സ്വർണം പണയം വച്ച് വായ്പ എടുക്കുന്നവർ ശ്രദ്ധ്ക്കുക? ഈ അബദ്ധങ്ങൾ പറ്റരുത്

അടിയന്തര സാഹചര്യങ്ങളിൽ അല്ലെങ്കിൽ ഹ്രസ്വകാല ആവശ്യങ്ങൾക്കായി പണം കടം വാങ്ങുന്നതിനുള്ള മികച്ച മാർഗമാണ് സ്വർണം പണയം വച്ചുള്ള വായ്പ. വ്യക്തിഗത വായ്പയുമായി താരതമ്യപ്പെടുത്തുമ്പോൾ കുറഞ്ഞ പലിശ നിരക്കിൽ സ്വർണ്ണ വായ്പകൾ ലഭ്യമാണ്. കൂടാതെ നിങ്ങൾക്ക് സ്വർണ്ണ വായ്പകളിൽ ഒന്നിലധികം തിരിച്ചടവ് ഓപ്ഷനുകളും ലഭിക്കും. എന്നിരുന്നാലും സ്വർണ്ണ വായ്പ എടുക്കുമ്പോൾ നിങ്ങൾ ശ്രദ്ധിക്കേണ്ട ചില കാര്യങ്ങൾ ഇതാ..

പലിശ നിരക്കുകൾ താരതമ്യം ചെയ്യുക

സ്വർണ്ണ വായ്പയുടെ പലിശ നിരക്ക് ഓരോ ബാങ്കുകളിലും വ്യത്യസ്തമായിരിക്കും. സാധാരണ പണയം വയ്ക്കുന്ന സ്വർണത്തിന്റെ മൂല്യത്തിന്റെ 75% വരെ വായ്പ എടുക്കാം. വിവിധ ബാങ്കുകൾക്ക് സ്വർണ്ണ വായ്പ പലിശ നിരക്ക് 9% -25% വരെ വ്യത്യാസപ്പെടും. അതിനാൽ സ്വർണ്ണ വായ്പ എടുക്കുന്നതിന് മുമ്പ് നിങ്ങൾ വിവിധ ബാങ്കുകളുടെ പലിശ നിരക്ക് പരിശോധിച്ച് ഏറ്റവും കുറഞ്ഞ നിരക്ക് ഈടാക്കുന്ന ബാങ്കിൽ നിന്ന് വായ്പ എടുക്കാൻ ശ്രദ്ധിക്കുക.

പ്രീ-പേയ്‌മെന്റ് നിരക്കുകൾ പരിശോധിക്കുക

സാധാരണയായി ബാങ്കുകൾ സ്വർണ്ണ വായ്പയ്ക്ക് പ്രീപേയ്‌മെന്റ് പിഴ ഈടാക്കില്ല. എന്നിരുന്നാലും, ആറുമാസം പൂർത്തിയാകുന്നതിനുമുമ്പ് നിങ്ങൾ വായ്പ മുൻകൂട്ടി അടച്ചാൽ ചില ബാങ്കുകൾ കുടിശ്ശികയുള്ള വായ്പയുടെ 2% വരെ പ്രീപേയ്‌മെന്റ് ചാർജ് ഈടാക്കും. അതിനാൽ, പ്രീപേയ്‌മെന്റ് പിഴ ഈടാക്കാത്ത ബാങ്ക് തിരഞ്ഞെടുക്കാൻ ശ്രദ്ധിക്കുക.

തിരിച്ചടവ് ഓപ്ഷനുകൾ താരതമ്യം ചെയ്യുക

ഇഎംഐ മോഡ്, മുൻകൂർ പലിശ പേയ്മെന്റ് ഓപ്ഷൻ, ബുള്ളറ്റ് തിരിച്ചടവ് എന്നിങ്ങനെ സ്വർണ്ണ വായ്പയ്ക്കായി ബാങ്കുകൾ വിവിധ തിരിച്ചടവ് രീതികൾ വാഗ്ദാനം ചെയ്യുന്നുണ്ട്. ഇതിൽ നിന്ന് നിങ്ങൾക്ക് ഏറ്റവും അനുയോജ്യമായ തിരിച്ചടവ് രീതി തിരഞ്ഞെടുക്കാൻ ശ്രദ്ധിക്കുക.

ക്രെഡിറ്റ് സ്കോർ പ്രശ്നമല്ല

ഭവന വായ്പ, വ്യക്തിഗത വായ്പ തുടങ്ങിയവ അനുവദിക്കുന്നത് അപേക്ഷകന്റെ ക്രെഡിറ്റ് സ്കോർ പരിശോധിച്ചതിന് ശേഷമാണ്. എന്നാൽ സ്വർണ്ണ വായ്പ ഒരു സുരക്ഷിത വായ്പയായതിനാൽ, ബാങ്കുകൾ സാധാരണയായി അപേക്ഷന്റെ ക്രെഡിറ്റ് സ്കോർ പരിശോധിക്കുകയില്ല.