വ്യവസായ വകുപ്പിന് കീഴില്‍ പൊതുമേഖലയിൽ രണ്ടാമത്തെ പെട്രോള്‍ പമ്പ്; ഉദ്ഘാടനം 27 ന്

പാലക്കാട്; വ്യവസായ വകുപ്പിന് കീഴില്‍ പൊതുമേഖലയിൽ രണ്ടാമത്തെ പെട്രോള്‍ പമ്പ് ഉദ്ഘാടനത്തിനൊരുങ്ങി. ഷൊര്‍ണ്ണൂരില്‍ പ്രവര്‍ത്തിക്കുന്ന മെറ്റല്‍ ഇന്‍ഡസ്ട്രീസ് ലിമിറ്റഡ് ഹിന്ദുസ്ഥാന്‍ പെട്രോളിയം കോര്‍പ്പറേഷനുമായി സഹകരിച്ചാണ് പെട്രോള്‍ പമ്പ് തുടങ്ങുന്നത്. പമ്പിൻറെ ഉദ്ഘാടനം ചൊവ്വാഴ്ച വ്യവസായ വകുപ്പ് മന്ത്രി ഇപി ജയരാജൻ നിർവ്വഹിക്കും. പദ്ധതിയെ കുറിച്ച് മന്ത്രി പങ്കുവെച്ച കുറിപ്പ് വായിക്കാം

 

വ്യവസായ വകുപ്പിന് കീഴില്‍ ഷൊര്‍ണ്ണൂരില്‍ പ്രവര്‍ത്തിക്കുന്ന മെറ്റല്‍ ഇന്‍ഡസ്ട്രീസ് ലിമിറ്റഡ് വൈവിധ്യവല്‍ക്കരണത്തിലൂടെ വലിയ കുതിപ്പിനൊരുങ്ങുകയാണ്. ഹിന്ദുസ്ഥാന്‍ പെട്രോളിയം കോര്‍പ്പറേഷനുമായി സഹകരിച്ച് പെട്രോള്‍ പമ്പ് പ്രവര്‍ത്തനമാരംഭിക്കുകയാണ്. വ്യവസായ വകുപ്പിന് കീഴില്‍ പൊതുമേഖലയിലെ രണ്ടാമത്തെ പെട്രോള്‍ പമ്പാണ് ഇത്. കേരള ക്ലേയ്സ് ആന്റ് സെറാമിക്സും വൈവിധ്യവല്‍ക്കരണത്തിന്റെ ഭാഗമായി കണ്ണൂര്‍ പാപ്പിനിശ്ശേരിയില്‍ പെട്രോള്‍ പമ്പ് തുറന്നിരുന്നു.

കാര്‍ഷിക ഉപകരണങ്ങള്‍ നിര്‍മ്മിച്ച് വില്‍ക്കുക എന്ന ലക്ഷ്യത്തിലാണ് 1928 ല്‍ മെറ്റല്‍ ഇന്‍ഡസ്ട്രീസ് ലിമിറ്റഡ് സ്വകാര്യമേഖലയില്‍ രൂപീകരിച്ചത്. എന്നാല്‍ കടുത്ത പ്രതിസന്ധിയെ തുടര്‍ന്ന് 1976 ല്‍ കമ്പനിയുടെ പ്രവര്‍ത്തനം പൂര്‍ണമായും നിലച്ചു. 1980ല്‍ സ്ഥാപനം സംസ്ഥാന സര്‍ക്കാര്‍ ഏറ്റെടുത്ത് വീണ്ടും ഉല്‍പ്പാദനം ആരംഭിച്ചു. കഴിഞ്ഞ സാമ്പത്തിക വര്‍ഷം 2 കോടി മാത്രം വിറ്റുവരവുണ്ടായ മെറ്റല്‍ ഇന്‍ഡസ്ട്രീസ് പുതിയ പമ്പ് പ്രവര്‍ത്തനം ആരംഭിക്കുന്നതോടെ 20 കോടിയുടെ വിറ്റുവരവാണ് പ്രതീക്ഷിക്കുന്നത്.