ഇന്ത്യയിലെ ഏറ്റവും കൂടുതൽ ശമ്പളം കിട്ടുന്ന നഗരമേത്? ജോലി ഇവിടെ അന്വേഷിക്കാം

ഇന്ത്യയിൽ ഏറ്റവും കൂടുതൽ ശമ്പളം വാങ്ങുന്നത് ഐടി വ്യവസായ മേഖലയിലെ പ്രൊഫഷണലുകളാണ്. അതുകൊണ്ട് തന്നെ ഏറ്റവും കൂടുതൽ ഐടി ജീവനക്കാരുള്ള ബംഗളൂരു തന്നെയാണ് രാജ്യത്ത് ഏറ്റവുമധികം പ്രതിഫലം വാഗ്ദാനം ചെയ്യുന്ന നഗരം.  2019 ലെ റാൻഡ്‌സ്റ്റാഡ് ഇൻസൈറ്റ് സാലറി ട്രെൻഡ്‌സ് റിപ്പോർട്ട് ആണ് ഇക്കാര്യം വ്യക്തമാക്കിയിരിക്കുന്നത്.

ബംഗളൂരുവിലെ ശമ്പളം

റിപ്പോർട്ട് അനുസരിച്ച് ജൂനിയർ തലത്തിലുള്ള പ്രതിഭകൾക്ക് ബെംഗളൂരുവിലെ കമ്പനികൾ വാഗ്ദാനം ചെയ്യുന്ന ശരാശരി വാർഷിക ചെലവ് (സിടിസി) 5.27 ലക്ഷം രൂപയാണ്, മിഡ് ലെവലിന് 16.45 ലക്ഷം, സീനിയർ ലെവലിൽ 35.45 ലക്ഷം എന്നിങ്ങനെയാണ്. 2017 ലെയും 2018 ലെയും ശമ്പള റിപ്പോർട്ടിലും ബെംഗളൂരു തന്നെയായിരുന്നു ഒന്നാമത്.

മറ്റ് നഗരങ്ങൾ

ജൂനിയർ ലെവൽ ജീവനക്കാർക്ക് ഹൈദരാബാദ് (₹ 5 ലക്ഷം), മുംബൈ (₹ 4.59 ലക്ഷം) എന്നിങ്ങനെയാണ് ലഭിക്കുന്ന ശമ്പളം. മധ്യനിര ശമ്പളക്കാർക്ക് മുംബൈ (15.07 ലക്ഷം), ഡൽഹി (14.5 ലക്ഷം) എന്നിങ്ങനെയാണ് ലഭിക്കുന്ന ശമ്പളം. സീനിയർ വിഭാഗക്കാർക്ക് മുംബൈ (33.95 ലക്ഷം) പൂനെ (32.68 ലക്ഷം) എന്നിങ്ങനെയും ശമ്പളം ലഭിക്കും.

ഏറ്റവും കൂടുതൽ ശമ്പളം

ജൂനിയർ തലത്തിലും (4.96 ലക്ഷം) സീനിയർ തലത്തിലും (35.84 ലക്ഷം രൂപ) ഏറ്റവും ഉയർന്ന ശരാശരി വാർഷിക സിടിസി ലഭിക്കുന്നത് ഐടി വ്യവസായത്തിലെ പ്രൊഫഷണലുകൾക്കാണെന്നും റിപ്പോർട്ടിൽ പറയുന്നു. മുതിർന്ന പ്രൊഫഷണലുകൾക്ക് ഡിജിറ്റൽ മാർക്കറ്റിംഗ് മേഖലയിലും ഉയർന്ന പ്രതിഫലം വാഗ്ദാനം ചെയ്യുന്നുണ്ട്. ഈ മേഖലയിലെ ശരാശരി വാർഷിക സിടിസി 35.65 ലക്ഷം രൂപയാണ്.

മറ്റ് മേഖലകൾ

ജിഎസ്ടി കംപ്ലയിൻസ് സ്‌പെഷ്യലിസ്റ്റുകൾ, അക്കൗണ്ടന്റുമാർ, മാനേജ്‌മെന്റ് കൺസൾട്ടന്റുമാർ, അഭിഭാഷകർ എന്നിവരുടെ ആവശ്യം വർദ്ധിച്ചതോടെ ഈ പ്രൊഫഷണൽ സേവന മേഖലകൾ ജൂനിയർ, സീനിയർ തലങ്ങളിൽ ഏറ്റവും കൂടുതൽ പ്രതിഫലം വാങ്ങുന്ന രണ്ടാമത്തെ മേഖലയായി മാറി.