അന്താരാഷ്ട്ര വിമാന സ‍ർവ്വീസ് ഇനി എന്ന് മുതൽ? ജൂൺ 30 വരെയില്ല

കൊറോണ വൈറസ് വ്യാപനം തടയുന്നതിന് രാജ്യവ്യാപകമായി ലോക്ക്ഡൗൺ വീണ്ടും നീട്ടുന്നതിനായി ആഭ്യന്തര മന്ത്രാലയം പുതിയ മാർഗ്ഗനിർദ്ദേശങ്ങൾ പ്രഖ്യാപിച്ചതിന് പിന്നാലെ ജൂൺ 30 അർദ്ധരാത്രി വരെ ഷെഡ്യൂൾ ചെയ്ത അന്താരാഷ്ട്ര വാണിജ്യ യാത്രാ വിമാന സർവീസുകൾ താൽക്കാലികമായി നിർത്തിവയ്ക്കുമെന്ന് ഇന്ത്യൻ ഏവിയേഷൻ റെഗുലേറ്റർ ഡിജിസിഎ അറിയിച്ചു. വിദേശ വിമാനക്കമ്പനികൾ ഇന്ത്യയിലേക്കോ ഇന്ത്യയിൽ നിന്നോ സ‍ർ‍വ്വീസ് ആരംഭിക്കുന്നതിനെക്കുറിച്ച് പിന്നീട് അറിയിപ്പ് നൽകുമെന്ന് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) പുറത്തിറക്കിയ സർക്കുലറിൽ പറഞ്ഞു.

അന്താരാഷ്ട്ര വിമാന സ‍ർവ്വീസ് ഇനി എന്ന് മുതൽ? ജൂൺ 30 വരെയില്ല

മാർച്ച് 25 ന് ലോക്ക്ഡൗൺ പ്രഖ്യാപിച്ചതിന് ശേഷം രണ്ട് മാസത്തെ ഇടവേളയ്ക്ക് ശേഷം തിങ്കളാഴ്ച മുതലാണ് രാജ്യത്ത് ആഭ്യന്തര പാസഞ്ചർ ഫ്ലൈറ്റ് സർവീസുകൾ പുനരാരംഭിച്ചത്. അന്താരാഷ്ട്ര വിമാനങ്ങൾ ഇപ്പോഴും നിർത്തി വച്ചിരിക്കുകയാണ്. ജൂൺ 8 മുതൽ രാജ്യത്ത് 'അൺലോക്ക് -1' ആരംഭിക്കുമെന്ന് ആഭ്യന്തര മന്ത്രാലയം അറിയിച്ചു. മാർച്ച് 25 മുതലാണ് രാജ്യവ്യാപകമായി ലോക്ക്ഡൗൺ പ്രാബല്യത്തിൽ വന്നത്. ഷോപ്പിംഗ് മാളുകൾ, റെസ്റ്റോറന്റുകൾ, മതസ്ഥലങ്ങൾ എന്നിവ തുറക്കുന്നതുൾപ്പെടെ വലിയ അളവിൽ ഇളവ് വരുത്തുമെന്ന് ആഭ്യന്തര മന്ത്രാലയം അറിയിച്ചു.

രാജ്യത്തെ ഏറ്റവും വലിയ പകർച്ചവ്യാധി ബാധിച്ച പ്രദേശങ്ങളിൽ ജൂൺ 30 വരെ കർശന നിയന്ത്രണങ്ങൾ നിലനിൽക്കും. അന്താരാഷ്ട്ര വിമാന യാത്ര താൽക്കാലികമായി നിർത്തിവച്ചിരിക്കുകയാണെന്നും ആഭ്യന്തര മന്ത്രാലയത്തിന്റെ ഉത്തരവിൽ പറയുന്നു. ആഭ്യന്തര വിമാന സർവീസുകൾ പുനരാരംഭിക്കുന്നതിൽ സംസ്ഥാന സർക്കാരുകൾക്കിടയിഷ പല നിലപാടുകളെ ചൊല്ലി വളരെയധികം ആശയക്കുഴപ്പങ്ങൾ നിലനിന്നിരുന്നു. മുൻ‌കൂട്ടി അറിയിക്കാതെ ചില വിമാനങ്ങൾ സ‍ർവ്വീസ് റദ്ദാക്കിയതായും പരാതികൾ ഉയ‍ർന്നിരുന്നു.