ഇതുവരെ ഡ്രൈവിംഗ് ലൈസൻസ് എടുത്തില്ലേ? അപേക്ഷിക്കാൻ ആവശ്യമായ രേഖകൾ എന്തൊക്കെ?

ഇന്ത്യയിലെ മോട്ടോർവാഹന നിയമമനുസരിച്ച് പൊതു നിരത്തുകളിൽ വാഹനം ഓടിക്കണമെങ്കിൽ ഒരു ആധികാരിക ഡ്രൈവിംഗ് ലൈസൻസ് നിർബന്ധമാണ്. 1988-ലെ മോട്ടോർ വെഹിക്കിൾസ് ആക്ട് പ്രകാരം ഡ്രൈവിംഗ് ലൈസൻസില്ലാതെ ഒരു വ്യക്തി ഒരു പൊതു സ്ഥലത്ത് മോട്ടോർ വാഹനം ഓടിക്കുകയാണെങ്കിൽ. ഇത് ശിക്ഷാർഹമായ കുറ്റമായി കണക്കാക്കുന്നതാണ്. കേരളത്തിൽ മോട്ടോർ വാഹന വകുപ്പിന്റെ കീഴിലുള്ള 18 റീജണൽ ഓഫീസുകൾ വഴിയും മറ്റ് സബ് റീജണൽ ഓഫീസുകൾ വഴിയും നിങ്ങൾക്ക് ഡ്രൈവിംഗ് ലൈസൻസ് എടുക്കാവുന്നതാണ്.

ഒരു വ്യക്തിക്ക് ഡ്രൈവിംഗ് ലൈസൻസെടുക്കാൻ സർക്കാർ നിർദ്ദേശിക്കുന്ന യോഗ്യതകൾ എന്തെല്ലാമാണ്?

18 വയസ്സിന് മുകളിലുള്ളവർക്ക് മാത്രമേ സ്വകാര്യ വാഹനം ഓടിക്കാനുള്ള ലൈസൻസിന് അപേക്ഷിക്കാൻ കഴിയൂ. ഇനി 16 നും 18 നും ഇടയിലുള്ളവർ ആണെങ്കിൽ രക്ഷിതാക്കളുടെ സമ്മത പത്രത്തോടെ 50 സിസിയ്‌ക്ക് താഴെയുള്ള മോട്ടോർ സൈക്കിൾ ഓടിക്കാനുള്ള ലൈസൻസിന് അപേക്ഷിക്കാം. 20 വയസ്സിന് മേലെ പ്രായവും സ്വകാര്യ വാഹനം ഓടിച്ചിട്ടുള്ള ഒരു വർഷത്തെ പരിചയവും ഉണ്ടങ്കിലേ ട്രാൻസ്‌പോർട്ട് വാഹനം ഓടിക്കാനുള്ള ലൈസൻസിന് അപേക്ഷിക്കാൻ സാധിക്കൂ.

ഡ്രൈവിംഗ് ലൈസൻസിന് ആവശ്യമായ രേഖകൾ എന്തൊക്കെയാണ്?

ലേണേഴ്‌സ് ലൈസൻസ്: ഡ്രൈവിംഗ് ലൈസൻസ് എടുക്കുന്നതിന് മുമ്പ് നിങ്ങൾ ലേണേഴ്‌സ് ലൈസൻസ് എടുക്കേണ്ടതുണ്ട്. ഇതിനുള്ള അപേക്ഷ നൽകിയ ശേഷം കമ്പ്യൂട്ടർ അധിഷ്ഠിത പരീക്ഷ എഴുതണം. ലേണേഴ്‌സ് ലൈസൻസിന് അപേക്ഷിക്കണമെങ്കിൽ വയസ്സ് തെളിയിക്കുന്നതിനുള്ള രേഖകൾ, വിലാസം തെളിയിക്കുന്നതിനുള്ള രേഖകൾ, പാസ്‌പോർട്ട് സൈസ് ഫോട്ടോ, മെഡിക്കൽ സർട്ടിഫിക്കറ്റ് അതായത് കണ്ണ് പരിശോധിച്ചതിനുള്ള രേഖകൾ, ശാരീരിക ക്ഷമത പ്രഖ്യാപനം എന്നിവ ആവശ്യമാണ്.

 

വയസ് തെളിയിക്കാൻ നിങ്ങൾക്ക് ജനന സർട്ടിഫിക്കറ്റ്, പാൻ കാർഡ്, പാസ്പോർട്ട്, എസ്എസ്എൽസി ബുക്ക്, വോട്ടർ ഐഡി എന്നിവയിൽ ഏതെങ്കിലും ഉപയോഗിക്കാം. വിലാസം തെളിയിക്കാനാണെങ്കിൽ റേഷൻ കാർഡ്, വോട്ടർ ഐഡി, ആധാർ കാർഡ്, പാസ്പോർട്ട്, ഇലക്ട്രിസിറ്റി ബിൽ അല്ലെങ്കിൽ ടെലിഫോൺ ബിൽ, ലൈഫ് ഇൻഷുറൻസ് പോളിസി എന്നിവയിൽ ഏതെങ്കിലും നൽകാം.

ശ്രദ്ധിക്കേണ്ട മറ്റ് കാര്യങ്ങൾ;

പരീക്ഷ പാസായാൽ ലേണേഴ്‌സ് ലൈസൻസ് ലഭിക്കുന്നതാണ്. ആറ് മാസമാണ് ഇതിന്റെ കാലാവധി. പരീക്ഷ പാസായില്ലെങ്കിൽ ചെറിയ തുക ഫൈൻ ആയി നൽകി വീണ്ടും എഴുതാവുന്നതാണ്. ലേണേഴ്‌സ ലൈസൻസ് പുതുക്കാനാവില്ല വീണ്ടും പരീക്ഷ എഴുതേണ്ടതുണ്ട്. ലേണേഴ്‌സ് ലൈസൻസ് ലഭിച്ചാൽ 30 ദിവസങ്ങൾക്ക് ശേഷം ലൈസൻസ് ടെസ്‌റ്റിൽ പങ്കെടുക്കാവുന്നതാണ്. ഇതിന് അപേക്ഷ നൽകണം.