കേന്ദ്ര ബജറ്റ് 2021: ബജറ്റ് പെട്ടിയും ബഹി ഖാട്ടയും ഉപേക്ഷിച്ച് ധനമന്ത്രി, ഇത്തവണ ബജറ്റ് ടാബ്‍ലെറ്റിൽ

കാലത്തിന് അനുസരിച്ചുള്ള മാറ്റങ്ങളുമായി ധനമന്ത്രി നി‍ർമ്മല സീതാരാമൻ. പരമ്പരാ​ഗതമായ രീതിയിൽ നിന്ന് മാറി കാലത്തിനനുസരിച്ചുള്ള പുതിയ മാറ്റങ്ങളുമായാണ് ഇത്തവണ ധനമന്ത്രി നി‍ർമ്മല സീതാരാമൻ ബജറ്റ് അവതരിപ്പിക്കാൻ എത്തുന്നത്. 2019 ൽ ധനമന്ത്രി നിർമ്മല സീതാരാമൻ കേന്ദ്ര ബജറ്റ് അവതരണത്തിനായി പാർലമെന്റിലെത്തിയത് ബ്രീഫ്കേസ് കൊണ്ടുപോകുന്ന പഴയ പാരമ്പര്യം ലംഘിച്ചു കൊണ്ടായിരുന്നു. പകരം, 'ബഹി ഖാട്ട' അതായത് ചുവപ്പ് നിറത്തിലുള്ള തുണിയിൽ പൊതിഞ്ഞാണ് ബജറ്റ് രേഖകൾ കൊണ്ടു വന്നത്.

union budget 2021

എന്നാൽ ഇന്ന് പുതിയ കാലത്തിനും സാങ്കേതിക വിദ്യയ്ക്കും അനുസരിച്ച് മുന്നോട്ട് പോകുമ്പോൾ, സീതാരാമൻ വീണ്ടും പരമ്പരാഗതമായ ബഹി-ഖാട്ട ഉപേക്ഷിച്ചു പകരം, ഇന്ത്യൻ നി‍ർമ്മിത ടാബ്‌ലെറ്റാണ് കൈവശം വച്ചിരിക്കുന്നത്. സ്വതന്ത്ര ഇന്ത്യയിൽ ആദ്യമായി 2021ലെ ബജറ്റ് പൂർണമായും കടലാസ് രഹിത ബജറ്റായിരിക്കും. കൊറോണ വൈറസ് മഹാമാരിയെ തുട‍ർന്നാണ് ഈ മാറ്റം. ഹാർഡ് കോപ്പികൾക്കുപകരം ബജറ്റിന്റെ സോഫ്റ്റ് കോപ്പികൾ പാർലമെന്റിലെ എല്ലാ അംഗങ്ങൾക്കും നൽകും.

ഏപ്രിൽ മുതൽ ആരംഭിക്കുന്ന സാമ്പത്തിക വർഷത്തെ ബജറ്റ് "മുമ്പെങ്ങുമില്ലാത്തവിധം" ആയിരിക്കുമെന്ന് ഈ മാസം ആദ്യം സീതാരാമൻ പറഞ്ഞിരുന്നു.