ചരക്ക് നീക്കത്തിൽ മെയ് മാസത്തിൽ ഏറ്റവും വലിയ നേട്ടം കൊയ്ത് റെയിൽവേ; നേടിയത് 11,604.94 കോടി

ദില്ലി; കോവിഡ് വെല്ലുവിളികൾക്കിടയിലും ചരക്ക് നീക്കവുമായി ബന്ധപ്പെട്ട വരുമാനത്തിലും ലോഡിംഗിലും മികച്ച നേട്ടവുമായി റെയിൽവേ.മെയ് മാസത്തിൽ എക്കാലത്തെയും ഉയർന്ന ചരക്ക് നീക്കമാണ് നടത്തിയതെന്ന് റെയിൽവേ മന്ത്രാലയം അറിയിച്ചു. 14.8 മെട്രിക് ടൺ ആണ് ഈ മാസത്തെ റെയില്‍വേയുടെ മൊത്തം ചരക്ക് കടത്ത്. 2019 മെയ് മാസത്തേക്കാൾ 9.7% കൂടുതലാണ് ഇത് (104.6 MT). ഇതോടെ ഈ മാസം 11,604.94 കോടി രൂപ വരുമാനമാണ് റെയിൽവേ നേടിയത്.

ഈ വർഷം ഇതുവരെയും മികച്ച നേട്ടം സ്വന്തമാക്കാനായതായി റെയിൽവേ നേരത്തേ വ്യക്തമാക്കിയിരുന്നു. ചരക്ക് ഗതാഗതത്തിൽ കഴിഞ്ഞ വർഷത്തെ അപക്ഷിച്ച് പത്ത് ശതമാനത്തിന്റെ വർധനവാണ് ഉണ്ടായതെന്ന് റെയിൽവേ മന്ത്രാലയം അറിയിച്ചു. 2021-22 സാമ്പത്തിക വര്‍ഷത്തില്‍ റെയില്‍വേയുടെ മൊത്തം ചരക്ക് കടത്ത് 203.88 ദശലക്ഷം മെട്രിക് ടൺ ആണ്.കഴിഞ്ഞ വർഷം ഇത് 184.88 മെട്രിക് ടണ്‍ ആയിരുന്നു.

ചരക്ക് നീക്കത്തെ വളരെ ആകർഷകമാക്കുന്നതിന് ഇന്ത്യൻ റെയിൽ‌വേയിൽ നിരവധി ഇളവുകളും പ്രോത്സാഹനങ്ങളും നൽകുന്നുണ്ട്. കഴിഞ്ഞ 18 മാസത്തിനിടയിൽ ചരക്ക് വേഗത ഇരട്ടിയായി. ഇത് എല്ലാ ഗുണഭോക്താക്കളുടേയും ചെലവ് ലാഭിക്കാൻ സഹായിച്ചു. എല്ലാ മേഖലകളിലും കാര്യക്ഷമതയും പ്രകടനവും മെച്ചപ്പെടുത്താനുള്ള അവസരമായി ഇന്ത്യൻ റെയിൽ‌വേ കോവിഡ്-19നെ പ്രയോജനപ്പെടുത്തുന്നുണ്ടെന്നും റെയിൽവേ മന്ത്രാലയം പ്രസ്താവനയിൽ പറഞ്ഞു.