ജപ്പാനിലും വൻ ജിഡിപി ഇടിവ്; എന്നാൽ മറ്റ് രാജ്യങ്ങളേക്കാൾ എത്രയോ ഭേദം

കൊവിഡ് -19 പ്രതിസന്ധിയെ തുടർന്ന് ജപ്പാനിലും ജിഡിപി ഏറ്റവും മോശം ഇടിവ് രേഖപ്പെടുത്തി. ലോകത്തെ മൂന്നാമത്തെ വലിയ സമ്പദ്‌വ്യവസ്ഥയായ ജപ്പാൻ കഴിഞ്ഞ പാദവുമായി താരതമ്യം ചെയ്യുമ്പോൾ രണ്ടാം പാദത്തിൽ 7.8 ശതമാനം ഇടിഞ്ഞു. ഇത് വാർഷിക ഇടിവ് 27.8% ആക്കി. 1980ന് ശേഷമുള്ള ഏറ്റവും മോശം ഇടിവാണ് ഇത്തവണത്തേത്. എന്നാൽ ഏപ്രിൽ-ജൂൺ കാലയളവിൽ ജപ്പാൻ മറ്റ് പ്രധാന സമ്പദ്‌വ്യവസ്ഥകളേക്കാൾ മികച്ച പ്രകടനം കാഴ്ചവച്ചു.

മറ്റ് രാജ്യങ്ങൾ

അമേരിക്കയും ജർമ്മനിയും കഴിഞ്ഞ പാദത്തേക്കാൾ 10 ശതമാനം ഇടിവും ബ്രിട്ടൻ 20.4 ശതമാനവും തകർന്നിരുന്നു. ശേഷിക്കുന്ന ജി 7 സമ്പദ്‌വ്യവസ്ഥകളിൽ രണ്ടാം പാദത്തിലെ ജിഡിപി മുൻ പാദത്തേക്കാൾ 12 ശതമാനം ചുരുങ്ങുമെന്ന് കാനഡയുടെ സ്ഥിതിവിവരക്കണക്ക് ഏജൻസി അറിയിച്ചു. രണ്ടാം പാദത്തിൽ ചൈന വളർച്ചയിലേക്ക് തിരിച്ചുവന്നു. അതായത് ലോകത്തിലെ രണ്ടാമത്തെ വലിയ സമ്പദ്‌വ്യവസ്ഥ മാന്ദ്യത്തിൽ നേരിയ നേട്ടം കൈവരിച്ചു.

ഇടിവിന് കാരണം

മറ്റ് പല സമ്പദ്‌വ്യവസ്ഥകളെയും പോലെ, ജപ്പാനിലെ ജിഡിപി ഇടിവിന് കാരണവും പ്രധാനമായും ഉപഭോക്തൃ ചെലവ് കുറയുന്നതിനാലാണ്. കൊവിഡ് -19 നിയന്ത്രണങ്ങളുടെ ഭാഗമായി കയറ്റുമതി കുറഞ്ഞു. ജപ്പാനിലെ സമ്പദ്‌വ്യവസ്ഥയുടെ പകുതിയിലധികം വരുന്ന ഉപഭോഗം ഈ പാദത്തിൽ 8.2 ശതമാനം ഇടിഞ്ഞു. ഏപ്രിൽ, മെയ് മാസങ്ങളിൽ ആറ് ആഴ്ചത്തെ ദേശീയ അടിയന്തരാവസ്ഥയിൽ രാജ്യത്തുടനീളമുള്ള ബിസിനസുകൾ അടച്ചിട്ടിരുന്നു.

തുടർച്ചയായ മൂന്നാം പാദം

ആഗോള വ്യാപാരത്തിലെ മാന്ദ്യം മൂലം കയറ്റുമതി തടസ്സപ്പെട്ടതിനാൽ ബാഹ്യ ആവശ്യം ഈ പാദത്തിൽ ജിഡിപിയുടെ മൂന്ന് ശതമാനം പോയിന്റ് കുറച്ചു. മറ്റ് വികസിത സമ്പദ്‌വ്യവസ്ഥകളിലെ ഇടിവ് പോലെ വലുതായിരിക്കില്ലെങ്കിലും, വളർച്ചയുടെ രണ്ടാംപാദ ഇടിവിലൂടെ തുടർച്ചയായ മൂന്നാം പാദവും ജപ്പാന്റെ വളർച്ച ചുരുങ്ങിയതായി അടയാളപ്പെടുത്തുന്നു. ജൂൺ, ജൂലൈ മാസങ്ങളിൽ പ്രവർത്തനം വീണ്ടും ഉയർന്നിട്ടും വീണ്ടെടുക്കലിന്റെ വേഗതയെക്കുറിച്ച് ആശങ്കകളുണ്ട്.

പ്രതിസന്ധി

ഈ വർഷം ആദ്യം രണ്ട് സാമ്പത്തിക ഉത്തേജക പാക്കേജുകളിൽ സ്വീകരിച്ച നിരവധി ദുരിതാശ്വാസ നടപടികൾ സെപ്റ്റംബറിൽ അവസാനിക്കുമെന്ന് പല സാമ്പത്തിക വിദഗ്ധരും മുന്നറിയിപ്പ് നൽകുന്നു, ഇത് ജപ്പാനിലെ സമ്പദ്‌വ്യവസ്ഥയുടെ ഭൂരിഭാഗവും ഉൾക്കൊള്ളുന്ന ചെറുകിട, ഇടത്തരം സംരംഭങ്ങൾക്ക് പ്രതിസന്ധി സൃഷ്ടിച്ചേക്കാം.

കൊറോണ വൈറസ്

ഓഗസ്റ്റിൽ മാത്രം 19,000 പുതിയ വൈറസ് കേസുകൾ ജപ്പാൻ രേഖപ്പെടുത്തിയിട്ടുണ്ട്, ഇത് മൊത്തം അണുബാധകളുടെ മൂന്നിലൊന്നാണ്. ജപ്പാനിൽ 55,426 സ്ഥിരീകരിച്ച കൊറോണ വൈറസ് കേസുകളും 1,101 വൈറസ് സംബന്ധമായ മരണങ്ങളും റിപ്പോർട്ട് ചെയ്തതായി ജപ്പാനിലെ ആരോഗ്യ, തൊഴിൽ, ക്ഷേമ മന്ത്രാലയം അറിയിച്ചു.