ദുരിതാശ്വാസ ഉൽപ്പന്നങ്ങൾ ഇറക്കുമതി ചെയ്യുന്നതിന് നികുതി ഇളവ്; പ്രത്യേക സംവിധാനമൊരുക്കി കേരളം

തിരുവനന്തപുരം; വിദേശ രാജ്യങ്ങളിൽ നി്നനും സംഘടനകളിൽ നിന്നും വ്യക്തികളിൽ നിന്നും കൊവിഡ് ദുരിതാശ്വാസ ഉത്പന്നങ്ങൾ ഇറക്കുമതി ചെയ്യാൻ നോർക്ക റൂട്ട്സ്. ഇതിനായി നോർക്ക വകുപ്പ് പ്രിൻസിപ്പൽ സെക്രട്ടറി കെ. ഇളങ്കോവന്റെ നേതൃത്വത്തിൽ സംസ്ഥാന സർക്കാർ പ്രത്യേക സെൽ രൂപീകരിച്ചു.
കൊവിഡ് ദുരിതാശ്വാസ ഉൽപ്പന്നങ്ങൾ ഇറക്കുമതി ചെയ്യുന്നതിന് കേന്ദ്രസർക്കാർ നികുതി ഇളവ് പ്രഖ്യാപിച്ച പശ്ചാത്തലത്തിലാണ് നടപടി.

ഉൽപ്പന്നങ്ങളുടെ കയറ്റിറക്ക് സുഗമമാക്കാൻ പ്രവാസി അസോസിയേഷനും മറ്റ് വിദേശ ദാതാക്കൾക്കുമായി നോർക്കാ റൂട്ട്‌സ് പ്രത്യേക മാർഗ നിർദ്ദേശങ്ങളും പുറപ്പെടുവിച്ചിട്ടുണ്ട്. ഇതിന്റെ ഭാഗമായി ഉൽപ്പന്നങ്ങൾ നൽകാൻ തയ്യാറായുള്ളവർ സമ്മതമറിയിച്ചുള്ള കത്ത് ceo.norkakerala.gov.in എന്ന വിലാസത്തിലേക്ക് അയയ്ക്കണം.

റംഡേസിവർ,ആക്ടീവ് ഫാർമസ്യൂട്ടിക്കൽ ഉൽപ്പന്നങ്ങൾ, ട്യൂബിങ് എന്നിവ ഉൾപ്പെടുന്ന ഓക്‌സിജൻ കോൺസെൻട്രേറ്റർ, മെഡിക്കൽ ഓക്‌സിജൻ, വാക്വം പ്രഷർ, ക്രയോജനിക് ഓക്‌സിജൻ എയർ സെപ്പറേഷൻ യൂണിറ്റുകൾ , ഓക്‌സിജൻ ഉൽപ്പാദിപ്പിക്കാവുന്ന ഉപകരണങ്ങൾ, കംപ്രസറുകൾ ഉൾപ്പെടുന്ന വെന്റിലേറ്ററുകൾ, ഐ.സി.യു വെന്റിലേറ്ററുകൾക്ക് വേണ്ടിയുള്ള നോൺ ഇൻവാസീവ് വെന്റിലേഷൻ ഓറോനേസൽ മാസ്‌ക്, നേസൽ മാസ്‌ക് തുടങ്ങിയ ഉൽപ്പന്നങ്ങൾക്കാണ് കേന്ദ്രസർക്കാർ നികുതി ഇളവ് പ്രഖ്യാപിച്ചത്.

വിദേശ രാജ്യങ്ങളിൽ നിന്ന് സൗജന്യ വിതരണത്തിനായി ഇറക്കുമതി ചെയ്യുന്ന ദുരിതാശ്വാസ സാമഗ്രികൾക്കുള്ള ഐജിഎസ്ടിയും നേരത്തേ കേന്ദ്രസർക്കാർ ഒഴിവാക്കിയിരുന്നു. ജൂൺ 30 വരെയുള്ള ഇറക്കുമതികൾക്കാണ് ഇളവ് പ്രഖ്യാപിച്ചിരുന്നത്.