്ക് ശേഷം ഹിന്ദുജ സഹോദരന്മാരാണ് പട്ടികയിൽ രണ്ടാം സ്ഥാനത്ത്. എച്ച്സി‌എല്ലിന്റെ സ്ഥാപകനായ ശിവ് നാടാർ 1,41,700 കോടി രൂപയുടെ സമ്പത്തുമായി മൂന്നാം സ്ഥാനത്തുണ്ട്. എച്ച്‌സി‌എല്ലിന്റെ ഓഹരി വിലയിൽ 37% വർദ്ധനവാണ് ഉണ്ടായിരിക്കുന്നത്.

ഗൌതം അദാനി

1,40,200 കോടി രൂപയുടെ സമ്പാദ്യവുമായി ഗൗതം അദാനി ഹൂറൻ ഇന്ത്യ റിച്ച് ലിസ്റ്റ് 2020ലെ നാലാം സ്ഥാനത്തെത്തി. ഗൗതം അദാനിയുടെ സമ്പത്ത് ഈ വർഷം 48% വർദ്ധിച്ചു. 1,14,400 കോടി രൂപയുടെ ആസ്തിയുമായി അസിം പ്രേംജി അഞ്ചാം സ്ഥാനത്തെത്തി. സെറം ഇൻസ്റ്റിറ്റ്യൂട്ട് ഓഫ് ഇന്ത്യയിലെ സൈറസ് എസ് പൂനവല്ലയാണ് ആറാം സ്ഥാനക്കാരൻ. അദ്ദേഹത്തിന്റെ ആസ്തി 94,300 കോടി രൂപയാണ്. കൊവിഡ്-19 വാക്സിൻ നിർമ്മിക്കാനും വിതരണം ചെയ്യാനും സെറം ഇൻസ്റ്റിറ്റ്യൂട്ട് ഓഫ് ഇന്ത്യ (SII) ഓക്സ്ഫോർഡ് സർവകലാശാലയുമായും ഒന്നിലധികം സ്ഥാപനങ്ങളുമായും ചേർന്ന് പ്രവർത്തിച്ചു കൊണ്ടിരിക്കുകയാണ്.

രാധാകിഷൻ ദമാനി

87,200 കോടി ഡോളർ ആസ്തിയോടെ അവന്യൂ സൂപ്പർമാർട്ടിന്റെ സ്ഥാപകനായ രാധാകിഷൻ ദമാനി ഐഐ‌എഫ്‌എൽ വെൽത്ത് ഹുറൻ ഇന്ത്യ റിച്ച് ലിസ്റ്റിൽ ആദ്യ പത്തിൽ ഇടം നേടി. 2017 ലെ ഐ‌പി‌ഒ മുതൽ‌, അവന്യൂ സൂപ്പർ‌മാർ‌ട്ട്സിന്റെ ഓഹരി വില 250 ശതമാനത്തിലധികം വർദ്ധിച്ചു, പട്ടികയിൽ‌ അദ്ദേഹത്തിന്റെ റാങ്ക് 23 സ്ഥാനങ്ങൾ‌ വർദ്ധിച്ചു.

ഉദയ് കൊട്ടക്

ഐഐ‌എഫ്‌എൽ വെൽത്ത് ഹൂറൻ ഇന്ത്യ റിച്ച് ലിസ്റ്റ് 2020 ൽ ഉദയ് കൊട്ടക് എട്ടാം സ്ഥാനത്താണ്. 87,000 കോടി രൂപയാണ് അദ്ദേഹത്തിന്റെ ആസ്തി. ദിലീപ് ഷാങ്‌വി ഒമ്പതാം സ്ഥാനം നേടി. അദ്ദേഹത്തിന്റെ മൊത്തം സ്വത്ത് 84,000 കോടി രൂപയാണ്. പട്ടികയിലെ പത്താം സ്ഥാനം പല്ലോഞ്ചി സഹോദരന്മാരായ സൈറസും ഷാപൂർ പല്ലോഞ്ചിയും പങ്കിട്ടു. പട്ടികയിലെ ശരാശരി സ്വത്ത് 7,300 കോടി രൂപയും ശരാശരി പ്രായം 63 ഉം ആണ്.