ഗ്യാസ് സിലിണ്ടർ മാറ്റാൻ ഈ മാസം മുതൽ പുതിയ നിയമം; വീട്ടിൽ സിലിണ്ടർ എത്താൻ ഇക്കാര്യങ്ങൾ അറിയണം

നിങ്ങളുടെ വീട്ടിൽ എൽപിജി ഗ്യാസ് സിലിണ്ടർ ആണോ ഉപയോഗിക്കുന്നത്? എങ്കിൽ ഈ മാസം മുതൽ നിങ്ങൾക്ക് ബാധകമായ ചില പുതിയ നിയമങ്ങളെക്കുറിച്ച് തീർച്ചയായും അറിഞ്ഞിരിക്കണം. നവംബർ 1 മുതൽ, ഉപയോക്താക്കൾക്ക് അവരുടെ എൽപിജി സിലിണ്ടറുകളുടെ ഹോം ഡെലിവറി ലഭിക്കുന്നതിന് ഒറ്റത്തവണ പാസ്‌വേഡ് (ഒ.ടി.പി) നൽകേണ്ടതുണ്ട്. എൽ‌പി‌ജി സിലിണ്ടറുകളുടെ ഹോം ഡെലിവറി തിരഞ്ഞെടുക്കുന്ന ഉപഭോക്താക്കൾക്കായി എണ്ണ കമ്പനികൾ ഡെലിവറി ഓതന്റിക്കേഷൻ കോഡ് (ഡിഎസി) നടപ്പിലാക്കുന്നതിന്റെ ഭാഗമായാണ് ഇത്.

കോഡ്

ഡെലിവറി ഓഥന്റിക്കേഷൻ കോഡ് (ഡിഎസി), ഇതിനകം തന്നെ പൈലറ്റ് പ്രോജക്ടായി രാജസ്ഥാനിലെ ജയ്പൂരിൽ നടത്തി വരുന്നുണ്ട്. ആദ്യം 100 സ്മാർട്ട് നഗരങ്ങളിലായിരിക്കും പദ്ധതി നടപ്പാക്കുക. എൽപിജി സിലിണ്ടറുകളുടെ ഹോം ഡെലിവറി ആഗ്രഹിക്കുന്ന ഉപഭോക്താക്കൾക്ക് അവരുടെ രജിസ്റ്റർ ചെയ്ത മൊബൈൽ നമ്പറിൽ ഒരു കോഡ് ലഭിക്കും. ഉപയോക്താക്കൾ ഡെലിവറി ചെയ്യാൻ എത്തുന്ന വ്യക്തിക്ക് ഒടിപി കോഡ് നൽകുമ്പോൾ മാത്രമേ എൽപിജി സിലിണ്ടറുകൾ വീട്ടിലെത്തിച്ച് നൽകൂ.

പുതിയ നമ്പർ

ഈ പുതിയ ഡെലിവറി സംവിധാനം നടപ്പിലാക്കുന്നതിൽ എന്തെങ്കിലും തടസ്സം നേരിടുന്നവർക്ക് ഗ്യാസ് സിലിണ്ടറുകൾ ലഭിക്കുന്നതിൽ ബുദ്ധിമുട്ട് നേരിടേണ്ടി വരും. ഒ‌ടി‌പി സ്ഥിരീകരിക്കാതെ ഡെലിവറി ബോയിയിൽ നിന്ന് ഗ്യാസ് സിലിണ്ടർ എടുക്കാൻ വരിക്കാർക്ക് കഴിയില്ല. അതേസമയം, ഉപഭോക്തൃ സൗകര്യാർത്ഥം ഇന്ത്യൻ ഓയിൽ ഇൻഡ്യൻ എൽപിജി റീഫിൽ ബുക്കിംഗിനായി ഒരു പൊതു നമ്പർ ആരംഭിച്ചിട്ടുണ്ട്. എൽ‌പി‌ജി റീഫില്ലുകൾ‌ക്കായുള്ള പൊതു ബുക്കിംഗ് നമ്പർ 7718955555 ആണ്. ഇത് ഉപയോക്താക്കൾക്ക് 24 മണിക്കൂറും ലഭ്യമാണ്.

ഇൻഡെയ്ൻ ഉപഭോക്താക്കളുടെ ശ്രദ്ധയ്ക്ക്

ഇൻഡെയ്ൻ എൽപിജി റീഫില്ലുകൾ ബുക്ക് ചെയ്യുന്നതിനുള്ള നിലവിലെ ടെലികോം സർക്കിൾ നിർദ്ദിഷ്ട ഫോൺ നമ്പറുകൾ 31.10.2020 അർദ്ധരാത്രിക്ക് ശേഷം നിർത്തലാക്കുകയും എൽപിജി റീഫില്ലുകൾക്കായുള്ള സാധാരണ ബുക്കിംഗ് നമ്പർ അതായത് 7718955555 പ്രാബല്യത്തിൽ വരുമെന്നും പെട്രോളിയം പ്രകൃതി വാതക മന്ത്രാലയം അറിയിച്ചു.