7% പലിശ സേവിംഗ്സ് അക്കൌണ്ടിൽ നിന്ന് ലഭിച്ചാൽ, പിന്നെന്തിന് എഫ്ഡിയിൽ കാശിടണം? അറിയേണ്ട കാര്യങ്ങൾ

പല ചെറുകിട ബാങ്കുകളും സേവിംഗ്സ് അക്കൗണ്ടിൽ 6% ത്തിൽ കൂടുതൽ പലിശനിരക്ക് വാഗ്ദാനം ചെയ്യുന്നുണ്ട്. ചില ബാങ്കുകളാകട്ടെ 7% പലിശനിരക്ക് പോലും നൽകുന്നു. കഴിഞ്ഞ കുറച്ച് മാസങ്ങളായി സ്ഥിര നിക്ഷേപ പലിശനിരക്കിൽ ഇടിവുണ്ടായതിനാൽ ഇത്തരമൊരു ഓഫർ എളുപ്പത്തിൽ നിക്ഷേപകരെ ആകർഷിക്കും.

എഫ്ഡി പലിശ നിരക്കുകൾ

നിലവിൽ, 2 കോടി രൂപ വരെയുള്ള സ്ഥിര നിക്ഷേപത്തിന് 1 വർഷത്തിനും 2 വർഷത്തിനുമിടയിലുള്ള കാലാവധിക്ക് 4.90 ശതമാനം പലിശ നിരക്കാണ് എസ്‌ബി‌ഐ വാഗ്ദാനം ചെയ്യുന്നത്. ബാങ്ക് എഫ്ഡികളിലോ ലിക്വിഡ് മ്യൂച്വൽ ഫണ്ടുകളിലോ കുറഞ്ഞ പലിശനിരക്കിൽ നിക്ഷേപിക്കുന്നതിനേക്കാൾ നല്ലത് നിങ്ങളുടെ പണം ഈ ബാങ്കുകളുടെ സേവിംഗ്സ് അക്കൗണ്ടിലേക്ക് മാറ്റുന്നതാണ്. ലിക്വിഡ് മ്യൂച്വൽ ഫണ്ടുകൾ കഴിഞ്ഞ ഒരു വർഷത്തിനിടെ 4.27% വരുമാനമാണ് നൽകുന്നത്.

സേവിംഗ്സ് അക്കൌണ്ട് പലിശ

സ്ഥിര നിക്ഷേപത്തിൽ നിന്ന് ലഭിക്കുന്നതിനേക്കാൾ കൂടുതൽ വരുമാനം ചില ബാങ്കുകൾ നിങ്ങൾക്ക് സേവിംഗ്സ് ബാങ്ക് അക്കൌണ്ടിൽ നിന്ന് വാഗ്ദാനം ചെയ്യും. എന്നാൽ ഇത്തരം ബാങ്കുകളിൽ നടത്തുന്ന നിക്ഷേപം അൽപ്പം റിസ്ക് നിറഞ്ഞതാണ്. പൊതുമേഖല ബാങ്കുകളിൽ നിക്ഷേപിക്കുന്നത്ര സുരക്ഷിതത്വം ഈ ബാങ്കുകളിലെ നിക്ഷേപത്തിന് ഉണ്ടാകണമെന്നില്ല.

ഇൻഷുറൻസ്

വാണിജ്യ ബാങ്കുകളിലെ സേവിംഗ്സ് അക്കൌണ്ട്, സ്ഥിര നിക്ഷേപം, റിക്കറന്റ് നിക്ഷേപം തുടങ്ങിയവയുടെ 5 ലക്ഷം രൂപ വരെയുള്ള നിക്ഷേപത്തിനും പലിശയ്ക്കും ഇൻഷുറൻസ് ഉണ്ടാകും. ഒരു ബാങ്കിന്റെ വിവിധ ശാഖകളിലെ നിക്ഷേപം എല്ലാം കണക്കിലെടുത്ത് പരമാവധി അഞ്ച് ലക്ഷം രൂപയ്ക്ക് വരെയാണ് ഇൻഷുറൻസ് ബാധകമാകുന്നത്.

ചെയ്യേണ്ടത് എന്ത്?

അഞ്ച് ലക്ഷം വരെയുള്ള നിക്ഷേപങ്ങൾക്ക് ഇൻഷുറൻസ് പരിരക്ഷ ഉണ്ടെങ്കിലും ബാങ്ക് തകർന്നാൽ ഉടൻ ഈ തുക നിങ്ങൾക്ക് ലഭിക്കില്ല. പണം തിരികെ ലഭിക്കാൻ ചിലപ്പോൾ വർഷങ്ങളെടുക്കുമെന്ന് സാമ്പത്തിക വിദഗ്ധർ പറയുന്നു. നിങ്ങൾ റിസ്ക് എടുക്കാൻ തയ്യാറാണെങ്കിൽ ഉയർന്ന പലിശ വാഗ്ദാനം ചെയ്യുന്ന ചെറുകിട സ്വകാര്യ ബാങ്കുകളിലെ സേവിംഗ്സ് അക്കൌണ്ടുകളിൽ പണം നിക്ഷേപിക്കാം. എന്നാൽ പരമാവധി 5 ലക്ഷം രൂപ വരെ മാത്രം ഇവിടെ നിക്ഷേപിക്കുന്നതാകും നല്ലത്.

ഡെറ്റ് ഫണ്ടുകൾ

നിങ്ങളുടെ പോർട്ട്ഫോളിയോ വൈവിധ്യവത്കരിക്കാൻ സഹായിക്കുന്ന മറ്റൊരു നിക്ഷേപമാണ് ഡെറ്റ് ഫണ്ടുകൾ. എന്നാൽ ഇവിടെയും റിസ്ക് ഒരു പ്രധാന ഘടകമാണ്. ഡെറ്റ് ഫണ്ടുകൾക്ക് ഇൻഷുറൻസ് പരിരക്ഷയില്ല. വ്യത്യസ്ത കാലാവധികളിലുള്ള നിക്ഷേപത്തിന് അനുയോജ്യമായ വ്യത്യസ്ത തരം ഡെറ്റ് ഫണ്ടുകൾ ഉണ്ട്. എന്നാൽ ബാങ്ക് എഫ്ഡി അല്ലെങ്കിൽ ബാങ്ക് സേവിംഗ് അക്കൗണ്ടിൽ നിന്ന് വ്യത്യസ്തമായി കൂടുതൽ നേട്ടം ഡെറ്റ് ഫണ്ടുകൾ നൽകും.