കാശുണ്ടാക്കാൻ ഭാ​ഗ്യം മാത്രം പോരാ, അൽപ്പം ബുദ്ധി കൂടി ഉപയോ​ഗിക്കണം; ചില കുറക്കുവഴികൾ ഇതാ

ഓഹരി നിക്ഷേപം

ഓഹരികളിലോ ബോണ്ടുകളിലോ നിക്ഷേപം നടത്തുന്നത് നിങ്ങളെ വളരെ വേ​ഗം സമ്പന്നരാകും. എന്നാൽ പലരും ഇതിന് തയ്യാറാകാറില്ല. കാരണം റിസ്ക് തന്നെ. എന്നാൽ ഓഹരികളെക്കുറിച്ച് കൃത്യമായ അറിവ് നേടിയ ശേഷം നിക്ഷേപം നടത്തുന്നവ‍ർക്ക് അബദ്ധം പറ്റില്ല. ഇവിടെയാണ് ബുദ്ധിപരമായ തീരുമാനം എടുക്കേണ്ടത്.

സമ്പാദ്യം

ജോലിയിൽ നിന്ന് വിരമിച്ചതിന് ശേഷം എങ്ങനെ ജീവിക്കും എന്നതിനെക്കുറിച്ച് ജോലി ഉള്ളപ്പോൾ ആരും ചിന്തിക്കാറില്ല. എന്നാൽ മുൻകൂട്ടി ഇക്കാര്യങ്ങളിൽ തീരുമാനമെടുക്കുന്നവരാണ് ബുദ്ധിമാന്മാ‍ർ. കാരണം ജോലി ലഭിക്കുമ്പോൾ തന്നെ ഓരോ മാസവും കൃത്യമായ ഒരു തുക ഈ ഇനത്തിലേയ്ക്ക് മാറ്റി വയ്ക്കേണ്ടതാണ്.

റിയൽ എസ്റ്റേറ്റ് നിക്ഷേപം

റിയൽ എസ്റ്റേറ്റ് രം​ഗത്തെ നിക്ഷേപവും നിങ്ങൾക്ക് വരുമാനം നേടിത്തരും. നിങ്ങൾ താമസിക്കുന്ന വീട് അല്ലാതെ മറ്റൊരു വീട് കൂടി വാങ്ങുന്നവർക്ക് അത് വാടകയ്ക്ക് നൽകി സ്ഥിര വരുമാനം നേടാം. കൂടാതെ വസ്തുക്കളും മറ്റും വാങ്ങി പിന്നീട് മറിച്ച് വിറ്റും ലാഭം നേടാവുന്നതാണ്.

അനാവശ്യ കാര്യങ്ങൾക്ക് പണം ചെലവാക്കരുത്

പണം ആവശ്യങ്ങൾക്ക് മാത്രം ഉപയോ​ഗിക്കുക. അനാവശ്യ കാര്യങ്ങൾക്ക് പണം ചെലവാക്കുന്നത് ബുദ്ധിപരമായ കാര്യമല്ല. ചൂതുകളി, ലോട്ടറി ടിക്കറ്റ് വാങ്ങൽ, സി​ഗരറ്റ് തുടങ്ങിയ കാര്യങ്ങൾ തീ‌‍‍ർച്ചയായും അനാവശ്യ കാര്യങ്ങളാണ്. ഇക്കാര്യങ്ങൾക്ക് ദിവസവും പണം ചെലവാക്കുന്ന നിരവധിയാളുകൾ നമ്മുടെ നാട്ടിലുണ്ട്. ആറ്റിൽ കളഞ്ഞാലും അളന്നു കളയണം എന്ന് പഴമക്കാർ പറയുന്ന പോലെ എന്തിനും ഏതിനും വ്യക്തമായ ഒരു കണക്ക് സൂക്ഷിക്കുക.

മിച്ചം പിടിക്കുക

ഓരോ മാസവും സ്ഥിരമായി, ക്രമമായി വരുമാനത്തിന്റെ ഒരു ഭാഗം മിച്ചം പിടിക്കാൻ പ്രത്യേകം ശ്രദ്ധിക്കുക. ഇങ്ങനെ മിച്ചം പിടിക്കുന്ന തുക സ്ഥിരമായി, ക്രമമായി റിട്ടേണ്‍ തരുന്ന നിക്ഷേപ മാ‍ർ​ഗങ്ങളിൽ നിക്ഷേപിക്കുകയും ചെയ്യണം.